«قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ يسلام مەن پراۆوسلاۆيە ەلىمىزدەگى رۋحاني كەلىسىمنىڭ ەكى تىرەگى ەكەنىن ۇنەمى ايتىپ وتىرادى. قازاقستان قاشاندا دىندەر مەن مادەنيەتتەردىڭ ورتاق ءۇيى بولعان. ءبىزدىڭ جەرىمىزدە سان الۋان ەتنوس وكىلدەرى بىرلىگى جاراسىپ, تاتۋ-ءتاتتى ءومىر ءسۇرىپ جاتىر. ولاردىڭ بارلىعى وزدەرىنىڭ ءدىني راسىمدەرىن وتكىزىپ, عيباداتحانالارىن سالا الادى. ال قازاقستانداعى ورىستىڭ پراۆوسلاۆيە شىركەۋى تالاي جىلدار بويى قوعامنىڭ رۋحاني قۇندىلىقتارىن كۇشەيتۋگە ءوز ۇلەسىن قوسىپ, ءدىنارالىق كەلىسىمدى ناسيحاتتاۋدا مەملەكەتتىڭ سەنىمدى سەرىگى بولىپ كەلەدى» دەدى مينيستر.
بۇگىنگى تاڭدا شىركەۋدىڭ جوباسى جاسالىپ جاتىر. عيماراتتىڭ قۇرىلىسى الداعى ءۇش جىلدا اياقتالادى. جاڭا شىركەۋ سىعاناق كوشەسىنىڭ بويىندا, «جاعالاۋ» تۇرعىن الابىنا جاقىن جەردەگى كولدىڭ جاعاسىندا ورنالاسادى.
«قالا تۇرعىندارى بىرنەشە جىل بويى ۇكىمەتكە دە, پرەزيدەنتكە دە حات جازىپ, ەسىلدىڭ سول جاعالاۋىندا تاعى ءبىر شىركەۋدىڭ قۇرىلىسىن باستاۋدى سۇراعان. مەن دە ءوتىنىش جاسادىم. ءسويتىپ, تۇڭعىش پرەزيدەنت نۇرسۇلتان نازارباەۆ رەسمي تۇردە رۇقسات بەردى. جاقىندا ەلباسى ەلوردادا ورتالىق ازياداعى ەڭ ۇلكەن مەشىتتىڭ ىرگەتاسىن قالاعان ەدى. ول جەردە ءبىر ۋاقىتتا 30 مىڭ ادام ناماز وقي الادى. ءبىز دە پراۆوسلاۆيە حريستياندارى سانى جاعىنان ەكىنشى ءدىني قاۋىمداستىق رەتىندە عيبادات ءۇيىن سالۋعا مۇمكىندىك الدىق» دەدى قازاقستاننىڭ ءميتروپوليتى الەكساندر.
