اتالعان كورمەگە قاتىسۋشىلار قاتارىندا سەحەر التىنەر, اسىلى جانلىەل, نيلگيۋن گەكتاش, پەلين تولەدا سەيحان, ەلەنا دجان سىندى ونەر شەبەرلەرىن توپتاستىرعان. شەبەرلەر قاندايدا ءبىر ونەر تۋىندىسىن جارىققا شىعارۋ بارىسىندا ءتۇرلى ماتەريال, تاس, ءمارمار, قىش, پوليتەر, تۇيمە, كوفە ءدانى, اينا, بيسەر سياقتى ماتەريالداردى پايدالانادى. «Mosaic Almaty» توبىنىڭ سوڭعى ءۇش جىلدا اتقارعان جەمىستى ەڭبەكتەرىنىڭ ناتيجەسىندە ورىندالعان ءبىرسىپىرا شىعارماسى العاش رەت ۇسىنىلعان بولاتىن. تانىمال ونەر جانرى – تۇرىك موزايكاسى ءبىزدىڭ زامانىمىزعا دەيىنگى عاسىرلاردان باستاۋ الادى.
كارتينالار مەن ءار الۋان ساندىك بۇيىمدار ەرتەدەن-اق مانەرلىلىگى, كوز جاۋىن الار كوركەمدىگىمەن ساراي, حرام, شىركەۋلەردىڭ ءسان-سالتاناتىن اسقاقتاتتى. التىن عاسىر تۇسىندا بۇل ونەر ريم, ۆيزانتيا يمپەريالارى كولەمىندە كەڭ تانىلىپ, ءزاۋلىم عيماراتتاردىڭ ەدەن, توبە, قابىرعالارىن بەزەندىرۋ ءۇشىن قولدانىلدى. مىسالى, قىزعالداقتارمەن بەزەندىرىلگەن ايگىلى قىش كەسىندىلەرىنەن قۇرالعان موزايكا العاش تۇركيادا پايدا بولدى. بايىرعى تۇرىك تۇرعىندارى ساندىك بۇيىمدارىندا كوبىنەسە كوكونىس ورنەگىن قولدانعان.
سەحەر التىنەردىڭ تۋعان جەرى ىستانبۇل قالاسى, ماماندىعى بويىنشا ارحەولوگ ءارى سۋرەتشى. سەحەر «فيليپپ مورريس» كومپانياسىنىڭ قارجى ءبولىمىندە بىرنەشە جىل قىزمەت اتقاردى. بۇدان كەيىن شىعارماشىلىقپەن, تىكەلەي موزايكا ونەرىمەن يزمير ستۋدياسىندا موزايكا قۇرۋدىڭ قىر-سىرىمەن اينالىستى.يتاليادا موزايكانىڭ ەجەلگى ۆيزانتيالىق تەحنيكاسىن زەرتتەپ, راۆاننادا كوركەم-ونەر سالاسى بويىنشا ءبىلىم الدى. ول ءوز شىعارمالارىندا ۆان گوگ, ميكەلاندجەلو, كليمت, ۆەرمەەر جانە بوتيچەللي سىندى تانىمال سۋرەتشىلەردىڭ شىعارمالارىنا جۇگىنەدى.
بۇگىندە الماتىدا قىزمەت اتقارىپ جۇرگەن توپ جەتەكشىسى سەحەر مەن ونىڭ شاكىرتتەرى (تۇركيادان) شىعارماشىلىعىن جەتىلدىرۋمەن قاتار, موزايكا ونەرىنە قىزىعۋشىلاردى تاڭسىق ونەرگە ماشىقتاندىرادى.
ساپارباي پارمانقۇل,
«Egemen Qazaqstan»
