قازاقستان مەن اقش اراسىنداعى كەڭەيتىلگەن ستراتەگيالىق ارىپتەستىكتى نىعايتۋ اياسىندا جاسالعان كەلىسىم ەكى مەملەكەتتىڭ كونسۋلدىق مەكەمەلەرى, كونسۋلدىق لاۋازىمدى تۇلعالارى جانە ولاردىڭ وتباسى مۇشەلەرى پايدالاناتىن ءوزارا يممۋنيتەتتەر مەن ارتىقشىلىقتاردى كۇشەيتىپ, قىزمەت شارتتارىنا وڭ اسەرىن تيگىزەدى.
سىرتقى ىستەر ءمينيسترىنىڭ ورىنباسارى ەرجان اشىقباەۆ بىلتىر قاڭتاردا تۇڭعىش پرەزيدەنت نۇرسۇلتان نازارباەۆ اقش-قا رەسمي ساپارىندا ەكىجاقتى قارىم-قاتىناستى كەڭەيتىلگەن ستراتەگيالىق ارىپتەستىك دەڭگەيىنە شىعارۋ تۋرالى ۋاعدالاستىققا قول جەتكىزىپ, سونىڭ اياسىندا اتالعان كەلىسىم جاسالعانىن مالىمدەدى. كەلىسىمدى ىسكە اسىرۋ قوس ەل ازاماتتارىنىڭ مۇددەلەرىن العا جىلجىتۋ جانە قورعاۋ تيىمدىلىگىن ارتتىرادى.
بۇل – ۋيليام موزەردىڭ اقش-تىڭ قازاقستانداعى ەلشىسى رەتىندە قول قويعان العاشقى قۇجاتى. ول جاسالعان كەلىسىم ەكى ەل ءۇشىن ماڭىزدى ساياسي تاپسىرما ەكەنىن, بۇل ءتۋريزمدى تۇلەتۋ, ەكونوميكانى دامىتۋ, ينۆەستيتسيا تارتۋ سالاسىندا بايلانىستى نىعايتۋعا سەپتىگىن تيگىزەتىنىن جەتكىزدى. سونداي-اق ەكىجاقتى ارىپتەستىك اقش-تىڭ ءوز ۋاقىتىندا قازاقستان تاۋەلسىزدىگىن مويىنداعان كەزىنەن باستالعانىن اتاپ ءوتىپ, 2006 جىلى نۇر-سۇلتان قالاسىندا اشىلعان ەلشىلىككە قوسا, بۇگىندە الماتىدا جاڭا ەلشىلىك عيماراتىن سالۋدى جوسپارلاپ جاتقاندارىن حابارلادى.
بۇگىندە اقش اۋماعىندا قازاقستاننىڭ ەكى باس كونسۋلدىعى جۇمىس ىستەيدى. ونىڭ ءبىرى نيۋ-يورك قالاسىندا بولسا, ەكىنشىسى بيىل قاڭتار ايىندا سان-فرانتسيسكو قالاسىندا اشىلدى.
