قوعامدىق قابىلداۋدا مينيستر سەگىز ادامنىڭ ۇنىنە قۇلاق ءتۇرىپ, بارىنە تۇشىمدى جاۋاپ قايتاردى. ونىڭ ىشىندە ەكى ازامات وڭىرلەردەن ونلاين رەجىمىندە بايلانىسقا شىعىپ, ساۋالدارىن تىكەلەي جولدادى.
الدىمەن الماتى قالاسىنان جۋرناليست بيبىگۇل داۋلەتبەكقىزى كەيىنگى كەزدە الەۋمەتتىك جەلىلەردە كوپ تالقىلانعان بىرنەشە ماسەلەنى كوتەردى. جۋرناليست رەيتينگ قۋالاعان باعدارلامالارعا, سونىڭ ءبىرى «ءوز ويىم» باعدارلاماسىنا قاتىستى ءسوز قوزعادى. ونىڭ ايتۋىنشا تۇسكى 15:00-دە ەفيرگە شىعاتىن باعدارلاما ءتالىم-تاربيەگە جات, ۇياتتى تاقىرىپتاردى كوتەرىپ, وعان الەۋمەتتىك جەلىلەردە ءبىراز جۇرت قارسىلىق تانىتقان. مۇنداي باعدارلامالاردىڭ قاتارىندا «كەل, كەلىنىم», «قالاۋلىم» باعدارلامالارى بار ەكەنىن ايتتى.
مينيستر بۇل ساۋالعا «وسىنداي تاقىرىپتاردىڭ قوعامدىق تالقىعا تۇسكەنى ءسىز اتاعان باعدارلامالاردىڭ بۇدان كەيىن كوبەيمەۋىنە ىقپال ەتەدى. ءبىز زاڭعا قايشى كەلەتىن كونتەنت بولعاندا عانا مۇنداي باعدارلامالاردى جابا الامىز. «ءوز ويىم» باعدارلاماسى – جەكە تەلەارنانىڭ قاراماعىندا. ءبىر تاراپ وسىنداي باعدارلامالاردىڭ جابىلۋىن سۇراسا, ەكىنشى تاراپ ءسوز بوستاندىعىن شەكتەدى دەپ قىنجىلىس بىلدىرەدى. مۇندا باستىسى كورەرمەندەردىڭ تاڭداۋىنا قاراۋ كەرەك. ويتكەنى اتالعان باعدارلامالاردىڭ قارالىمى ميلليوننان اسادى. ياعني رەيتينگ ماسەلەسى كوپتىڭ سۇرانىسىنان تۋادى. بۇل تۇيتكىلدى ساۋالدار بويىنشا ارنا باسشىلارىمەن, باعدارلاما جەتەكشىلەرىمەن كەزدەسىپ, كەلىسسوزدەر جۇرگىزدىك. قازىر ماعان «قالاۋلىمنىڭ» بەتى بەرى قاراپ كەلە جاتقانىن ايتتى. سول سياقتى «ءوز ويىم» دا بىرتە-بىرتە قالىپقا كەلەدى دەپ ويلايمىن» دەپ جاۋاپ بەردى. سونداي-اق بۇدان بىلاي ەفيردە رۇقساتسىز, بالالاردىڭ بەتىن بۇركەمەي كورسەتسە, اكىمشىلىك جازا قولدانىلاتىنىن جانە تەلەديداردان, الەۋمەتتىك جەلىلەردەن كىشكەنتايلاردىڭ قانداي دۇنيەلەردى كورەتىنىنە اتا-انالار دا جاۋاپكەرشىلىكپەن قاراۋ كەرەكتىگىن ايتتى.
ەكىنشى سۇراق تا ونلاين تۇرىندە باتىس قازاقستان وبلىسىنان جولداندى. جاڭاقالا اۋدانى, قىزىلوبا اۋىلدىق وكرۋگى اقساقالدار كەڭەسىنىڭ توراعاسى تابىلدى ماساتوۆتى وڭىردە قازاق راديوسىنىڭ ستانساسى جوقتىعى الاڭداتادى ەكەن. ويتكەنى كوزى ناشار كورەتىن نەمەسە مۇلدەم كورمەيتىن تۇرعىندار جاڭالىقتارعا راديو ارقىلى قانىققىسى كەلەدى.
د.اباەۆ بۇل ماسەلە نازاردا ەكەنىن, كەڭەس وكىمەتى كەزىنەن بەرى قوزعالىپ كەلە جاتقانىن جانە ونىڭ بىرتىندەپ شەشىلەتىنىن جەتكىزدى. ونىڭ ايتۋىنشا, 2018 جىلى الماتى وبلىسى مەن تۇركىستان وبلىسىندا راديوستانسالار تۇگەل ورناتىلدى. ەندى بۇل ماسەلە باتىس قازاقستان وبلىسىندا بيىل جانە كەلەسى جىلى تولىق شەشىمىن تابادى.
وسىدان كەيىن اقپارات جانە قوعامدىق دامۋ ءمينيسترى نۇر-سۇلتان قالاسى تۇرعىندارىنىڭ ءوتىنىشىن زەيىن قويىپ تىڭدادى. سونىڭ ءبىرى «Active life» مۇگەدەكتەر قوعامدىق بىرلەستىگىنىڭ پرەزيدەنتى ارنۇر يسكاكوۆ ءوزى Youtube جەلىسىندە مۇمكىندىگى شەكتەۋلى جاندارعا ارناپ ءتۇرلى تاقىرىپتا ارنا جۇرگىزەتىنىن جانە الداعى ۋاقىتتا ونەرگە اۋەس قامكوڭىل جاندار ءۇشىن ارنايى باعدارلاما جاساپ, كونتەنت قالىپتاستىرۋدى قولداۋىن سۇرادى.
بۇعان د.اباەۆ «الەۋمەتتىك ءالسىز توپتارعا بولەكتەپ باعدارلاما جاساۋ قانشالىقتى قاجەت؟ ويتكەنى ينكليۋزيۆتى دەگەننىڭ ءوزى ونداي جانداردى قوعامنان وقشاۋلاماي بىرىكتىرۋ, بالالاردىڭ ءبارى بىردەي دەگەن ءسوز ەمەس پە؟! بىراق مۇنداي باعدارلامالاردىڭ بىزدە بىرنەشەۋى بار. ءسىزدىڭ ۇسىنىستارىڭىزدى دا قاراپ كورەمىز» دەپ جاۋاپ قاتتى.
سونىمەن قاتار ناتاليا تەمىرجانوۆا ەسىمدى قالا تۇرعىنى « ۇلى دالانىڭ ەكى قالاسى» اتتى بەينەسيۋجەت ازىرلەۋگە جانە «The Brain media group» جشس ديرەكتورى سەرگەي سەليششەۆ تەلەارنادا جاڭا باعدارلامالار جاساۋعا قولداۋ سۇرادى. بۇلاردىڭ تىلەكتەرىن مينيستر قاعازعا ءتۇرتىپ الىپ, نازاردا ۇستايتىنىن جەتكىزدى.
ال اينۇر نۇرىموۆا جاستار اراسىندا ايتىس ۇيىمداستىرۋ تۋرالى ۇسىنىس بىلدىرسە, شەرحان جەڭىس حيپ-حوپتى دامىتۋعا دەمەۋ كورسەتۋدى ءوتىندى. د.اباەۆ مۇنى ۇيىمداستىرۋ مادەنيەت جانە سپورت مينيسترلىگىنىڭ ەنشىسىندە ەكەنىن, دەگەنمەن تەلەجوبا رەتىندە وتكىزۋگە قانشالىقتى جارايتىنىن قاراستىرىپ كورەتىنىن ايتتى.
