ۇيىمداستىرۋشىلار زاعيپتاردىڭ قاتىسۋىمەن ۋيليام شەكسپيردىڭ «رومەو مەن دجۋلەتتا» تراگەدياسىن ساحنالادى. قويىلىم ۇلى دراماتۋرگتىڭ 455 جىلدىعىنا ارنالدى. وسىنداي تەاترلاندىرىلعان قويىلىم وڭىردە العاش رەت قويىلعانىنا قاراماستان, تۇساۋى ءساتتى كەسىلدى. باسقا سالدى, مەن كوندىم دەپ تاعدىردىڭ جازۋىنا قول قۋسىرىپ وتىرماي, كوزدىڭ ەمەس, كوڭىلدىڭ اشىق بولۋى الدەقايدا ماڭىزدى ەكەندىگىن درامالىق شىعارما ارقىلى ۇعىندىرا بىلگەن اۋەسقوي ارتىستەرگە دەگەن قۇرمەت شەكسىز بولدى.
«سپەكتاكلدى قويۋ يدەياسى كوڭىلىمىزدەن شىعىپ, قاتىسۋعا بىردەن تىلەك ءبىلدىردىم. مەنىڭ ءرولىم اسا قيىن بولماسا دا, ازداپ قوبالجىعانىم راس. ءبىز وسى قويىلىم ارقىلى اڭىزعا اينالعان ماحابباتتىڭ قۇدىرەتتىلىگىن, شىنايىلىعىن سۋرەتتەۋگە تىرىستىق», دەيدى لەدي كاپۋلەتتيدىڭ بەينەسىن سومداعان جۇپار ابراەۆا.
كىتاپحانا قىزمەتكەرلەرىنىڭ ايتۋىنشا كەيىپكەرلەردىڭ سوزدەرى اۋديوجازبا ارقىلى جىبەرىلىپ, وتە ىڭعايلى ادىستەر تاڭداپ الىنعان كورىنەدى. كىتاپحانا مەڭگەرۋشىسى ارسەن نۇعىمانوۆ قويىلىمعا 1 اي ۋاقىت دايىندالعاندارىن , ۋ. شەكسپيردىڭ تۋعان كۇنىنە ورايلاستىرىلعانىن, الداعى ۋاقىتتا تەاترلاندىرىلعانا تۋىندىلار سانىن كوبەيتۋدى جوسپارلاپ وتىرعاندارىن ايتادى. بۇگىندە زاعيپ جانە ناشار كورەتىن ازاماتتار كىتاپحاناسىندا بىر مىڭنان استام وقىرمان بار.
سولتۇستىك قازاقستان وبلىسى
