ەقدب مەن جاسىل كليمات قورى قازاقستانداعى كۇن ەلەكتر ستانتسياسىنا 16،7 ميلليون دوللار نەسيە ءبولدى

ەقدب مەن جاسىل كليمات قورى قازاقستاندا كۇن ەلەكتر ستانتسياسىن قارجىلاندىرۋعا 16.7 ميلليون اقش دوللارىن بەردى. اتالمىش كەلىسىمگە بەيجىڭدە وتكەن «ءبىر بەلدەۋ – ءبىر جول» باستاماسىنىڭ ەكىنشى حالىقارالىق فورۋمى بارىسىندا قول قويىلدى، دەپ حابارلايدى ەقدب ءباسپاسوز قىزمەتى.

ەقدب جاسىل كليمات قورىمەن (جكق) ارىپتەستىكتە شىعىس قازاقستان وبلىسىنداعى جالعىزتوبە كەنتىندە قۋاتتىلىعى 30 مۆت جاڭا كۇن ەلەكتر ستانتسياسىنىڭ قۇرىلىسى ءۇشىن 16،7 ملن اقش دوللارى مولشەرىندە قارىز ۇسىنىپ، قازاقستاندا ەنەرگيانىڭ جاڭارتىلاتىن كوزدەرىن دامىتۋدى قولداۋىن جالعاستىرۋدا.

بۇگىن ەقدب 40 شەتەلدىك كوشباسشى، سونىمەن قاتار 100-دەن اسا ەل مەن حالىقارالىق ۇيىمداردىڭ مىڭداعان وكىلدەرى قاتىسقان بەيجىڭدەگى «ءبىر بەلدەۋ – ءبىر جول» باستاماسىنىڭ ەكىنشى حالىقارالىق فورۋمى كەزىندە  قىتايلىق «Universal Energy» كومپانياسىمەن قارجىلاندىرۋ تۋرالى كەلىسىمگە قول قويدى.

نەسيەلىك كەلىسىمگە ەقدب تۇراقتى ينفراقۇرىلىم توبىنىڭ باسقارۋشى ديرەكتورى نانديتا پارشاد پەن «Universal Energy» كومپانياسىنىڭ پرەزيدەنتى جانە باس ديرەكتورى نان ي قول قويدى.

ەقدب ۇيىمداستىرعان قارجىلاندىرۋ توپتاماسىنا 4،4 ملرد تەڭگە سوماسىنا (11،7 ملن اقش دوللارى) جەرگىلىكتى ۆاليۋتاداعى نەسيە جانە 5 ملن. اقش دوللارىنا دەيىنگى سومادا جكق نەسيەسى كىرەدى. الىنعان قاراجات شىعىس قازاقستان وبلىسىنداعى جالعىزتوبە كەنتىندە ورنالاساتىن قۋاتتىلىعى 30 مۆت جاڭا كۇن ەلەكتر ستانتسياسىنىڭ قۇرىلىسىن قارجىلاندىرۋعا پايدالانىلاتىن بولادى. ستانتسيا جىلىنا 38،900 مۆت ەلەكتر ەنەرگياسىن شىعارىپ، كومىرقىشقىل گاز تاستاندىلارىن جىلىنا 31،650 تونناعا قىسقارتۋعا كومەكتەسەدى.

جوبا قۇرىلىسىن «Universal Energy» – جاسىل ەنەرگەتيكا سالاسىنداعى جوبالاردى ينۆەستيتسيالاۋ، ازىرلەۋ، قۇرىلىسىن سالۋ، پايدالانۋ جانە قىزمەت كورسەتۋگە مامانداندىرىلعان كومپانيا جۇزەگە اسىرادى. «Universal Energy» بۇكىل الەمدە، سونىڭ ىشىندە قازاقستاندا كۇن جوبالارى پورتفەلىن بەلسەندى دامىتىپ كەلەدى.

جالپى العاندا، بۇل جوبا ورتا ازيادا جاڭارتىلاتىن ەنەرگەتيكا وبلىسىنداعى جوبالاردى قارجىلاندىرۋ ءۇشىن 200 ملن. ەۋرو جالپى سوماسىنا نەگىزدىك كەلىسىمگە سايكەس قول قويىلعان سەگىزىنشى جوبا بولىپ تابىلادى. 

جۋىردا عانا قاراعاندى وبلىسىندا قۋاتتىلىعى 40 مۆت جاڭا كۇن ەلەكتر ستانتسياسى ىسكە قوسىلدى. بۇل جوبانى دا ەقدب جكق-مەن بىرلەسىپ قارجىلاندىردى.

تەك 2018 جىلدىڭ وزىندە عانا جاسىل ەكونوميكاعا كوشۋ جونىندەگى تاسىلدەمە شەڭبەرىندە ەقدب جاسىل ەكونوميكا جوبالارىنا جالپى سوماسى 3،4 ملرد ەۋرو ينۆەستيتسيا جۇمىلدىردى.

قازىرگى تاڭدا ەقدب 254 جوبا اياسىندا قازاقستان ەكونوميكاسىنا 8.85 ميلليارد ەۋرودان اسا قارجى ينۆەستيتسيالادى.