«استانا بالەت» كوكتەمنىڭ باس پرەمەراسىن ۇسىنادى

حورەوگراف رايموندو رەبەك («وتكەنگە ساياحات» سپەكتاكلىنىڭ اۆتورى) وتكەن شاق پەن وسى شاق جايلى وي-تولعامدارىندا ءحىح عاسىرداعى فريدەريك شوپەننىڭ رومانتيكالىق سارىنىن قازىرگى زاماننىڭ كومپوزيتورلارى ەتسيو بوسسو، فيليپپ گلاسس پەن فازىل ساي تۋىندىلارىمەن ۇيلەستىردى. شىنايى جانە قيال الەمى، دۇنيەتانىمى مەن ءستيلى ارقيلى مۋزىكا ءبىر ارناعا توعىسىپ، وسى ەكى كەشتە بالەت ساحناسىندا وركەن جايادى.

بالەتكە مۋزىكا قاجەت. ءبيشىنىڭ مىڭ بۇرالعان دەنەسى كوركەمدىك قۇرالعا اينالادى. چايكوۆسكي مەن پروكوفەۆ سىندى كومپوزيتورلار بالەتكە ارناپ مۋزىكا جازعان. ۋاقىت وتە حورەوگرافتار ۇلى تۋىندىلاردى وي ەلەگىنەن وتكىزىپ، ونىڭ بەينەلىك كورىنىسىن سپەكتاكلدەرىنە ارقاۋ ەتكەنى ايان.  

ەكى عاسىر بۇرىن بالەت رەفورماتورى، فرانتسۋز جان جورج نوۆەر بىلاي جازعان-دى: «جاقسى جازىلعان مۋزىكا سويلەۋ كەرەك، بەينەلەۋ كەرەك. اۋەندى بەينەلەگەن بي، مۋزىكانىڭ اۋەزىن قايتالاعان جاڭعىرىق». وركەستر ىشەكتى اسپاپتاردى ويناتىپ ەدى، اياعىنىڭ ۇشىنا تۇرعان بالەرينا بويىن كەرنەگەن ۇرەيدى ءبىلدىردى. فلەيتا دىبىسى شىعىپ ەدى، كەيىپكەردىڭ كۇمانى سەيىلىپ، ول جەڭىل عانا قيمىلدارىمەن قۋانىش سەزىمىن تانىتتى.

ريكاردو امارانتەنىڭ «قيالعا بويلاۋ» سپەكتاكلىنە توقتالار بولساق، حورەوگراف بۇل تۋىندىسىن سەرگەي راحمانينوۆتىڭ دارىنىنا، ونىڭ تاعدىرى مەن عالامات مۋزىكاسىنا قۇرمەتىن ءبىلدىرۋ ءۇشىن شىعارعان. ال اتالمىش سپەكتاكلدىڭ پرەمەراسى 2017 جىلى وتكەن بولاتىن. «فورتەپيانو مەن وركەسترگە ارنالعان №2 كونتسەرت» ءتاندى كەرنەگەن ۇرەيدەن ارىلىپ، تەرىس تۇسىنىك پەن ۋايىمنان بويىڭىزدى الشاقتاتىپ، ىشكى قۋاتىڭىز پەن پاراساتىڭىزدى وياتقان شاقتا عانا ساف التىنداي بيىك ونەر تۋىندىسىن شىعارۋ مۇمكىن ەكەنىن تاعى دا ءتانتى بولاسىز.