مەملەكەت باسشىسى جەتىسۋ جەرىنىڭ تاريحي تامىرى تەرەڭ ەكەنىن اتاپ ءوتىپ, وبلىستىڭ قايتا جاڭعىرعان ۇلى جىبەك جولىنىڭ بويىندا ءورنالاسۋى وڭىردى دامىتۋ ءۇشىن جاڭا مۇمكىندىكتەرگە جول اشاتىنىن ايتتى.
– بۇگىندە جەتىسۋ ايماعى جوعارى قارقىنمەن دامىپ كەلەدى جانە اۋىل شارۋاشىلىعى ءوندىرىسى كولەمى جونىنەن كوش باسىندا. وڭىردەگى وڭدەۋ ونەركاسىبىنىڭ ۇلەسى ەلىمىزدەگى ەڭ جوعارى – 86 پايىز. الماتى وبلىسى ادام كاپيتالى جونىنەن قازاقستان بويىنشا الدىڭعى قاتاردا. ولار – ەلىمىزدىڭ دامۋىنا ءوز ۇلەسىن قوسىپ جاتقان وزدەرىڭىز سياقتى جاس ماماندار, كاسىپكەرلەر, اقىن-جازۋشىلار مەن ەڭبەك ۇجىمدارىنىڭ وكىلدەرى, – دەدى قاسىم-جومارت توقاەۆ.
قازاقستان پرەزيدەنتى جەدەل شەشىم قابىلداۋدى قاجەت ەتەتىن ماسەلەلەرگە نازار اۋداردى.
– باسقا وڭىرلەردەگى سياقتى الماتى وبلىسىندا بۇرىنعىشا اۋىزسۋمەن قامتاماسىز ەتۋ پروبلەماسى بار. اكىمدىك ەلدى مەكەندەردىڭ پەرسپەكتيۆتى دامۋىن ەسەپكە الىپ, سۋمەن قامتۋ جۇيەسىنىڭ قۇرىلىسى مەن قايتا جوندەۋ جونىندە كەستە جاساپ, جۇمىستاردى جۇرگىزۋى قاجەت, – دەدى مەملەكەت باسشىسى.
قاسىم-جومارت توقاەۆ اپاتتى جاعدايداعى جانە ءۇش اۋىسىمدا وقىتاتىن مەكتەپتەردىڭ پروبلەمالارىنا توقتالىپ, ۇكىمەتكە جانە وبلىس اكىمدىگىنە 2021 جىلعا دەيىن مەكتەپ قۇرىلىسىنا قاتىستى ماسەلەنى شەشۋدى تاپسىردى.
– 14 مەكتەپتىڭ قۇرىلىسىنا 2018-2019 جىلدارى رەسپۋبليكالىق بيۋدجەتتەن 15,4 ميلليارد تەڭگە ءبولىندى. بىراق, ايماق تاعى دا 20 مەكتەپكە ءزارۋ بولىپ وتىر. بۇل ءۇشىن 2020-2021 جىلدارى 29 ميلليارد تەڭگە ءبولۋ كەرەك. بۇل مەنىڭ تاپسىرمام, – دەدى قازاقستان پرەزيدەنتى.
مەملەكەت باسشىسى وبلىستا دارىگەرلەردىڭ جەتىسپەيتىندىگىن اتاپ ءوتىپ, مەديتسينالىق قىزمەت كورسەتۋ ساپاسىنىڭ تومەندەگەنىن ايتتى. سونىمەن قاتار, جاس مامانداردى قالادان اۋىلعا كوشىرۋ ءۇشىن ىنتالاندىرىپ, «ديپلوممەن اۋىلعا» باعدارلاماسىنىڭ اياسىندا جاس كادرلاردى جۇمىسقا قابىلداۋ ءۇشىن جاعداي جاساۋ كەرەكتىگىن ايتتى.
سونىمەن قاتار, قاسىم-جومارت توقاەۆ الەۋمەتتىك جاعدايى تومەن تۇرعىنداردى باسپانامەن قامتۋ ماسەلەلەرىنە ەرەكشە نازار اۋداردى.
– باسپانا كەزەگىندە ءالى كۇنگە دەيىن 41 مىڭ ادام تۇر. ونىڭ 11 مىڭى – ءبىرىنشى كەزەكتە ماسەلەلەرى شەشىلۋى ءتيىس تۇرمىسى تومەن كوپبالالى وتباسىلار. جاس ماماندار مەن جاس وتباسىلار ءۇشىن تۇرعىن ءۇي قۇرىلىسىن بەلسەندى تۇردە جۇرگىزۋ قاجەت. اكىمدىك جاس مامانداردى باسپانامەن قامتۋ ءۇشىن وزگە وڭىرلەردىڭ ۇلگىسىمەن «7-20-25» باعدارلاماسى بويىنشا العاشقى جارنانى جاباتىن تۇرعىن ءۇي سەرتيفيكاتتارىن بەرۋ تەتىگىن ىسكە قوسۋى قاجەت, – دەدى قازاقستان پرەزيدەنتى.
مەملەكەت باسشىسى اۋىل شارۋاشىلىعىنا قاجەتتى جەرلەردى ماقساتتى پايدالانۋ, سۋارمالى جۇيەلەردى مودەرنيزاتسيالاۋ مەن يرريگاتسيالاردى قالپىنا كەلتىرۋ سياقتى ماسەلەلەرگە توقتالدى. سونىمەن قاتار, جەر ۋچاسكەلەرىن ءبولۋ جانە ولاردى ءتيىمدى پايدالانۋعا باقىلاۋدى قامتاماسىز ەتۋ ىسىندە وبلىستىڭ اگروونەركاسىپ كەشەنىن قولداۋ ءۇشىن كولىكتىك قىزمەتتەرگە تاريفتەردى تومەندەتۋ كەرەكتىگىن اتاپ ءوتتى.
– تاعى ءبىر ماڭىزدى ماسەلە – جەتىسۋدىڭ تۋريستىك يندۋسترياسىن دامىتۋ. ءوڭىر ەلىمىز ءۇشىن تۋريزم ورتالىعى رەتىندە كەڭىنەن تانىلدى. بۇل جەردە تۋريستەردى تارتاتىن نەگىزگى ورىن – ەمدىك قاسيەتىمەن اتى شىققان الاكول كولى. وتكەن جىلى عانا 2 ميلليون ادام دەمالىپ, تۋريستەر سانى 20 پايىزعا وسكەن. الايدا قىزمەت كورسەتۋ دەڭگەيى, كولىكتىك, قوناق ءۇي ينفراقۇرىلىمى سىن كوتەرمەيدى. ۇكىمەتكە اكىمدىكپەن بىرلەسىپ, شيپاجاي ايماعىنىڭ ينفراقۇرىلىمىن جاقسارتۋ ءۇشىن كەشەندى شارالار قابىلداۋدى تاپسىرامىن, – قاسىم-جومارت توقاەۆ.
قازاقستان پرەزيدەنتى ايماقتىڭ كولىك-لوگيستيكالىق الەۋەتىنە ەرەكشە توقتالىپ, جەرگىلىكتى جولداردىڭ ساپاسىن ارتتىرۋدىڭ ماڭىزدى ەكەنىن اتاپ ءوتتى.
– الماتى وبلىسى – ستراتەگيالىق ايماق. ەلىمىزدىڭ ماڭىزدى كولىك تورابى مەن لوگيستيكالىق ورتالىعى بولۋ ءۇشىن وبلىستىڭ الەۋەتى جەتكىلىكتى. «باتىس ەۋروپا – باتىس قىتاي» اۆتوموبيل ماگيسترالى قۇرىلىسىنىڭ اياقتالۋىنا بايلانىستى الماتى وبلىسى ازيا مەن ەۋروپانىڭ اراسىن جالعايتىن كولىك قوزعالىسى ءۇشىن قاقپاعا اينالدى. سونىمەن قاتار, وبلىس جولدارىنىڭ 22 پايىزى سىن كوتەرمەيتىن بولعاندىقتان, بۇل وزەكتى ماسەلە بولىپ وتىر. وبلىس اكىمىنە اتالعان ماسەلەمەن جۇيەلى تۇردە اينالىسىپ, توزىعى جەتكەن جولداردى بىرتىندەپ قالپىنا كەلتىرۋدىڭ 2025 جىلعا دەيىنگى جوسپارىن ازىرلەۋدى تاپسىرامىن, – دەدى مەملەكەت باسشىسى.
قاسىم-جومارت توقاەۆ كەزدەسۋ سوڭىندا مەملەكەتتىك ناگرادالار ەڭبەك ادامدارىنا, اسىرەسە عالىمدار, قۇرىلىسشىلار, قاراپايىم جۇمىسشىلارعا بەرىلۋى كەرەك ەكەنىن اتاپ ءوتتى.
قازاقستاننىڭ الەۋمەتتىك-ەكونوميكالىق جانە مادەني دامۋىنا ۇلەس قوسقانى ءۇشىن وبلىستىق ارداگەرلەر كەڭەسىنىڭ توراعاسى ە.كەلەمسەيىتتى, «حيلنيچەنكو ي ك» باسقارما باسشىسى ۆ.حيلنيچەنكونى, «الماتى كوپسالالى اۋرۋحاناسىنىڭ» ءبولىم مەڭگەرۋشىسى ە.كەنجەبەكوۆتى جانە №40 ورتا مەكتەبى ديرەكتورىنىڭ ورىنباسارى ا.يبرايموۆانى العىس حاتتارمەن ماراپاتتادى.
