بىلتىر اقتوبە وبلىسىندا «اۋىل قامقورشىسى» اتتى بىرەگەي جوبانى جۇزەگە اسىرۋ قولعا الىندى. «اتامەكەن» ۇلتتىق كاسىپكەرلەر پالاتاسىنىڭ وڭىردەگى ءبولىمشەسى باستاماشى بولعان جوباعا وبلىس اكىمدىگى دە اجەپتاۋىر قولداۋ كورسەتتى. ساتىمەن باستالعان ىلكىمدى ءىستىڭ العاشقى ناتيجەلەرى دە كوڭىلگە قونعانداي ەدى. بۇعان وتكەن جىلى وڭىردەگى شاعىن جانە ءىرى دەڭگەيدەگى بيزنەس وكىلدەرىنىڭ 2 ميلليارد تەڭگەدەن استام قاراجات جۇمساعانى دالەل.
«اۋىل قامقورشىسى» جوباسىن جالعاستىرۋ ءۇشىن بيىل وبلىس اۋماعىنداعى 199 ەلدى مەكەندە 344 جوبانى ىسكە قوسۋ جوسپارلانىپ وتىر. اۋىلعا قارجىلاي قولداۋ كورسەتەتىن بيزنەس وكىلدەرى مەن مەتسەناتتاردىڭ قاتارى 289 ادامدى قۇرايدى. ياعني, اۋىل قامقورشىلارى بيىل وبلىستىڭ ەلدى مەكەندەرىندە قۇنى 2 ميلليارد 600 ميلليون تەڭگەگە تەڭ الەۋمەتتىك-تۇرمىستىق باعىتتاعى نىسانداردى پايدالانۋعا بەرۋ كوزدەلگەن. وسىندايدا بۇگىندە ناقتى ءىستىڭ جاي-كۇيى قانداي دەگەن ساۋال تۋىندايدى. ءبىز كوكەيدەگى وي-پىكىرىمىزدى «اتامەكەن» ۇلتتىق كاسىپكەرلەر پالاتاسى اقتوبە وبلىستىق بولىمشەسىنىڭ ءتورايىمى انار دارجانوۆاعا جەتكىزگەن ەدىك. ول قاپەلىمدە «اۋىل قامقورشىسى» جوباسىنا قاتىستى قانداي جاۋاپ قايتارارىن بىلمەي, پالاتا بولىمشەسىنىڭ ءبىر وتىرىسىندا بۇل ماسەلە قارالعانىن ايتىپ بەردى. ايتسە دە, اتامەكەندىكتەردىڭ باسقوسۋىندا ناقتى قانداي شەشىم قابىلدانعانى ايتىلمادى. جوعارىدا ايتىلعان اۋىلعا قامقورلىق كورسەتۋدى كوزدەگەن 289 بيزنەس وكىلى قايدا ءجۇر؟ سانامىزعا قوناقتاعان ساۋالدىڭ ءبىر توركىنى وسى. ارادا تاعى دا بىرنەشە كۇن مەن اپتالار ءوتتى. وسى ۋاقىت ارالىعىندا «اتامەكەننىڭ» ايماقتاعى باس وكىلىنە قايتا-قايتا ساۋال قويۋمەن بولدىق. ايتەۋىر بىردە تەمىر اۋدانىندا ءومىرباي جايلىشەۆ ەسىمدى ەل ازاماتى 150 ورىندىق بالالار باقشاسىن سالۋعا بەل بۋعانىن ايتىپ بەردى. انار جارجانوۆانىڭ ءجون سىلتەۋى بويىنشا ونى تەمىر اۋدانى اكىمىنىڭ ورىنباسارى مارات مۇڭايتپاسوۆ ارقىلى تاۋىپ الىپ, باستاعان قادامىنا ءسات-ساپار تىلەدىك.
الايدا ءو.جايلىشەۆتىڭ مالىمدەۋىنشە, وعان بالالار باقشاسى عيماراتىن تۇرعىزۋ ءۇشىن بولىنگەن جەر اۋماعى تارلىق ەتەدى ەكەن. سوندىقتان ول بۇل ماسەلە تۇبەگەيلى شەشىمىن تاپتى دەپ ايتۋعا بولمايتىنىن جەتكىزدى. بۇعان جەر ماماندارى مەن ساۋلەتشىنىڭ تۇبەگەيلى شەشىمى كەرەك كورىنەدى. ونىڭ ءۇستىنە ءدال وسى جەر تەلىمى تۇسىنان «قازاقتەلەكومنىڭ» جەراستى بايلانىس جەلىلەرى وتەدى. مۇنىڭ ءوزى كادىمگىدەي قولايسىزدىق كەلتىرىپ تۇر, دەيدى ءو.جايلىشەۆ.
وسى ارادا «اۋىل قامقورشىسى» جوباسى بويىنشا وڭ مىسال ايتۋدىڭ دا ورايى كەلىپ تۇرعانداي. ياعني, قازىرگى كەزدە وڭىرگە بەلگىلى كاسىپكەر, «ناۋرىز-سين» جشس ديرەكتورى يبراگيم سارسەنباەۆ «اۋىل – ەل بەسىگى» جانە «اۋىل قامقورشىسى» الەۋمەتتىك جوبالارى شەڭبەرىندە شالعايداعى ىرعىز اۋدانىندا بالالار سپورت كەشەنىن سالۋدى قولعا الىپتى. بۇل ءۇشىن ول ءوز ەسەبىنەن 20,5 ميلليون تەڭگە قاراجات ءبولدى. ايتسە دە, مۇنداي مىسال ساۋساقپەن ساناپ الارلىقتاي از ەكەنى ايقىن.
اتالعان جوبالار جوعارىدا ايتىلعانداي اۋىلدىق اۋماقتاردى قايتادان جاڭعىرتۋعا سەپتىگىن تيگىزە الۋىمەن قۇندى. تۇتاستاي العاندا, وبلىستا وتكەن جىلى قولعا الىنعان «اۋىل قامقورشىسى» جوباسىنىڭ قارقىنى باسەڭدەپ قالعانى قىنجىلتپاي قويمايدى. «ەشتەن كەش جاقسى» دەمەي مە حالقىمىز. تۋعان جەرى الدىنداعى قارىزى مەن پارىزىن ۇمىتپاي, تۋعان توپىراعىنا جاناشىر بولا بىلەتىن ازاماتتار بۇل ىسكە تاعى دا بەت بۇرسا, «اۋىل قامقورشىسى» جوباسى قايتادان قولداۋ تاۋىپ كەتەتىنىنە ەشقانداي كۇمان جوق.
اقتوبە
