سپورت • 09 مامىر، 2019

بەنكس تۋرالى نە بىلەمىز؟

735 رەت كورسەتىلدى

قازاقستاننىڭ ەڭ ايگىلى كاسىپقوي بوكسشىسى، بىرقاتار بەلدى نۇسقالار بويىنشا ورتا سالماقتاعى الەمنىڭ ەكس-چەمپيونى گەننادي گولوۆكين بارلىق اتاعىنان ايىرىلعاننان كەيىن ءوزىنىڭ جەكە باپكەرى ابەل سانچەسپەن قوشتاسقانى بەلگىلى. كوپ كەشىكپەي جەرلەسىمىز الداعى ۋاقىتتا دجوناتون بەنكستىڭ قول استىندا جاتتىعاتىنى جايىندا جالپاق جۇرتقا جاريا ەتتى. ال ءبىز GGG-ءنىڭ تاڭداۋى تۇسكەن سول مامان جايىندا نە بىلەمىز؟

دجوناتون مەن گەنا تۇيدەي قۇرداس. ەكەۋى دە 1982 جىلدىڭ تۋماسى. اقش-تىڭ ورەنى ميچيگان شتاتىنداعى دەترويت قالاسىندا دۇنيەگە كەلدى. سپورتتىق مانسابىن باستاعان تۇستا بىرەر جىل بويى اۋەسقوي رينگتە تەر توكتى. 2003 جىلعى ۇلتتىق چەمپيوناتتا 81 كيلو سالماق دارەجەسىندە كۇش سىناسىپ، ءۇشىنشى ورىنعا تابان تىرەدى. «التىن قولعاپ» دوداسىندا كۇمىس مەدالدى موينىنا ءىلدى. باسقا دا بىرقاتار ماڭىزدى تۋرنيرلەردە توپ جاردى. 

2004 جىلدىڭ 30 شىلدەسىندە بەنكس كاسىپقويلار اراسىندا باق سىناۋعا بەل بۋدى. العاشقى ءتورت جىل ارالىعىندا 20 رەت شارشى الاڭعا شىعىپ، بارلىعىندا جەڭىسكە جەتتى. ءوز باسەكەلەرىنىڭ دەنىن ول امەريكادا وتكىزسە، ءۇش مارتە گەرمانياعا ساپار شەكتى. 2008 جىلدىڭ 12 شىلدەسىندە تورە­شىلەردىڭ شەشىمى بويىنشا يتا­ليالىق ۆينچەنتسو روسسيتونى ۇتىپ، ءىۆو نۇسقاسى بويىنشا ءبىرىنشى اۋىر سالماقتىڭ التىن بەلبەۋىن يەلەندى. 2009 جىلدىڭ 27 اقپانىندا پولشانىڭ بەتكەۇستارى توماش ادا­مەك­كە ەسە جىبەرىپ، چەمپيوندىق اتاعى­نان ايىرىلدى. 

جالپى، دجوناتون بەنكس كاسىپقوي رينگتە بارلىعى 33 كەزدەسۋ وتكىزىپ، 29 رەت جەڭىسكە جەتتى. 19 قارسىلاسىن نوكاۋتقا جىبەردى. ءۇش باسەكەدە ۇتى­لىپ، تاعى ءبىر ايقاستا تەڭ ەسەپ ءتىر­كەلدى. جوعارىدا ەسىمى اتالعان توماش ادامەكتەن بولەك، بەنكس اسا اۋىر سال­ماقتا ايقاسقان اقش-تىڭ قوس مىقتىسى – سەت ميتچەلل مەن انتونيو تار­ۆەردەن عانا جەڭىلدى. ءار جىلدارى ول ەليزەو كاستيلو، زاك پەيدج، يمامۋ مەيفيلد، پول باتلين، ترەۆيس ۋوكەر، دجەيسون گاۆەرن، ساۋل مونتانا سىندى تانىمال بوكسشىلاردان باسىم ءتۇستى.

رەسمي تۇردە بەنكس 2014 جىلدىڭ اياعىندا بىلعارى قولعابىن شەگەگە ىلگەنىمەن، وعان دەيىن دە ول جاتتىق­تىرۋشىلىق قىزمەتپەن اينالىسقان ەدى. اتاعى اڭىزعا اينالعان ەمانۋەل ستيۋاردتىڭ جانىندا ءجۇرىپ كوپ نارسە ۇيرەندى. ال ايتۋلى باپكەردىڭ حۋليو سەزار چاۆەس، كەرميت سينترون، مايكل مۋرەر، توماس حيرن، ميگەل كوتتو، چەد دوۋسون، وسكار دە لا حويا، ەۆان­دەر حولليفيلد، لەننوكس ليۋيس، ۆلاديمير كليچكو، دجەرەمەن تەيلور، دجەيمس توني، يۋريوركيس گامباو، ادونيس ستيۆەنسون سىندى جۇلدىزدار باستاعان بارلىعى 41 الەم چەمپيونىن تاربيەلەگەنىن ايتساق تا جەتكىلىكتى.

دجوناتون بەنكستىڭ ءوزى بولسا، ءبىراز ۋاقىت ۋكراينانىڭ داڭقتى بوكس­­شىسى ۆلاديمير كليچكو مەن ياماي­كانىڭ جۇلدىزى ديلليان ۋايتتى باپتادى. قازىرگى كەزدە ول ايەلدەر اراسىنداعى الەمنىڭ ءابسوليۋتتى چەمپيو­نى، نورۆەگيانىڭ تۋى استىندا ونەر كورسەتىپ جۇرگەن كولۋمبيانىڭ تۋماسى سەسيليا برەكحۋستى جاتتىقتىرۋدا. 

– اۋەسقوي بوكستا جۇرگەن كەزىندە-اق گولوۆكين قاتتى ۇنايتىن. مەن ونىڭ فاناتى بولدىم. افينى وليم­پيا­داسىنداعى جەكپە-جەكتەرىن كور­گەندە، ونىڭ ناعىز دارىن يەسى ەكەنىنە انىق كوز جەتكىزدىم. ال تاياۋ­دا وسى ماسەلەگە بايلانىستى ماعان قوڭىراۋ شالىنعاندا، ەش ويلانباستان GGG-مەن جۇمىس ىستەۋگە ءوز كەلىسىمىمدى بەردىم. قازىر ءبىزدىڭ ماقساتىمىز بىرەۋ عانا – الەمدىك تاجدەردى گەنناديگە قايتارۋ. ويتكەنى ول سول چەمپيوندىق اتاقتاردىڭ بارلىعىن دا يەلەنۋگە لايىق. GGG مەن «كانەلونىڭ» تي-موبايل ارەناداعى جەكپە-جەكتەرىن كورگەندە، ەرەكشە اسەردە بولدىم. سەكسەنىنشى جىلدارى تورتكۇل دۇنيە جانكۇيەرلەرىن تامساندىرعان شۋگار رەي لەونارد پەن توماس ءحيرننىڭ ايقاس­تارى بىردەن ويعا ورالدى. ءدال سونداي ديناميكا، ءدال سونداي شاپ­شاڭدىق، ءدال سونداي «جان الىسىپ، جان بەرىسكەن» باسەكە. ەندى الداعى ۋاقىتتا گولوۆكيننىڭ قارسىلاس­تارىنىڭ بارلىعىن وڭدىرماي ساباپ، چەمپيوندىق تۇعىرعا قايتا قونعان ءساتىن تاعاتسىزدانا كۇتەمىز، – دەپ دجوناتون اقتارىلا سويلەدى. 

ەستەرىڭىزگە سالا كەتەيىك، گەننا­دي گولوۆكين 2018 جىلدىڭ 15 قىر­كۇيەگىندە مەكسيكالىق ساۋل ال­ۆا­رەستەن ۇپاي سانىمەن ۇتىلىپ، چەمپيوندىق اتاقتارىنان ايىرىلعان ەدى. سودان كەيىن ول ۇزاق ۋاقىت شارشى الاڭعا شىققان جوق. مىنە، ەندى وتانداسىمىز اراعا توعىز اي سالىپ، رينگكە قايتا ورالعالى جاتىر. اتاپ ايتساق، 8 ماۋسىمدا نيۋ-يوركتەگى ايگىلى «Madison Square Garden» ارەناسىندا GGG ءالى ەشكىمنەن جەڭىلمەگەن كانادالىق ستيۆ روللسپەن ايقاسادى.

سوڭعى جاڭالىقتار

الماتىدا تروللەيبۋس ورتەندى

وقيعا • 24 ماۋسىم، 2022

تۇركپا-نىڭ اتاۋى وزگەرەدى

پارلامەنت • 24 ماۋسىم، 2022

ۇقساس جاڭالىقتار