– «90 جاستاعى مۇقانوۆ يگەنكۇل ءزار شىعارۋ جۇيەسىنىڭ قيىنداۋى مەن قۋىعىنىڭ سىزداپ اۋرۋى مازالاپ, ۋرولوگيا عىلىمي ورتالىعىنا كەلگەن بولاتىن. بۇعان دەيىن پاتسيەنت ەمحانالىق جاعدايدا ەمدەلگەن. كوپتەگەن اۋرۋحانا دارىگەرلەرى ناۋقاستىڭ جاسىن, قوسىمشا اۋرۋلارىن ەسكەرىپ, ۋرولوگيا عىلىمي ورتالىعىنا جىبەرگەن. مۇنداعى بىلىكتى دارىگەرلەر مەن پروفەسسورلار قاريانىڭ قۋىعىندا تاس جينالىپ قالعانىن انىقتاپ, 16 ءساۋىر كۇنى كۇردەلى وپەراتسيا جاسادى. وپەراتسيانى اندرولوگيا ءبولىمىنىڭ دارىگەرى حاحازوۆ ياكۋب ەكەۋمىز جاسادىق. 2 ساعاتقا سوزىلعان وپەراتسيا ناتيجەسىندە ناۋقاستىڭ قۋىعىنان 6 تاس الىندى. كوپشىلىكتى قۋىقتاعى تاستىڭ نەدەن پايدا بولاتىنى تولعاندىرادى. ونىڭ كوپتەگەن سەبەپتەرى بار, ادەنوما, قۋىق مويىنىڭ بەرىشتەنۋى, پروستاتا بەزىنىڭ ىسىگى, ءتۇرلى ءۇرپى جاراقاتتارى اسەر ەتۋى مۇمكىن. ادام اعزاسىندا ءزاردىڭ تەجەلۋى سەكىلدى قۇبىلىستار بايقالىپ, بەلى مەن شابى, قۋىق ايماعى اۋىرادى. مۇنداي جاعدايدا دەرەۋ دارىگەرگە قارالعان ءجون. ۇيدە وزدىگىمەن ەمدەلۋ, تەك قانا اۋرۋدى اسقىندىرادى. «اۋرۋ – استان» دەمەكشى, تاماقتانۋ ءتارتىبىن قاداعالاپ وتىرۋ كەرەكتىگىن ءبىز حالىققا ۇنەمى ەسكەرتەمىز», دەيدى قاريانىڭ ەمدەۋشى-دارىگەرى, ۋرولوگ-اندرولوگ ءاليجان قوجامجاروۆ.
ۋرولوگيا عىلىمي ورتالىعىندا ءتيىستى ەم شارالارىن قابىلداعان قاريانىڭ دەنساۋلىعى قازىر بىرقالىپتى. «قارتى بار ءۇيدىڭ قازىناسى بار» دەمەكشى, اتا-اجەلەرىمىز امان بولسىن. ءبىز ولاردىڭ جاساعان جاقسىلىعىن ۇمىتپايمىز. ۇلكەندەرگە قۇرمەت كورسەتۋ – ءبىزدىڭ باستى پارىزىمىز», دەيدى ورتالىق ماماندارى.
