برونح دەمىكپەسى ەرەسەكتەردىڭ 5%, بالالاردىڭ 10% زارداپ شەگەتىن ەڭ كوپ تارالعان سوزىلمالى اۋرۋلاردىڭ ءبىرى بولىپ تابىلادى. دسۇ انىقتاماسى بويىنشا بۇكىل الەمدە 235 ملن.ادام دەمىكپەمەن اۋىرادى.دۇنيەجۇزىلىك دەمىكپەمەن كۇرەس كۇنى جىل سايىن مامىر ايىنىڭ ءبىرىنشى سەيسەنبىسىندە اتاپ وتىلەدى. 2019 جىلى ول 7 مامىرعا سايكەس كەلدى. بۇل كۇن دسۇ باستاماسى بويىنشا قۇرىلعان جانە دەمىكپەگە شالدىعۋدىڭ ءورشۋ پروبلەماسىنا جۇرتشىلىقتىڭ نازارىن اۋدارىپ, بۇل دەتكە دۋشار بولعاندارعا كومەك كورسەتۋ ساپاسىن ارتتىرىپ, ادامداردىڭ ودان حاباردار بولۋىنا باعىتتالعان. العاش رەت بۇكىلالەمدىك دەمىكپەگە قارسى كۇرەس كۇنى 1988 جىلى اتالىپ ءوتتى.
دەمىكپە گرەك تىلىنەن اۋدارعاندا «اۋىر تىنىس الۋ» دەگەندى بىلدىرەدى. بۇل تەرميننىڭ اۆتورى – گيپپوكرات. كوپتەگەن عاسىرلار بويى عالىمدار وسى اۋرۋدىڭ سەبەبىن زەرتتەۋگە تىرىستى جانە تەك حح عاسىردا دەمىكپەنىڭ سەبەبى, اللەرگيالىق رەاكتسيا, سىرتقى تىتىركەندىرگىشكە (حيميالىق, بيولوگيالىق, فيزيكالىق) جاۋاپ رەتىندە برونحتاردىڭ جەرگىلىكتى قابىنۋى بولىپ تابىلاتىنى انىقتالعان.
قازاقستاندا دەمىكپەمەن اۋىراتىن ادامداردىڭ سانى جىل سايىن ارتىپ كەلەدى. دەنساۋلىق ساقتاۋ مينيسترلىگىنىڭ سوڭعى مالىمەتتەرى بويىنشا, دەمىكپەگە شالدىعۋ 100 000 ادامعا شاققاندا 56,3 كەزدەسەدى. ال بۇل 10 مىڭعا جۋىق ناسقاس بار دەگەندى بىلدىرەدى.
كوپ جىلدان بەرى قوعامدىق دەنساۋلىق ساقتاۋ ماسەلەلەرىمەن اينالىساتىن «امان-ساۋلىق» قق پرەزيدەنتى, دارىگەر باقىت تۇمەنوۆا: «دەمىكپە اسا جۇقپالى اۋرۋلاردىڭ قاتارىنا جاتادى. بۇل تىنىس جولدارىنىڭ قابىنۋى مەن تارىلۋىنا ءتان وكپەنىڭ سوزىلمالى اۋرۋى. اۋرۋدىڭ جيىلىگى بويىنشا بۇل دەرت جۇرەك اۋرۋلارىنان, ينسۋلتتان, قاتەرلى ىسىكتەن جانە ديابەتتەن كەيىن بەسىنشى ورىندا تۇر», – دەيدى.
«برونح دەمىكپەسىن انىقتاۋ قيىن, سەبەبى ونى ءجىتى جانە سوزىلمالى برونحيتتەرمەن, وكپەنىڭ سوزىلمالى وبسترۋكتيۆتى اۋرۋىمەن, وكپەنىڭ قابىنۋىمەن, تۋبەركۋلەزبەن, باسقا دا رەسپيراتورلىق, نەۆرولوگيالىق نەمەسە قانتامىر اۋرۋلارىمەن وڭاي شاتاستىرۋعا بولادى. ءدال دياگنوزدى جەدەل دەم شىعارۋ كولەمىن ولشەۋ, برونحيالدى سەكرەت ءاناليزى, اللەرگولوگيالىق تەكسەرۋ جانە ت.ب. تالداۋلار نەگىزىندە قويۋعا بولادى. الايدا, برونح دەمىكپەسىن دياگنوستيكالاۋ مەن ەمدەۋدىڭ زاماناۋي ادىستەرىنىڭ كومەگىمەن باقىلاپ, دۇرىس ەم قولدانسا, تالاي ناۋقاس اۋرۋ بەلگىلەرىنەن ارىلۋى مۇمكىن», – دەيدى ساراپشى.
الماتى
