قازاقستان مەن مىسىر اراسىنداعى دوستىق بايلانىستىڭ رامىزىنە اينالعان سۇلتان بەيبارىستىڭ مۇراسىن جاڭعىرتۋ جۇمىستارى 2007 جىلى باستالعان. سول جىلى 28 قازاندا ەكى ەلدىڭ ۇكىمەتتەرى اراسىندا كەلىسىم جاسالىپ, اتالعان مەشىتتى رەستاۆراتسيالاۋ جوباسىنا 12 ملن اقش دوللارى مولشەرىندە بيۋدجەت بەلگىلەنگەن. سوعان سايكەس, قازاقستان تاراپى 4,5 ملن اقش دوللارىن ءبولدى. قالعان بولىگىن مىسىر ۇكىمەتى قارجىلاندىرىپ, جوبا 2011 جىلدىڭ قازانىندا اياقتالۋى كەرەك بولعان. بىراق سول كەزدەگى ساياسي جانە ەكونوميكالىق داعدارىس سەبەبىمەن جۇمىس توقتاپ قالعان ەدى.
ەندى اتالعان تاريحي نىساندى جاڭعىرتۋ جۇمىستارى قايتا قولعا الىنباق. قازاقستاننىڭ ەلشىسى ارمان يساعاليەۆ مىسىر اراب رەسپۋبليكاسى (مار) پارلامەنتىندە ۋاقىپتار ءمينيسترى مۇحتار دجۋماامەن كەزدەسىپ, وندا مىسىر ۇكىمەتىنىڭ سۇلتان بەيبارىس مەشىتىن قالپىنا كەلتىرۋ ءۇشىن 181 ميلليون فۋنت, ياعني 10,5 ميلليون اقش دوللارىن بولگەنى ءمالىم بولدى. بۇعان قوسا, ۋاقىپتار مينيسترلىگى ءوز قاراجاتىنان بۇل جوبانى تەز اياقتاۋ ماقساتىندا قوسىمشا 10 ميلليون فۋنت بەرگەنىن ايتتى. بۇل جاڭالىق جاڭعىرتۋ جۇمىستارىنىڭ كوپ ۇزاماي اياقتالاتىنىن بىلدىرەدى.
بىلتىر قازان ايىندا, ياعني 7 جىلدان سوڭ, سۇلتان بەيبارىس مەشىتىنىڭ رەستاۆراتسيالاۋ جۇمىستارى قايتا باستالدى. جوبانى مار كونە ەسكەرتكىشتەر مينيسترلىگى جانە باس مەردىگەر «اراب كونتراكتورس» كومپانياسى ءىسكە اسىرادى. مەشىتتىڭ شاڭىراقتى ءبولمەلەرى, ءدالىزى, كۇمبەزى, مۇنارالارى قايتا كوتەرىلىپ, ورتالىق الاڭ مەن سىرتقى قابىرعالارى جوندەۋدەن وتەدى. جوبانىڭ تەحنيكالىق باقىلاۋىن مىسىرلىق ارحەولوگتار مەن تاريحي ءساۋلەتشىلەردەن قۇرىلعان ارنايى كوميسسيا جۇرگىزەدى.
سۇلتان بەيبارىستىڭ امىرىمەن سول ءداۋىردىڭ وزىق ساۋلەت ۇلگىسىندەگى بۇل مەشىت 1267 جىلى بوي كوتەرگەن. ءزاۋلىم عيماراتتىڭ اۋماعى 10 مىڭ شارشى مەتر اۋماقتى الىپ جاتىر, ال تاس قابىرعالارىنىڭ بيىكتىگى – 11 مەتر. سالىنعانىنا سەگىز عاسىر بولعان مەشىتتىڭ تەك بيىك باعانالارى عانا سول كۇيى ساقتالعان. بۇل نىسان بويىن قايتا تىكتەگەننەن كەيىن ەلدەگى ەڭ تانىمال تاريحي جانە تۋريستىك ورتالىقتاردىڭ بىرىنە اينالادى دەگەن سەنىم بار.
