اتالعان قاۋلى جوباسىن تانىستىرعان ورتالىق سايلاۋ كوميسسياسىنىڭ حاتشىسى ءسابيلا مۇستافينانىڭ ايتۋىنشا, پرەزيدەنتتىككە كانديدات امانگەلدى تاسپيحوۆ الماتى مەن شىمكەنتتەن باسقا ەلىمىزدىڭ 15 وڭىرىنەن 122 770 ازاماتتىڭ قولىن جيناعان. تەكسەرۋ ناتيجەسىندە 119 577 راستالعان قول انىقتالدى.
سونىمەن قاتار ا.تاسپيحوۆ كانديدات رەتىندە تىركەلۋ ءۇشىن ورتالىق سايلاۋ كوميسسياسىنا ءوزىنىڭ كىرىستەرى مەن مۇلكi جونىندە دەكلاراتسيا, تىركەۋگە كەدەرگى كەلتىرەتىن اۋرۋلاردىڭ جوقتىعى تۋرالى مەديتسينالىق قورىتىندى تاپسىرعان. وسىعان قاراي وسك قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا امانگەلدى تاسپيحوۆتى قازاقستان رەسپۋبليكاسى پرەزيدەنتتىگىنە كانديدات رەتىندە تىركەۋ تۋرالى قاۋلى قابىلدادى.
«2019 جىلعى 9 ماۋسىمعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا امانگەلدى تاسپيحوۆ قازاقستان رەسپۋبليكاسى پرەزيدەنتتىگىنە كانديدات رەتىندە تىركەلسىن; پرەزيدەنتتىككە كانديدات امانگەلدى تاسپيحوۆقا ءتيىستى كۋالىك بەرىلسىن; پرەزيدەنتتىككە كانديدات امانگەلدى تاسپيحوۆتىڭ «حالىقتىق جيناق بانكى» اكتسيونەرلىك قوعامىنا ارنايى ۋاقىتشا شوت اشۋ ءۇشىن تىركەلۋى تۋرالى مالىمەتتەر بەرىلسىن; بۇقارالىق اقپارات قۇرالدارىندا قازاقستان رەسپۋبليكاسى پرەزيدەنتتىگىنە كانديدات امانگەلدى تاسپيحوۆتىڭ تىركەلگەنى تۋرالى حابارلاما جاريالانسىن», دەلىنگەن وسك قاۋلىسىندا.
بۇدان ءارى ورتالىق سايلاۋ كوميسسياسىنىڭ مۇشەلەرى قاۋلى جوباسىنا داۋىس بەرىپ, قۇجات ءبىراۋىزدان قابىلداندى. وسىدان كەيىن وسك توراعاسى بەرىك يماشەۆ پرەزيدەنتتىككە كانديدات امانگەلدى تاسپيحوۆقا ءتيىستى كۋالىكتى تابىس ەتتى.
