ايماقتار • 16 مامىر، 2019

الماتىدا «انا مەن بالا» حالىقارالىق فورۋمى ءوتىپ جاتىر

بۇگىن الماتىدا ەكى كۇندىك «انا مەن بالا» حالىقارالىق عىلىمي-ءبىلىم بەرۋ فورۋمى باستالدى.

بيىل ەكىنشى رەت «اكۋشەرلىك، گينەكولوگيا جانە پەريناتولوگيا عىلىمي ورتالىعى» اق وتكىزىپ وتىرعان فورۋم ۇيىمداستىرۋشىلارى قاتارىندا دەنساۋلىق ساقتاۋ مينيسترلىگى مەن «مەدمەديا قازاقستان» كونگرەسس-وپەراتورى بار.

فورۋمدا «قازاقستان رەسپۋبليكاسىندا بوساندىرۋ قىزمەتىن ۇيىمداستىرۋ. ماسەلەلەر جانە شەشۋ جولدارى» تاقىرىبىندا اكۋشەرلىك، گينەكولوگيا جانە پەريناتولوگيا عىلىمي ورتالىعىنىڭ ديرەكتورى دينارا مىرزاحمەتوۆا نەگىزگى باياندامانى جاساپ، ايەل دەنساۋلىعىنا قاتىستى ەلىمىزدەگى ەكشەلگەن مالىمەتتەرمەن ءبولىستى.

رەپرودۋكتيۆتى دەنساۋلىقتى نىعايتۋعا باعىتتالعان حالىقارالىق جيىندا ەمدىك-دياگنوستيكالىق شارالاردى قولدانۋداعى عىلىمي جەتىستىكتەر ورتاعا سالىنىپ، كلينيكالىق تاجىريبە الماسۋلار ءجۇرىپ جاتىر.

اكۋشەر-گينەكولوگتاردىڭ ۇلتتىق قاۋىمداستىعىنىڭ ءتورايىمى، پروفەسسور نينا قايۋپوۆانىڭ ايتۋىنشا، بۇكىل قازاقستان بويىنشا وسى سالادا كوپ جىلدار بويى تىنباي جۇرگىزىلگەن عىلىمي زەرتتەۋلەر زايا كەتكەن جوق. بۇل وسى سالانىڭ وزەكتى ماسەلەلەرىن مەملەكەتتىك تۇرعىدا كوتەرۋگە، جەتىلدىرۋگە جول اشتى. ۇلتتىق قاۋىمداستىقتىڭ باستامالارى دا، وعان قاتىستى قابىلدانعان مەملەكەتتىك باعدارلامالار زاڭنامالىق تۇرعىدا بولسىن، ەكونوميكالىق جاعىنان دا جان-جاقتى قولداۋعا يە بولدى.

– مەن اكۋشەرلىك پەن گينەكولوگيا مەديتسينانىڭ بارلىق تۇرلەرىنىڭ ىشىندە توتەنشە جاۋاپكەرشىلىككە يە ەكەنىن ايتۋدان جالىقپايمىن. ويتكەنى ءبىزدىڭ ماماندار ادامدارعا اكە مەن انا اتانۋ باقىتىن سىيلاي وتىرىپ، جاڭادان تۋىلعان ءومىردىڭ باستاۋىندا تۇرادى. اكۋشەر دارىگەرلەر ەكى ءومىر ءۇشىن دە جاۋاپ بەرە وتىرىپ، دۇنيەگە دەنى ساۋ ءسابيىڭ تۋىلۋىنا قىزمەت ەتەدى. بۇل ماقسات ءبىزدىڭ بۇكىل عىلىمي ىزدەنىستەرىمىز بەن جاڭا تەحنولوگيالاردىڭ ەنگىزىلۋىن اقتايدى، – دەدى اكۋشەر-گينەكولوگتاردىڭ ۇلتتىق قاۋىمداستىعىنىڭ ءتورايىمى نينا قايۋپوۆا.

سونىمەن ءىى حالىقارالىق فورۋمعا 500-گە تارتا مامان شاقىرىلعان. فورۋمعا ەلىمىزدەگى بۇكىل اكۋشەرلىك، گينەكولوگيالىق جانە پەريناتالدىق ورتالىقتاردىڭ وكىلدەرىمەن قاتار، دۇنيەجۇزىلىك دەنساۋلىق ساقتاۋ ۇيىمى، يۋنەسكو وكىلدەرىمەن قاتار، اقش، رەسەي، ۋكراينا، بەلارۋس ەلدەرىنىڭ اكۋشەرلىك، گينەكولوگيا جانە پەريناتولوگيالىق ورتالىقتارىنىڭ ماماندارى مەن ساراپشىلارى قاتىسۋدا.

فورۋم اياسىندا ەكى كۇن بويى وسى سالانىڭ ەڭ وزەكتى ماسەلەلەرىنە قاتىستى شەتەلدىك ماماندار مەن وتاندىق عالىمداردىڭ شەبەرلىك دارىستەرى جۇرەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز