جوبانىڭ ماقساتى – وتاندىق جانە جەرگىلىكتى ءتۋريزمدى دامىتۋ جولدارىن قاراستىرۋ, ايماقتىق كيەلى جەرلەر مەن جادىگەرلەردى ناسيحاتتاۋ.
جاڭا مارشرۋتتاردىڭ جەلىسىنە وراي, ستۋدەنتتەر مەن ماگيسترانتتار اراسىندا كونكۋرس ۇيىمداستىرىلدى. «7 جاڭا تۋريستىك مارشرۋت» ستارتاپ تانىستىرىلىم بايقاۋىنا قاتىسۋعا ءوتىنىش بىلدىرگەن 19 توپتىڭ ىشىنەن الدىن-الا ىرىكتەۋدەن وتكەن 8 توپ اقتىق كەزەڭگە جولداما الدى. اتاپ ايتقاندا, جارىسقا جاراتىلىستانۋ فاكۋلتەتىنەن «قۇرلىقتار جۇلدىزى», «جالىندى جاستار», «قىران» جانە «سيريۋس», قازاق فيلولوگياسى جانە الەم تىلدەرى فاكۋلتەتىنەن «اسۋ», «جەتىسۋ», الەۋمەتتىك-گۋمانيتارلىق فاكۋلتەتىنەن «7Qaz» جانە «سۇڭقار» توپتارى قاتىستى.
سايىس بارىسىندا ءار كوماندا كوپشىلىككە كەڭىنەن تانىلا قويماعان, الايدا تۋريستىك الەۋەتى جوعارى نىسانداردىڭ وزىندىك ەرەكشەلىگىن تانىستىرىپ, بيزنەس-جوسپارىن قورعادى. قازىلار القاسى ءاربىر جۇمىستىڭ ەرەكشەلىگىن, ءمانى مەن ماڭىزىن جەتە ساراپقا سالدى. ناتيجەسىندە قازاق فيلولوگياسى جانە الەم تىلدەرى فاكۋلتەتىنىڭ ستۋدەنتتەرىنەن قۇرالعان «جەتىسۋ» توبىنىڭ«جەتىسۋ–جەر ءجانناتى» تاقىرىبىنداعى جوباسى ۇزدىك دەپ تانىلدى. ەكىنشى ورىنعا جاراتىلىستانۋ فاكۋلتەتىنىڭ ستۋدەنتتەرىنەن قۇرالعان «قىران» توبىنىڭ «سىرعا تولى سىر ەلى» اتتى جوباسى يە بولدى. اتالعان فاكۋلتەتتىڭ «جالىندى جاستار» كومانداسىنىڭ «رۋحى بەكەم كيەلى مەكەن جەتىسۋ» اتتى جوباسى ءۇشىنشى ورىندى قانجىعالادى.
الداعى ۋاقىتتا ۇزدىك دەپ تانىلعان مارشرۋتتار بويىنشا ارنايى ەكسپەديتسيا ۇيىمداستىرىلماق. ەكسپەديتسيا بارىسىندا سايىس جەڭىمپازدارى وزدەرىنىڭ قۇراستىرعان مارشرۋتتارىمەن ءجۇرىپ, تۋريستىك نىساندار مەن كيەلى جەرلەردى گيد رەتىندە تانىستىراتىن بولادى.
– ءتۋريزمدى دامىتۋ ءۇشىن ەلىمىزدە بارلىق العىشارتتار بار. دەسە دە قازاقستان باي تۋريستىك-رەكرەاتسيالىق الەۋەتكە يە بولعانىمەن, ەلدەگى تۋريزم سالاسىنىڭ جەتكىلىكتى دەڭگەيدە دامىماي جاتقاندىعى جاسىرىن ەمەس. نەگە؟ ساۋال كوپ. قازاقستانعا كەلەتىن تۋريستەرگە «مەدەۋ» مۇز ايدىنى, «شىمبۇلاق» كۋرورتتىق كەشەنى, شارىن شاتقالى, «كولساي», «بۋراباي» سياقتى تۋريستىك نىساندار تانىس بولعانىمەن, ولاردىڭ تارتىمدىلىعى جوعارى, ۇلتتىق رۋحتىڭ قاينار بۇلاعىنا اينالعان كيەلى دە قاسيەتتى ورىندار تۋرالى بىلە بەرمەيدى. سوندىقتان دا بۇگىندە وسى تاقىلەتتەس ساكرالدى مەكەندەردىڭ ايماقتىق جەلىسىن جاساپ, ءبىر جۇيەگە كەلتىرۋدىڭ ماڭىزدىلىعى ارتىپ وتىر, – دەيدى ۋنيۆەرسيتەت عالىمدارى.
