ايماقتار • 15 مامىر، 2019

اتىراۋداعى تۇرعىن ۇيلەردىڭ قابىرعالارىنا Street-art سۋرەتتەر سالىندى

ن.تىلەنديەۆ اتىنداعى كىشى ونەر اكادەمياسىنىڭ بەينەلەۋ ونەرى جانە ديزاين ءپانى وقىتۋشىلارى وبلىس ورتالىعىن بەزەندىرۋگە ۇلەس قوسۋدى قولعا الدى. بۇل تۋرالى اتىراۋ قالالىق اكىمدىگىنىڭ ءباسپاسوز قىزمەتى حابارلادى.

مارجان تىلەۋبەك

وقىتۋشىلار قالاداعى تۇرعىن ۇيلەردىڭ قابىرعالارىنا سۋرەت سالۋ تۋرالى ويلارىن شاھار باسشىسى اليمۇحاممەد قۇتتۇمۇرات ۇلىنا ايتقان، قالا اكىمى ءوز كەزەگىندە يدەياعا قولداۋ كورسەتتى، جوبانى قارجىلاندىرۋعا نيەتتى دەمەۋشىلەر دە تابىلدى.

- الدىمەن وبلىس ورتالىعىنداعى بالىقشى ىقشام اۋدانىنداعى تۇرعىن ءۇيدىڭ قابىرعاسىنا جايىق وزەنىندەگى سۋاستى الەمىنىڭ سۋرەتىن سالدىق. بيىل ماحامبەت وتەمىس ۇلىنىڭ پورترەتىن سالدىق، قازىر جاستار جىلىنا قاتىستى سۋرەتتەردى ويلاستىرىپ جاتىرمىز، - دەيدى سۋرەتشى مەيىربەك جاعىپاشەۆ.

وقىتۋشىلار اۆانگارد، نۇرسايا، ۆوكزال ماڭى، بالىقشى ىقشاماۋداندارىنداعى ۇيلەرگە قۇرمانعازى، دينا، بەيبارىس سەكىلدى تۇلعالاردىڭ Street-art سۋرەتتەرىن سالۋدى جوسپارلاپ وتىرعاندارىن ايتادى. سۋرەتشىلەر جوباعا قولداۋ كورسەتكىسى كەلەتىن دەمەۋشىلەردى سەرىكتەستىككە شاقىرادى. ءبىر سۋرەتتى سالۋ ءۇشىن ورتا ەسەپپەن العاندا 10 كۇن كەتەدى. ال سۋرەت سالۋ ءۇشىن ارنايى باللوندار قولدانىلادى.

- باللونداعى بوياۋلار سۋعا ءتوزىمدى، ەگەر ءۇي قابىرعاسى سەنىمدى، اقاۋى جوق بولسا، سۋرەت تە ۇزاق ۋاقىت تۇرادى. ءبىر سۋرەتكە 100 باللون كەتەدى. جەلسىز، اشىق كۇندەرى جۇمىس ىستەۋگە تىرىسامىز، - دەيدى سۋرەتشى ميراس جانعوجيەۆ.

ايتا كەتەيىك، اتىراۋداعى ۇيلەرگە ءسان بەرىپ تۇرعان سۋرەتتەرگە تۇرعىنداردىڭ دا كوزقاراستارى جاقسى. سۋرەتشىلەر جۇمىس قيىن بولسا دا، وڭ ناتيجەگە جانە تۇرعىنداردىڭ ىقىلاستارىنا يە بولعاننان كەيىن جاڭا بەينەلەر جاساۋعا قۋانا كىرىسەتىندەرىن ايتادى.

- گرافيت دەيمىز بە، كوركەم سۋرەت دەيمىز بە، باستىسى وسى جارقىن بەينەلەر اتىراۋعا اسەمدىك پەن جاقسى كوڭىل-كۇي سىيلاعانىنا سەنىمدىمىز، - دەيدى سۋرەتشى اسىلبەك باقتيار.