اكتسيا بارىسىندا اتالعان ۋنيۆەرسيتەتتىڭ كىتاپحانالىق-اقپاراتتىق ورتالىعىنىڭ ديرەكتورى گۇلجان يرجانوۆا ءسوز الىپ, كىتاپتىڭ ماڭىزدىلىعىنا توقتالدى. سونىمەن قاتار, بارشا جاستى كىتاپ وقىپ, بىلىمدەرىن شىڭداۋعا شاقىردى.
ال, ۋنيۆەرسيتەتتىڭ ءبىرىنشى پرورەكتورى, تاريح عىلىمدارىنىڭ دوكتورى, پروفەسسور اسقار ابدۋالى «جاس كەزىمىزدە كىتاپتى تالاسىپ وقيتىن جاستار كوپ بولدى. بۇگىندە ينتەرنەت داۋىرىندە ستۋدەنتتەر, ءتىپتى جاس وقىتۋشىلاردىڭ ءوزى عالامتورعا كوپ جۇگىنەدى. بىراق ينتەرنەتتەگى مالىمەت ءبىلىمدى شىڭداي المايدى, ول تەك اقپارات كوزى بولماق. ناعىز ءبىلىم – كىتاپتا. شەتەل جاستارى ايىنا شامامەن 500 اقش دوللار قاراجاتىن كىتاپ ساتىپ الۋعا جۇمسايدى ەكەن. ءبىزدىڭ دە جاستارىمىز كىتاپ ساتىپ الۋدى ادەتكە اينالدىرسا دەيمىن», دەپ, ءوز ويىمەن ءبولىستى.
مەرەكە قارساڭىندا كىتاپسۇيەر قاۋىم اراسىندا «مەنىڭ سۇيىكتى كىتابىم» ادەبي ديليجانس بايقاۋى دا ۇيىمداستىرىلعان بولاتىن. ناتيجەسىندە ەڭ كوپ كىتاپ وقىعان ستۋدەنتتەر وسى جيىندا ماراپاتتالدى. سايىستىڭ قورىتىندىسىنا سايكەس, 41 كىتاپ وقىعان تەحنولوگيالىق فاكۋلتەتتىڭ ستۋدەنتى داريعا قوڭىروۆا باس جۇلدەنى جەڭىپ الدى. ال, 38 كىتاپ وقىعان گۋمانيتارلىق-الەۋمەتتىك عىلىمدار فاكۋلتەتىنىڭ ستۋدەنتى جازيرا جاكەنوۆا مەن 27 كىتاپ وقىعان وسى فاكۋلتەتتىڭ ستۋدەنتى ينديرا دۇيسەنباەۆا ءبىرىنشى ورىندى يەلەنسە, گۋمانيتارلىق-الەۋمەتتىك عىلىمدار فاكۋلتەتىنىڭ ستۋدەنتى ايدانا تورتقۇلباەۆا مەن تەحنولوگيالىق فاكۋلتەتتىڭ ستۋدەنتى ارۋجان بەيبىتوۆا ەكىنشى ورىننان كورىندى. سونداي-اق, 12 جانە 14 كىتاپ وقىعان ديانا قاناي مەن نازەركە يسرايلوۆا ءۇشىنشى ورىنعا يە بولدى. باس جۇلدە مەن ءبىرىنشى ورىندى يەلەنگەن ءۇش ستۋدەنت «بالداۋرەن – قاپشاعاي» رەسپۋبليكالىق وقۋ-ساۋىقتىرۋ ورتالىعىنا جولداما جەڭىپ السا, قالعان جەڭىمپازدار كىتاپتارمەن جانە تارمۋ-دىڭ برەند ونىمدەرىمەن ماراپاتتالدى.
اتالعان اكتسيا اياسىندا وقۋ ورداسىنىڭ قابىرعاسىنان «COWORKING ZONE» جاستاردىڭ ەركىن وي الماسۋ ورتالىعى اشىلدى. بۇل ورتالىقتا ستۋدەنت جاستار ءوز وقىعان كىتاپتارىن وزگەلەرمەن ءبولىسۋ ماقساتىندا سورەگە قالدىرىپ كەتە الادى. جانە وقىعان كىتاپتارى تۋرالى ويلارىن ورتاعا سالىپ, اڭگىمەلەسۋلەرىنە دە بولادى.
