«قولدا بار التىننىڭ قادىرى جوق» دەمەكشى, وسىناۋ جەردىڭ راحاتىن ءبىزدىڭ جەرلەستەر كورىپ وتىر ما؟ مەنىڭشە, جوق. سەبەبى سىر انانىڭ جاعالاۋىنا دەمالىس ورىندارى نەمەسە بالىق اۋلاۋ, سۋىنا شومىلۋ ءۇشىن ارنايى جەر ءبولىنىپ, كەرەك-جاراقتى قۇرال-سايماندارمەن, قورعانىس زاتتارمەن جابدىقتالۋى ءتيىس. بالالارىمىزدىڭ دەمالۋى ءۇشىن بيۋدجەتتەن كورشى اۋداندارعا اقشا اۋدارىلادى. بۇل قارجى وزىمىزدە قالسا, كوپتەگەن كاسىپكەرلەر جۇمىسسىز جۇرگەن قانشاما ادامعا جۇمىس تاۋىپ بەرەر ەدى.
ءسوزىمىز دالەلدى بولۋى ءۇشىن وسى ماسەلەنىڭ ءمانىسىن تاياۋدا «Egemen Qazaqstan» گازەتىندە جاريالانعان ع.ەلشىبايدىڭ «جاعاجاي بار, جاعداي دا جاسالادى» اتتى ماقالاسىنان ءۇزىندى كەلتىرەيىك: «تۇركىستان وبلىسىنداعى شاردارا اۋدانى جاعاجاي ءتۋريزمىن دامىتۋعا قولايلى ايماق. بۇل ماقساتتا ورمان قورى جەرىنەن ەلدى مەكەن ساناتىنا اۋىستىرىلعان 255 گەكتار جەر ۋچاسكەسىنە ينجەنەرلىك-كوممۋنيكاتسيالىق ينفراقۇرىلىمدار قۇرىلىسىنا جوبالىق-سمەتالىق قۇجاتتاما ازىرلەپ, قۇرىلىس جۇمىستارىن 2019 جىلى باستاۋ كوزدەلىپ وتىر.
«جاعاجايدىڭ تۋريستىك الەۋەتىن, جولاۋشىلار لەگىن زەرتتەپ-ەسەپتەپ جاتقان ينۆەستورلار شارداراعا كەلەتىندەر سانى كوبەيسە, اۋەجايدى ىسكە قوسارى انىق. جوبا جۇزەگە اسىرىلعان سوڭ العاشقى جىلى كەلۋشىلەر سانى 30 مىڭنان اسادى دەپ بولجانىپ وتىر. سونداي-اق جاعاجايداعى نىسانداردىڭ جىل بويى جۇمىس ىستەۋى دە جوبادا قارالعان. بالىق اۋلاۋ, كاتەرلەرمەن سەرۋەندەۋ سەكىلدى قىزمەتتەردەن تۋريستىك باعىتتار دايىندالۋدا. كەڭ كولەمدە ءارى العاش رەت وتكىزىلگەن «Safari Shardara» تۋريستىك فەستيۆالى جاعاجايدىڭ مۇمكىندىگى مەن الەۋەتى مول ەكەنىن اڭعارتتى», دەيدى اۋدان اكىمى بولاتبەك قىستاۋوۆ».
ەندى شاردارانىڭ ءبىزدىڭ اۋماقتاعى جاعالاۋىنا كەلەيىك. كوبىمىز تاياۋدا تەلەديداردان «شابدالى» اتتى تەلەفيلمدى كوردىك قوي. شاردارا تەڭىزىنىڭ ءبىزدىڭ تۇستاعى جاعالاۋىندا تۇسىرىلگەن وسى ءفيلمدى تامشالاپ وتىرىپ, قارايعان تاۋى جوق, سارقىراعان وزەنى جوق, كەڭ جايلاۋ كوكمايسالى جايلاۋى جوق, بۇل كوپ ءنارسەدەن عارىپ نە دەگەن جەر دەگەندەرگە وتە دالەلدى جاۋاپ ەدى دەپ قاتتى قۋانعانىم بار. وسى فيلمدى تۇسىرگەن رەجيسسەرگە راقمەتىمدى ايتىپ وتىردىم.
فيلمدە سۋ جاعالاۋى ادەمى كورسەتىلگەن. جاعالاۋدا تىرشىلىك كەشۋشى ادامداردىڭ باۋ-باقشاسى دا كوكورايلى اسەم ەكەن. ءدال وسى جەرلەردەن بالالارىمىزعا ارنالعان دەمالىس لاگەرىن سالۋعا بولماس پا؟ ءتىپتى ىشكى ءتۋريزمدى دامىتۋ ءۇشىن ارنايى جوبا جاساپ, ۇكىمەتكە ۇسىنىپ, دەمالىس ۇيلەرىن دە سالۋعا, دەمالىستى قىزىقتى ۇيىمداستىرۋعا دا بولادى عوي. ول ءۇشىن العاشقى قادام شاردارا اۋدانىنىڭ اكىمدىگىمەن كەلىسىپ, سۋ جولىن اشۋعا ءمۇمكىندىك جاساۋ. ياعني, جەتىساي-شاردارا سۋ جولىمەن ەكى اۋدان تۇرعىندارى كەلىس-بارىستى ورنىقتىرادى. سۋ جولى ىسكە اسقان سوڭ ءوزارا ساۋدا-ساتتىق, ءمادەني-ادەبي, سپورتتىق, ىسكەرلىك بايلانىس تا رەت-رەتىمەن تىرشىلىككە ەنەدى. ال شاردارادا اۋە جولى قالىپقا تۇسسە, ءبىزدىڭ ادامدار دا شارداراعا ۇشاقپەن جەتىپ, سۋ جولىمەن ۇيىنە ەرتەرەك كەلەر ەدى.
قازاقستان قازىر ىسكەرلەر مەكەنى. قانشاما جوبالار قولعا الىنىپ جاتىر. ءبارى حالىق ءۇشىن. سونىڭ ءبىرى ءبىزدىڭ اۋماقتاعى شاردارا مەن سىر انانىڭ جاعالاۋىندا بولاشاقتا ورنىعاتىن دەمالىس ايماقتارى بولۋى ءتيىس.
بۇل ايتىلعاندار بىردەن ىسكە اسا قويماس. دەگەنمەن, ءوز جەرىمىزدى ءوزىمىز تۇلەتپەسەك, ءوز ۇسىنىسىمىزدى ءوزىمىز جوعارىعا ءوتكىزە الماساق, وندا تۋعان جەرگە دەگەن قۇرمەت ادىرەم قالماي ما؟ سوڭىمىزدا ازاماتتىققا ءتان ءبىر ءىز قالدىرماساق, وندا وسى ەلدىڭ ازاماتىمىن دەپ قالاي عانا ايتا الامىز؟
ءوسىمحان پىستەبەك,
جۋرناليست
تۇركىستان وبلىسى,
جەتىساي اۋدانى
