12 مامىر، 2019

شقو-داعى ءبىر اۋىلعا 397 ءفاشيستى ولتىرگەن باتىردىڭ ەسىمى بەرىلدى

1647 رەتكورسەتىلدى

ەكىنشى دۇنيە جۇزىلىك سوعىستا ەرەن ەرلىك كورسەتىپ، ەكى جىل مۇعدارىندا 397 ءفاشيستىڭ، ياعني 1 باتالون نەمىستىڭ كوزىن جويعان سۇرمەرگەن.


جەڭىس مەرەكەسى قارساڭىندا ەكىنشى دۇنيە جۇزىلىك سوعىستا ەرەن ەرلىك كورسەتىپ، ەكى جىل مۇعدارىندا 397 ءفاشيستىڭ، ياعني 1 باتالون نەمىستىڭ كوزىن جويعان سۇرمەرگەن تولەۋعالي ابدىبەكوۆكە تۋعان توپىراعىندا ەرەكشە قۇرمەت كورسەتىلىپ، جارما اۋدانىنىڭ قىزىل جۇلدىز اۋىلىنا باتىر ەسىمى بەرىلدى.

1916 جىلى جارما اۋدانىندا دۇنيەگە كەلىپ، 1942 جىلى ايگىلى 8-ءشى پانفيلوۆشىلار ديۆيزياسىنىڭ ساپىنا الىنىپ، 1944 جىلعى 23 اقپانعا دەيىن جاۋدى قوعاداي جاپىرىپ، مايدان دالاسىندا قازا تاپقان قازاقتىڭ قايسار ۇلى ومىردەن وتكەن سوڭ كەڭەس وداعىنىڭ باتىرى اتاعىنا ۇسىنىلعانىمەن، بەرىلمەگەنى بەلگىلى. سۇراپىل سوعىستا ەڭ مىقتى 15 مەرگەننىڭ تىزىمىنە ەنگەن جاۋجۇرەك جاۋىنگەردىڭ بۇل اتاققا قول جەتكىزە الماعانىنا اعاسى كەمەلبايدىڭ «حالىق جاۋى» رەتىندە ۇستالىپ كەتكەنىن انكەتاسىنا جاسىرماي جازعانى دا سەبەپ بولعانى انىق.

دەسەك تە ەرلىك ەل جادىنان وشپەيدى ەكەن، ەر ەسىمى كوڭىلدەردەن كوشپەيدى ەكەن. 8 مامىر كۇنى جارمالىقتار بۇعان دەيىن قىزىل جۇلدىز اتالىپ، جۋىقتا عانا سۇرمەرگەن ەسىمى بەرىلگەن اۋىلعا جينالىپ، باتىر رۋحىنا تاعزىم جاسادى. وسى كۇنى تولەۋعالي ابدىبەكوۆتىڭ جاقىن ۋاقىتتا بوي كوتەرەتىن ەسكەرتكىشىنىڭ ىرگەتاسى قالاندى. سالتاناتتى راسىمگە جارما اۋدانىنىڭ اكىمى احمەتقالي نۇرعوجين، الماتىداعى م.اۋەزوۆ اتىنداعى ادەبيەت جانە ونەر ينستيتۋتى ابايتانۋ جانە ادەبيەت تاريحى ءبولىمىنىڭ مەڭگەرۋشىسى، پروفەسسور سەرىكقازى قوراباي قاتىسىپ، قۇتتىقتاۋلارىن جەتكىزىپ، جىلى لەبىزدەرىن ءبىلدىردى. باتىردىڭ تۋىسى، اۋداندىق مادەنيەت ءۇيىنىڭ ديرەكتورى امانجول داۋىتوۆتىڭ ايتۋىنشا، «الماتى-وسكەمەن» جولىنىڭ بويىنداعى ەسكەرتكىش جارمالىق ازاماتتاردىڭ قارجىسىنا تۇرعىزىلماق. «باتىرعا قۇرمەت-قوشەمەت اۋەلى تۋعان توپىراعىنان باستالۋى كەرەك دەپ ۇيعارىپ، وسى يگى ءىستى قولعا الىپ جاتىرمىز. الداعى ۋاقىتتا سەمەي مەن وسكەمەندە، جالپى ەلىمىزدە سۇرمەرگەنگە لايىق قۇرمەت كورسەتىلەدى دەپ ويلايمىز. تولەۋعالي ابدىبەكوۆكە «حالىق قاھارمانى» اتاعىن بەرۋ كەرەك دەپ ۇسىنىس ايتىپ جۇرگەن جانداردىڭ قاتارى از ەمەس. بالكىم، جاقىن جىلدارى ەل كوكەيىندەگى بۇل تىلەك ورىندالادى دەپ ءۇمىت ەتەمىز»، – دەيدى ول.

  

ورايى كەلگەندە ايتا كەتەيىك، باتىردىڭ №2916 ءنومىرلى سنايپەر ۆينتوۆكاسى الماتىداعى مەملەكەتتىك مۋزەيدە ساقتاۋلى تۇر. سۇرمەرگەن قازا تاپقاننان كەيىن ونىڭ دوسى ءاشىرالى وسماناليەۆ وسى ۆينتوۆكامەن جاۋدىڭ 128 سولداتىن جەر قاپتىردى دەگەن دەرەك بار.

شىعىس قازاقستان وبلىسى،

جارما اۋدانى


سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار