بيىل ءۇشىنشى جىل قاتارىنان ۇيىمداستىرىلعان فورۋمدى اشقان ە.قارين الەمدىك گەوساياسي وزگەرىستەردىڭ اياسىندا ەۋرازيا جاڭا ساياسي جانە الەۋمەتتىك-ەكونوميكالىق ترانسفورماتسيا كەزەڭىنە كىرەتىنىن اتاپ ءوتتى. قازاقستان-رەسەي ساراپشىلارى ءار كەزدە ءتۇرلى الاڭداردا باس قوسىپ, ەڭ وزەكتى ماسەلەلەردى تالقىلاپ, تالداۋ ارقىلى ەڭسەرىپ كەلە جاتقانىن جەتكىزدى. ال بيىلعى ءىس-شارا قازاقستانداعى ەڭ ماڭىزدى ساياسي وقيعا – پرەزيدەنتتىك سايلاۋ قارساڭىندا ءوتىپ جاتقانىن ءارىپتەستەرىنىڭ ەسىنە سالدى.
– وسىدان ءۇش كۇن بۇرىن سايلاۋ ناۋقانى باستالدى. ۇگىت-ناسيحات جۇمىستارى وتە بەلسەندى وتۋدە. ناۋقانعا ءارتۇرلى كانديداتتار قاتىسۋدا. ونىڭ ىشىندە وپپوزيتسيا دا بار. سايلاۋ الاڭىندا ەشكىم دە ەشكىمدى ىعىستىرماي, بارلىعىنا تەڭ مۇمكىندىك, بۇقارالىق اقپارات قۇرالدارىنا شىعۋعا تەڭ قۇقىق, ۇگىت-ناسيحات جۇمىستارىن جۇرگىزۋگە دە بىردەي مۇمكىندىك بەرىلدى. بيلىك شىنىمەن دە اشىق ءارى باسەكەلى سايلاۋدىڭ وتۋىنە مۇددەلىلىك ءبىلدىرۋدە. بۇل – قازاقستان پرەزيدەنتىنىڭ قاعيداتتى ۇستانىمى. ەلىمىزدە بولىپ جاتقان سايلاۋ پروتسەسى تاعى ءبىر اۋقىمدى پروتسەسس – بيلىك ترانزيتىنىڭ بولىگى سانالادى. الداعى ناۋقاندى بيلىك ءترانزيتىنىڭ شەشۋشى كەزەڭى دەۋگە بولادى, – دەدى ە.قارين.
پرەزيدەنتتىڭ كەڭەسشىسى ەلدە شىنايى وزگەرىستەر بولىپ جاتقانىن, بيلىكتىڭ اشىق ديالوگقا مۇددەلى ەكەنىن, ساياسي ۇدەرىستىڭ بەلسەندى ءجۇرىپ جاتقاندىعىن دا تىلگە تيەك ەتتى.
جالپى, قازاقستان-رەسەي ساراپشىلار فورۋمىنا قاتىسۋشىلار ايماقتاعى ەلدەر وزدەرىنىڭ حالىقارالىق جانە ايماقتىق ۇدەرىستەردەگى ءرولىن ايقىنداپ الۋعا تىرىسىپ جاتقاندارىن باسا ايتتى. وسىعان بايلانىستى وڭىرلىك ىنتىماقتاستىققا ەرەكشە ماڭىز بەرىلۋدە.
سونىمەن بىرگە حالىقارالىق احۋال تۇراقسىزدىق پەن ساياسي جانە ەكونوميكالىق لاندشافتىڭ ديناميكالىق وزگەرۋىمەن سيپاتتالۋدا. سول سەبەپتى دە الەمنىڭ ايماقتىق ءجانە جەتەكشى ەلدەرى اراسىنداعى گەوساياسي, ەكونوميكالىق جانە تەحنولوگيالىق باسەكەلەستىك ارتىپ كەلەدى.
ساراپشىلاردىڭ ايتۋلارىنا قاراعاندا, بۇل تۇرعىدا قازاقستان مەن رەسەي ەۋرازيا ەكونوميكالىق وداعىنىڭ ماڭىزدى ستراتەگيالىق سەرىكتەستەرى عانا ەمەس, ەكى ەلدىڭ ىنتىماقتاستىعى ەۋرازياداعى ءوزارا ءىس-قيمىلدىڭ فورماسى مەن مازمۇنىن ايقىندايدى.
ماسەلەن, «ۆالداي» قورىنىڭ وكىلى اندرەي سۋشەنتسوۆ جاھاندىق گەوساياسي ترانسفورماتسيا, ەۋرازيا ەكونوميكالىق وداعىنىڭ دامۋى, قىتايدىڭ ايماقتاعى سىرتقى ساياساتى مەن ساۋدا سوعىستارى تۋرالى ايتا كەلىپ, ءبىزدىڭ وڭىردەگى مامىراجاي احۋال الەمگە ۇلگى بولاتىنىن اتاپ ءوتتى.
– ورتالىق ازيا, رەسەي مەن قىتايدىڭ قارىم-قاتىناستارىندا بۇگىنگە دەيىن قانداي دا ءبىر داعدارىستار تىركەلگەن جوق. قارسىلاس رەتىندە دە تەكەتىرەسىپ, ءبىرىن ءبىرى جاعادان العان ەمەس. بۇل سەنىمگە نەگىزدەلگەن تۇراقتىلىقتى, ءوزارا دوستىقتى, وعان قوسا ايماقتاعى بۇلجىماي ورىندالاتىن «ويىن ءتارتىبىن» قاراي وتىرىپ, ەۋرازيادا ءدال وسىنداي جاعداي ورنايتىن ەدى عوي دەگەن ويعا قالاسىڭ. ارينە بۇعان ەۋروپاداعى قاۋىپسىزدىك شارالارىنىڭ تەرىس ىقپالى بولدى. رەسەي مەن ەۋروپانىڭ ارا قاتىناسى شيەلەنىسپەگەندە, ەۋرازيادا ءدۇرلىگىس تە, دۇربەلەڭ دە بولماس ەدى, – دەدى ا.سۋشەنتسوۆ.
ساراپشىلار ەكىكۇندىك فورۋمدا قازاقستان-رەسەي قاتىناستارى مەن ەكى ەلدىڭ اراسىنداعى مەدياسەرىكتەستىك, ورتالىق ازياداعى جاڭا ىنتىماقتاستىق كونتۋرلارى, سونداي-اق الەۋمەتتىك شارتتاردىڭ ءوزگەرۋى ءتارىزدى وزەكتى ماسەلەلەردى تالقىعا سالادى. سونىمەن قاتار ەكى ەلدىڭ اراسىنداعى حالىقارالىق كۇن تارتىبىندە تۇرعان ماڭىزدى ماسەلەلەردى, ايماقتىق ساياسات پەن قاۋىپسىزدىك سالاسىنداعى سوڭعى وقيعالاردى تالداپ, اراداعى ەكونوميكالىق جانە گۋمانيتارلىق بايلانىستاردى قالىپتاستىرۋ مەن نىعايتۋ ماسەلەلەرى بويىنشا پىكىر الماسادى.
