ءساۋىردىڭ 10-29 ارالىعىندا جۇمىس اتقارعان ەكسپەديتسيا مۇشەلەرى –ورنيتولوگ سەرگەي شمىگالەۆ, كومەكشى-جۇرگىزۋشى ۆلاديمير يساەنكو مەن ەكىنشى جۇرگىزۋشى يگور سۆاستين زەرتتەۋ ساپارىنىڭ ناتيجەلەرىمەن ءبولىستى.
ەكسپەديتسيا باعىتى بۇركىتتەر مەكەندەيتىن الماتى وبلىسىنىڭ اۋماعىنداعى ارقارلى مەن مالايسارى, ۇلكەن جانە كىشى بۇعىتى, سوگەتى تاۋلارى, تورايعىر مەن شارىننىڭ جوعارعى بولىگىن قامتىدى.
ەكسپەديتسيانىڭ ەسەپتەۋىنشە, زەرتتەلگەن اۋماقتا بۇگىنگى تاڭدا 36 بۇركىت مەكەندەپ جاتىر. ماماندار 14 تاستۇلەك پەن مۇزبالاقتى جانە 11 جۇپتى تىركەگەن.
«ءبىرىنشى كەزەڭدە جوڭعار الاتاۋ تاۋ سىلەمدەرى زەرتتەلدى. ساپارىمىز باستالعاننان كەيىنگى بىرنەشە كۇن ىشىندە العاشقى ەكى بۇركىت جۇبىن انىقتادىق. ەكىنشى كەزەڭدە ىلە الاتاۋ اۋماعىن جانە التى جىل بويى بۇركىتتەر ەركىندىككە جىبەرىلگەن الماتى وبلىسىنىڭ جەرلەرىن قاراپ شىقتىق. تەكسەرىلگەن تەلىمدەردە ءبىز تاستۇلەكتەردى دە, ۇيا سالاتىن بۇركىتتەردى كەزدەستىردىك», دەيدى توپ جەتەكشىسى سەرگەي شمىگالەۆ.
ەكسپەديتسيا قازاقستاندا 2012 جىلى قولعا الىنعان «ۇلەسىڭدى قوس. تابيعاتتى امان ساقتاپ قال» اتتى «ەفەس قازاقستان» كومپانياسى جوباسىنىڭ ارالىق قورىتىندىسىن شىعارىپ وتىر. وسى كەزەڭ ىشىندە «سۇڭقار» تالىمباعىندا 25 بۇركىت بالاپانى ءوسىرىلىپ, تابيعات اياسىنا جىبەرىلدى.
قازاقستان اۋماعىندا مەكەندەيتىن بۇركىتتەردىڭ سانى سوڭعى رەت 7 جىل بۇرىن ەسەپتەلگەن ەكەن. 2012 جىلعى ەسەپتەۋ ناتيجەسى مەن ورنيتولوگتاردىڭ باعالاۋىنشا بۇركىتتەردىڭ پوپۋلياتسياسى ازايعان, الماتى وبلىسىنىڭ ۇلكەن جانە كىشى بۇعىتى ايماعىندا بار-جوعى 4-5 جۇپ قانا قالعان بولاتىن.
«كوپ جىل بويعى ءبىزدىڭ ەڭبەگىمىز وسىنداي تاماشا ناتيجەلەردى اكەلىپ وتىرعانىنا اسا قۋانىشتىمىز. 2012 جىلمەن سالىستىرعاندا قازىر ۇيا سالاتىن بۇركىت جۇپتارىنىڭ بىرنەشە ەسەگە وسكەنى بايقالىپ وتىر. قازاقستان مەملەكەتتىك بايراعىندا بەينەلەنگەن ۇلتتىق نىشاندى ساقتاپ قالۋ – ءبىزدىڭ كومپانيانىڭ كورپوراتيۆتىك الەۋمەتتىك جاۋاپكەرشىلىك سالاسىنداعى باسىمدىق بەرەتىن مىندەتتەرىنىڭ ءبىرى», دەيدى «ەفەس قازاقستان» شس اق كورپوراتيۆتىك قاتىناستار دەپارتامەنتىنىڭ ديرەكتورى شىڭعىس قاسكەەۆ.
بۇركىتتەردى قورعاۋعا ارنالعان باعدارلاما ارى قاراي دا جۇزەگە اسىرىلا بەرمەك.
