ايماقتار • 01 مامىر، 2019

اق جايىقتىق ارۋ انالار جاستارمەن كەزدەستى

814 رەت كورسەتىلدى

«Nur Otan» پارتياسى جانىنداعى «جاس وتان» جاستار قاناتى باتىس قازاقستان وبلىستىق فيليالى «ۇرپاقتار ساباقتاستىعى» جوباسى اياسىندا ەڭبەك ارداگەرى، كوپ بالالى انا، «ارۋ انالار» ءانسامبلىنىڭ جەتەكشىسى كلارا سارجانوۆامەن كەزدەستى.

- ءبىزدىڭ «ۇرپاقتار ساباقتاستىعى» اتتى جوبامىز 2013 جىلى باستالدى. ونىڭ باستى ماقساتى – اعا بۋىن ۇرپاق وكىلدەرىمەن، ارداگەرلەرمەن كەزدەسىپ، ولاردىڭ ءتالىم-تاربيەسىن الۋ، تاجىريبەسىن ەستىپ، وسيەتىن تىڭداۋ، ونى ومىردە پايدالانۋ بولاتىن. تۇڭعىش پرەزيدەنتىمىز «بولاشاققا باعدار: رۋحاني جاڭعىرۋ» ماقالاسىندا جاستارعا پاتريوتتىق تاربيە بەرۋ، سالت-ءداستۇرىمىزدى، مادەنيەتىمىز بەن بىرەگەي ۇلتتىق كودىمىزدى ساقتاۋ سياقتى ماڭىزدى باسىمدىقتارعا ەرەكشە توقتالدى عوي. استانادا ەلباسىنىڭ قاتىسۋىمەن وتكەن جاستار فورۋمىندا وسكەلەڭ ۇرپاقتى ارداگەرلەردى ارداقتاۋعا، قادىرلەي بىلۋگە تاربيەلەۋ قاجەت ەكەندىگىن اتاپ ءوتتى. سوندىقتان وڭىرىمىزدەگى ەڭبەك ارداگەرى مەن بەلسەندى ستۋدەنت جاستارىمىزدىڭ كەزدەسۋىن تۇراقتى وتكىزىپ كەلەمىز. بۇگىنگى شاراعا قوناق رەتىندە پاتريوتتىققا، بىرلىككە ۇندەيتىن اندەرىن اۋەلەتىپ جۇرگەن كوپ ۇلتتى «ارۋ انالار» ءانسامبلى مۇشەلەرىن تاڭداپ الدىق، - دەيدى جاس وتان» جاستار قاناتى باتىس قازاقستان وبلىستىق فيليالىنىڭ جەتەكشىسى نۇرعالي جولداسقاليەۆ.

قۇرامىندا 15 مۇشەسى بار «ارۋ انالار» ءانسامبلىنىڭ ەڭ ەگدە ءانشىسى 92 جاستا ەكەن. انسامبل جەتەكشىسى كلارا باقتىعاليقىزىنىڭ ءوزى دە 83 جاستا. رەسپۋبليكالىق ارداگەرلەر كەڭەسىنىڭ مۇشەسى كلارا سارجانوۆا ءالى كۇنگە دەيىن وڭىردەگى قوعامدىق ىستەردىڭ بەل ورتاسىندا جۇرەدى. وسى كەزدەسۋدە دە جيىلعان جاستارعا ءوزىنىڭ ءومىر تاجىريبەسى، باسىنان كەشكەن وقيعالارى تۋرالى ايتىپ، اقىل-كەڭەسىمەن ءبولىستى.

- مەن قازىرگى جاستارعا، اسىرەسە قىز بالالارعا ءبىلىمدى بولۋعا ۇمتىلىڭدار! - دەر ەدىم. وقىعان قىزدىڭ، ءبىلىمدى ادامنىڭ قاشان دا ءباسى بيىك بولادى. سونىمەن بىرگە، ۇلتتىق تاربيەنى، حالقىمىزدىڭ سالت-ءداستۇرىن دە ۇمىتپاۋ قاجەت، - دەگەن كلارا باقتىعاليقىزى. ءوز ومىرىنەن ناقتى مىسالدار كەلتىرىپ، اڭگىمەسىن ازىلمەن ارلەپ سويلەيتىن اجەنىڭ لەبىزى ستۋدەنت جاستارعا قاتتى ۇنادى.

«ارۋ انالار» ءانسامبلىن كلارا سارجانوۆا «كوپ بالالى، كوپ ۇلتتى انالار توبى» دەپ اتايدى. شىنىندا دا توپ قۇرامىندا قازاقتان بولەك ۋكراين، گرەك، تاتار، ورىس ۇلتىنىڭ وكىلدەرى جينالعان. «حالىق ءانسامبلى» اتاعىن جەڭىپ العان توپتىڭ رەپەرتۋارىندا وتان، تۋعان جەر، وتباسى تاقىرىبىنداعى پاتريوتتىق اندەر وتە كوپ ەكەن.  

- قازاق اندەرى وتە اۋەزدى، جانىما سونداي جاقىن. ءوزىم ءومىر بويى قاراپايىم قىزمەت ەتتىم. «ارۋ انالار» توبىنا قوسىلۋىم قىزىق بولدى. جەتەكشىمىز كلارا باقتىعاليقىزىمەن ماعان «التىن القا» بەلگىسىن تابىس ەتكەن سالتاناتتى جيىندا العاش تانىستىم. مەنى كورگەن بويدا-اق «گاليا، ءسىز ءان ايتا بىلەسىز بە؟ ءبىزدىڭ توپقا قوسىلىڭىز!» دەگەن ۇسىنىس ايتتى. ارينە، بىردەن كەلىستىم. سول كۇننەن بەرى مەنىڭ ەكىنشى ءومىرىم باستالعانداي بولدى، - دەيدى 7 بالانىڭ اناسى، 15 نەمەرە، 1 شوبەرە ءسۇيىپ وتىرعان گالينا زەنچۋرينا. ول «ورالىم – دوستىق قالاسى» ءانىن ەرەكشە شابىتپەن شىرقادى.

توپتىڭ تاعى ءبىر مۇشەسى، «التىن القالى» مانشۇك ەرمۇقانوۆا مانشۇك مامەتوۆا اتىنداعى قىزىلوردا قىزدار ۋچيليششەسىندە ءمادينا ەراليەۆامەن بىرگە وقىپتى. جاستىق شاعىن، ستۋدەنتتىك ءومىرىن قىزىقتى بايانداپ بەرگەن مانشۇك اپاي دا عيبراتتى اڭگىمەسىمەن جاستاردى باۋراپ الدى. «ماماندىق تاڭداۋدا جانە جار تاڭداۋدا جاڭىلماڭىزدار، جاستار! ەڭبەكتەن قاشپاڭىزدار، ۇلكەندى سىيلاڭىزدار! – دەيدى ءانشى اجە.

«ارۋ انالار» ءانسامبلىنىڭ كوركەمدىك جەتەكشىسى، قازاقستان رەسپۋبليكاسى مادەنيەت قايراتكەرى ادىلبەك سۇلەيمەنوۆ – ەل اراسىندا 40 جىلدان اسا شىرقالىپ كەلە جاتقان بەلگىلى «اكە تۋرالى ءاننىڭ» اۆتورى. «ارۋ انالار» ءانسامبلىنىڭ ەرەكشە ونەرىمەن كوپشىلىك ىقىلاسىنا بولەنىپ جۇرگەنى دە وسىنداي كاسىبي جوعارى دەڭگەيىنەن دەر ەدىك. «جاس وتان» كوۆوركينگ ورتالىعىندا وتكەن كەزدەسۋدە دە اسەرلى اندەر شىرقالىپ، كەشتىڭ كوركىن كىرگىزدى. اسىرەسە ستۋدەنت قىزدارعا بۇل كەزدەسۋدىڭ ۇناعانى سونداي، ءانشى اجەلەرمەن تاعى ءبىر كەزدەسىپ، قىز تاربيەسى، وتباسى قۇندىلىقتارى تاقىرىبىنا وڭاشا اڭگىمە جاساۋعا ۋاعدالاسىپ تاراستى. 


باتىس قازاقستان

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

ۇقساس جاڭالىقتار