تۇرعىن ءۇي قۇرىلىس جيناق بانكى اسكەريلەر ءۇشىن جاڭارتىلعان باعدارلامانى ىسكە قوستى

ەندى اسكەري قىزمەتكەرلەر مەن ارنايى مەملەكەتتىك ورگان قىزمەتكەرلەرىنە تۇرعىن ءۇي قۇرىلىس جيناق بانكى («بايتەرەك» حولدينگىنىڭ ەنشىلەس ۇيىمى) ارقىلى باسپانا ساتىپ الۋ ءۇشىن كونكۋرسقا قاتىسىپ، ونىڭ قورتىندىسىن كۇتۋدىڭ قاجەتى جوق. تۇرعىن ءۇي قۇرىلىس جيناق بانكى «اسكەري ءونىمنىڭ» شارتتارىن جەڭىلدەتتى.

سونداي-اق، تۇرعىن ءۇيدى تاڭداۋ بارىسىندا ەشقانداي شەكتەۋلەر قويىلمايدى. نەسيەنى جاڭا ۇيدەن دايىن پاتەر ساتىپ الۋعا، ۇلەستىك قۇرىلىسقا قاتىسۋعا نەمەسە قايتالاما نارىقتان باسپانا ساتىپ الۋ ءۇشىن جۇمساۋعا بولادى. تۇرعىن ءۇيدى ساتىپ الۋ كەزىندە زاەم سوماسىنا پاتەردىڭ ىشكى جوندەۋ جۇمىستارىن جۇرگىزۋگە جۇمسالاتىن شىعىنداردى قوسۋعا بولادى.

جاڭا تۇرعىن ءۇي باعدارلاماسىنا جەكە پاتەرى بار، بىراق ءوز مەكەمەسىندە تۇرعىن ۇيگە مۇقتاج تۇلعا رەتىندە تانىلعان اسكەري قىزمەتكەرلەر دە قاتىسا الادى.

– جاڭارتىلعان شارتتارعا ساي، 16 ميلليون تەڭگەنى قۇرايتىن العاشقى نەسيە تالدىقورعاندىق اسكەري قىزمەتكەرگە بەرىلدى. اتا-اناسىمەن تۇرعان ول ەندى ءوز وتباسىمەن بىرگە جاڭا ۇيدەگى 4 بولمەلى كەڭ پاتەرگە كوشەتىن بولادى. ءبىزدىڭ بولجامعا سايكەس، وسى جىلى قونىس تويىن جالپى 4 000 اسكەري قىزمەتكەر اتاپ وتپەك. ولارعا نەسيە بەرۋ ماقساتىندا بانك تاراپىنان 59 ملرد تەڭگە ءبولىندى، - دەيدى تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆا.

«اسكەري ءونىم» بويىنشا نەسيە سوماسى ەلىمىزدىڭ ايماقتارى مەن وتباسىنىڭ قۇرامىنا تاۋەلدى تۇرعىن ءۇي تولەمدەرىنىڭ مولشەرى بويىنشا ەسەپتەلىنەدى. ياعني، وتباسى قۇرامى نەعۇرلىم ۇلكەن بولسا، تۇرعىن ءۇي دە سوعۇرلىم ۇلكەن بولادى. سوندىقتان، ءالى دە ءوز وتباسىن قۇرماعان اسكەري قىزمەتكەرلەر مەن بالالى بولۋدى جوسپارلاعان وتباسىلاردىڭ پاتەر ساتىپ الۋعا اسىقپاعاندارى ءجون. ءدال قازىرگى كەزدە ولار ءۇشىن تۇرعىن ءۇي قۇرىلىس جيناق بانكىندەگى شوتتا تۇرعىن ءۇي تولەمدەرىن جيناپ، الداعى ۋاقىتتا جىلدىق 3،5-5% مولشەرلەمەمەن زاەم الۋ اسا تيىمدىرەك.

ەستەرىڭىزگە سالا كەتسەك، وتكەن جىلى اسكەري قىزمەتكەرلەردىڭ تۇرعىن ءۇي تولەمدەرىن پايدالانۋ مەحانيزمى وزگەردى. ياعني، ولار ەندى وسى تولەمدەردى تەك جالعا العان بىرەۋدىڭ پاتەرىنە تولەمەي، ءوزىنىڭ جەكە باسپاناسىن ساتىپ الۋعا جۇمساي الادى. اسكەري قىزمەتكەرلەرگە قولداۋ كورسەتۋ ماقساتىندا تۇرعىن ءۇي قۇرىلىس جيناق بانكى قاراجات ءبولىپ، ولار ءۇشىن 2025 جىلعا دەيىنگى جەكە تۇرعىن ءۇي باعدارلاماسىن ازىرلەپ شىعاردى. وتكەن جىلدىڭ قىركۇيەك ايىنان باستاپ «اسكەري ءونىم» باعدارلاماسىنا 2 500 ادام قاتىستى.تاعى 70 مىڭ اسكەري تۇرعىن ءۇي قۇرىلىس جيناق بانكىندە شوت اشىپ، وزدەرىنىڭ تۇرعىن ءۇي تولەمدەرى ەسەبىنەن قاراجات جيناقتاۋدا.

تۇرعىن ءۇي قۇرىلىس جيناق بانكى – ارنايى سالىمدارى ەرەكشە مارتەبە مەن قول سۇعىلماۋشىلىق كەپىلىنە يە جالعىز بانك. اسكەري قىزمەتكەرلەردىڭ جيناقتارى بيۋدجەت ەسەبىنە الىنبايدى، اتالعان شوت يەسىنىڭ باسقا مىندەتتەمەلەرى بويىنشا تىيىم سالىنبايدى ءارى ەكىنشى دەڭگەيلى بانك قانداي دا ءبىر بەرىلگەن نەسيەلەر بويىنشا ۋاقىتىلى تولەنبەگەن بەرەشەكتەر ءۇشىن تولەم تالابىن قويا المايدى.

ال وتكەن جىلى Askeri.baspana.kz پورتالى ارقىلى باعدارلاماعا قاتىسۋ ءۇشىن ءوتىنىش بەرگەندەرمەن باعدارلاماعا قاتىسۋشىلار پۋلىنا ەنگىزىلگەن اسكەري قىزمەتكەرلەر ءوتىنىمدى بۇرىنعى شارتتار بويىنشا، ياعني، 2019 جىلدىڭ 30 قىركۇيەگىنە دەيىن بەرۋلەرىنە بولادى.