قاسىم-جومارت توقاەۆ زور سەنىم ارتقانى ءۇشىن نۇرسۇلتان نازارباەۆقا جانە پارتيالاستارىنا العىس ايتا وتىرىپ, ەلىمىزدىڭ ودان ءارى قارقىندى دامۋى جولىندا تۇڭعىش پرەزيدەنت – ەلباسىنىڭ ستراتەگيالىق باعدارىن جالعاستىرىپ, ساباقتاستىقتى قامتاماسىز ەتۋدى ءوزىنىڭ ەڭ باستى مىندەتى دەپ سانايتىنىن جەتكىزدى.
– تاۋەلسىزدىك جىلدارى ىشىندە قازاقستان ەلباسىنىڭ كورەگەن باسشىلىعىنىڭ ارقاسىندا كەدەيلىك پەن الاساپىراندى ەڭسەرىپ, تۇراقتىلىق پەن گۇلدەنۋگە قاراي بۇرىن-سوڭدى تاريحتا بولماعان تەڭدەسسىز قادام جاسادى. تۇڭعىش پرەزيدەنت, پارتيامىزدىڭ كوشباسشىسى بەيبىتشىلىك پەن تىنىشتىقتىڭ, ۇلتتىق بىرلىك پەن قوعامدىق كەلىسىمنىڭ مىزعىماس نەگىزىن قالادى. ەلباسىنىڭ ايرىقشا كۇش-جىگەرى مەن كوشباسشىلىعىنىڭ ارقاسىندا ءبىز جاڭا مەملەكەت قۇرىپ, ەلىمىزدىڭ باس قالاسىنىڭ نەگىزىن قالاۋشىسى ءارى باس ساۋلەتشىسى نۇرسۇلتان نازارباەۆتىڭ ەسىمىمەن اتالۋعا لايىقتى جاڭا ەلوردامىزدى سالدىق. ەڭ باستىسى, تۇڭعىش پرەزيدەنتىمىز تۇتاس مەملەكەتتىڭ جاڭعىرۋى جولىندا تابىسقا ۇمتىلعان ساپالىق تۇرعىدان جاڭا ۇلتتىڭ نەگىزىن قالىپتاستىردى, – دەدى قاسىم-جومارت توقاەۆ.
