اقتاۋدا – كۇز…
بەيسەنبى, 31 قاڭتار 2013 7:29
تابيعاتتىڭ شەبەرلىگىنە ءشۇبا جوق. ەلىمىزدىڭ سولتۇستىك, وڭتۇستىك بولىكتەرى قاقاعان قىس قۇرساۋىندا قالىپ, داۋىلمەن جاعالاسىپ, ەندى ءبىرى ەرىگەن قار سۋىن قونىشىنان كەشىپ جۇرگەندە… اقتاۋ سىلبىر جاۋىننان جەلەك جامىلعانداي بولىپ تۇر.
بەيسەنبى, 31 قاڭتار 2013 7:29
تابيعاتتىڭ شەبەرلىگىنە ءشۇبا جوق. ەلىمىزدىڭ سولتۇستىك, وڭتۇستىك بولىكتەرى قاقاعان قىس قۇرساۋىندا قالىپ, داۋىلمەن جاعالاسىپ, ەندى ءبىرى ەرىگەن قار سۋىن قونىشىنان كەشىپ جۇرگەندە… اقتاۋ سىلبىر جاۋىننان جەلەك جامىلعانداي بولىپ تۇر.
«قىلىشىن سۇيرەتىپ» قىس كەلگەلى قاشان؟.. جاڭا جىلدى قارسىز قارسى العان اقتاۋلىقتار بيىل اق ۇلپانى ءبىر-اق رەت كوردى. بىراق و دا كوپ بايىرقاعان جوق, ءبىر-ەكى كۇننەن سوڭ سۋعا اينالىپ, ساي-سالانى قۋالاپ اعا جونەلدى.
قىستىڭ كەلگەنىن تەك كوك تەڭىز بەتىندە قالقي ءجۇزىپ, كوڭىلى الدەنەگە قوبالجىعانداي نەمەسە قار جاۋماعانعا قوڭىلتاقسىعانداي جاعاعا جاقىنداۋى سيرەك اپپاق اققۋلارعا قاراپ مويىندايسىڭ. ارا-تۇرا بەت شىمشىر اياز بولسا, قىمتانىپ الاتىن اقتاۋلىقتار جەڭىل كيىممەن-اق قىستى وتكەرۋدە.
ايتسە دە, ءار نارسەنىڭ ءوز ۋاقىتى بار. مەزگىلىندە قار جاۋعانعا نە جەتسىن؟ باسقانى ايتپاعاندا, ايازى قاتتى اقتوبەمەن شەكتەسەتىن بەينەۋ بەتىنىڭ اۋا رايى اقتاۋلىقتار ءۇشىن تاڭ. جاسىراتىنى جوق, قارىم-قاتىناسقا, شارۋاشىلىققا قيىن ەكەندىگىن بىلە تۇرا, كەيدە اق تۇتەك ىشىندە ارپالىسقان سولتۇستىكتەگى اعايىندارعا قىزىعا قارايتىنىمىز دا بار. ءتىپتى, وسى باعىتىمەن كەتە بەرسە, جەر اياعى بوساپ, كوكتەم كەلگەن سوڭ, ءشوپ شىقپاي, جەر جۇتاڭ بولا ما دەپ ۋايىمدايتىندار دا جوق ەمەس.
اق قارىڭ قايدا, قىس؟ قارعا مالىنعان كوركىڭدى قاشان كورەمىز, اقتاۋ؟
…كوشەدە قيىرشىقتالعان ۇساق قار قيقالاپ جاۋىپ تۇر. تىنىستى كەڭەيتىپ, اينالانى تازارتار اق قاردىڭ باستاماسى ما, ءالدە جەرگە تۇسىسىمەن ەرىپ جوعالىپ, اياز تۇرسا اياق الىپ ءجۇرۋدى مۇڭعا اينالدىرىپ كوك تايعاققا اينالاتىن الدامشى قار ما, ءبىلمەيمىز…
گۇلايىم شىنتەمىرقىزى,
«ەگەمەن قازاقستان».
اقتاۋ.
