شىعارماشىلىق دەڭگەيى جوعارى, وزدەرىنىڭ كاسىبي قالىبى مەن ماشىعىن قالىپتاستىرا بىلگەن بۇل ۇجىمداردىڭ بيىك ونەرىنە قول سوعۋشىلار از ەمەس. ولار ءتىپتى قازاقستاننىڭ بەلگياداعى ەلشىسى ايگۇل قۇسپاننىڭ ارنايى شاقىرتۋى بويىنشا ەۋروپا ەلدەرىندە كونتسەرت قويىپ قايتتى. سونىمەن بىرگە دەلەگاتسيا قۇرامىنداعى اقتوبەلىك قولونەر شەبەرلەرى كارى قۇرلىقتىڭ جۇرتشىلىعىنا ءوز تۋىندىلارىن ۇسىندى.
بريۋسسەل مەن ليۋكسەمبۋرگ قالالارىندا ەۋروپالىق كورەرمەندەرگە ناۋرىز مەرەكەسى اياسىندا ازىرلەنگەن كونتسەرتتىك باعدارلامالار ۇلكەن تابىسپەن وتكىزگەنىن ايتا كەتكەن ءجون. فيلارمونيا انشىلەرى نۇرتاس وماروۆ پەن گۇلنازيرە ساعىنعاليەۆا ورىنداعان حالىق اندەرى مەن جىر-تەرمەلەردى ەۋروپالىقتار وتە جىلى قابىلداعان. ال «اققۋ» بي انسامبلىنىڭ مىڭ بۇرالا بيلەگەن ارۋلارى قارا جورعانى ساحناعا شىعارعان كەزدە دە ريزاشىلىق پەن سۇيىسپەنشىلىك تانىتقاندار كوپ بولدى. سونداي-اق ا.جۇبانوۆ اتىنداعى حالىق اسپاپتار وركەسترى موتسارتتىڭ الەمگە ايگىلى شىعارمالارىن دومبىرا ۇنىمەن جەتكىزگەندە كونتسەرت زالى تەڭىزدەي تولقىدى, دەيدى ونەر ساپارى جونىندە ع.جۇبانوۆا اتىنداعى اقتوبە وبلىستىق فيلارمونياسىنىڭ ديرەكتورى ەلۋباي كەنجاليەۆ.
تالعامى بيىك, ونەرى جان-جاقتى دامىعان شەتەل وكىلدەرى ەلىمىزدىڭ باتىس وڭىرىنەن بارعان انشىلەردىڭ, كۇي مەن بي شەبەرلەرىنىڭ ونەرىنە جوعارى باعا بەرگەنى اتاپ ايتۋعا تۇرارلىق. اسىرەسە, ۇلتتىق ونەرىمىزدىڭ قايتالانباس كولوريتى مەن ناقىشتارى ءتانتى ەتكەنى اڭعارىلادى. وسىنداي وي ءتۇيىنىن اقتوبەلىك قولونەر شەبەرلەرىنىڭ قولىنان شىققان ءار ءتۇرلى بۇيىمدارعا قاتىستى دا ايتۋعا بولادى. ەۋروپالىقتاردىڭ حالقىمىزدىڭ ەجەلگى ۇلتتىق كولونەر تۋىندىلارىنا دەگەن قىزىعۋشىلىعى, ەتنوستيلگە دەگەن قۇرمەتى ەرەكشە ەكەنىن بايقادىق, دەدى بۇدان ءارى جوعارىدا اتالعان ونەر شاڭىراعىنىڭ جەتەكشىسى ە.مۇحامبەتوۆا. ءبىر سوزبەن ايتقاندا ءوز ونەرلەرىمەن ەلەڭ ەتكىزگەن ۇيىمشىل ۇجىم بۇل كۇندەرى وزدەرىنىڭ 75 جىلدىق بيىك بەلەسىن اتاپ وتۋگە ءبىر كىسىدەي جۇمىلعان.
اقتوبە
