7 بولىمنەن تۇراتىن جيناققا Qazaq راديوسىنىڭ «التىن قورىندا» ساقتالعان ۇلتىمىزدىڭ حالىق اۋىز ادەبيەتى مەن مۋزىكالىق فولكلورىنىڭ مول قورى, سان عاسىرلىق تاريحقا تولى شىعارمالارى – ەرتەگىلەر, باتىرلار جىرى, ايتىس ونەرى, شەشەندىك سوزدەر, جىر-داستاندار, كۇي-تەرمەلەر ەندى. بۇگىندە «التىن قوردا» 1948 جىلدان بەرى جيناقتالعان 100 000-نان استام فونوگرامما بار. جيناقتاعى حالىق جانە حالىق كومپوزيتورلارىنىڭ جاۋھارلارى العاش جەتكىزۋشى-ورىنداۋشىلارىنىڭ ورىنداۋىندا عانا بەرىلگەن. ءباسپاسوز ءماسليحاتىنىڭ قاتىسۋشىلارى جيناقتىڭ ماقساتى مەن مازمۇنىنا توقتالىپ, وعان ەنگەن «التىن قورداعى» قازاقتىڭ قۇندى جادىگەرلەرى جونىندە كەڭىرەك باياندادى.
«100 جىلعا جۋىق تاريحى بار «قازاق» راديوسىنىڭ «التىن قورىندا» ساقتالعان رۋحاني مۇرالارىمىزدى جارىققا شىعارۋ وتە ماڭىزدى ءارى ەلەۋلى وقيعا. تۇڭعىش پرەزيدەنتىمىز ن.نازارباەۆتىڭ « ۇلى دالانىڭ جەتى قىرى» دەپ اتالاتىن ماقالاسى وسى ەكى تومدىق جيناقتى شىعارۋعا تۇرتكى بولدى. ەڭ الدىمەن, بۇل جوبا ارقىلى بالالارىمىزدىڭ ساناسىنا بابالارىمىزدىڭ باي مۇراسىن سىڭىرەمىز», – دەدى د.اباەۆ. ءمينيستردىڭ ايتۋىنشا, جيناقتىڭ باستى ەرەكشەلىگى انشىلەردىڭ ءوز داۋىسىمەن ورىنداعان تۇپنۇسقا شىعارمالاردى تىڭداۋعا بولادى. جيناقتا ءحىح عاسىرداعى حالىق كومپوزيتورلارىنان ءان ۇيرەنىپ, ولاردىڭ ءبىزدىڭ زامانىمىزعا دەيىن ۇزىلمەي جەتۋىنە ۇلەس قوسقان بارلىق ونەرپاز قامتىلعان. اتاپ ايتقاندا, امىرە قاشاۋباەۆتىڭ ورىنداۋىنداعى «بالقاديشا», «دۋداراي», «جالعىز ارشا», «بەسقاراگەر» اندەرى بار. كەنەن ازىرباەۆتىڭ «كوك شولاق», «بوزتورعاي», «بۇلبۇل», «دومبىرا» اندەرىن تىڭداۋعا بولادى. ماناربەك ەرجانوۆ, قالي بايجانوۆ, بايعابىل جىلقىباەۆ سىندى داۋىلپاز جىرشىلاردىڭ ءانى دە وسى جيناققا ەنگىزىلگەن. كۇيگە كەلسەك, دينا نۇرپەيىسوۆا, جاپپاس قالامباەۆ, ابىكەن حاسەنوۆ پەن ماعاۋيا ءحامزيننىڭ ورىنداۋىنداعى قۇندى شىعارمالار توپتاستىرىلعان.
«تارالىمى 1 مىڭ دانا اۋديوجيناق ۇلتتىق جانە رەسپۋبليكالىق كىتاپحانالار مەن جوعارى وقۋ ورىندارىنا, ونەر مەكتەپتەرىنە تاراتىلادى», – «Qazaq radiolary» جشس ديرەكتورى قۇرمانبەك جۇماعالي.
قازاق راديوسىنىڭ «التىن قورىندا» 1959 جىلدان بەرى «ەرتەگى» ايدارىمەن 350 حابار دايىندالعان, سونىڭ ىشىندەگى 70 قازاق ەرتەگىسى «ەرتەگى» ايدارىمەن جيناققا ەندى. ال باتىرلار جىرىنىڭ 50 نۇسقاسى 2015 جىلى تەرمەشى اقان ءابدۋالىنىڭ ۇيىمداستىرۋىمەن ەلىمىزدىڭ بەلگىلى جىرشىلارىنىڭ ورىنداۋىندا قايتا ۇنتاسپاعا جازىلدى. سونىمەن قاتار قازاق اۋىز ادەبيەتىنىڭ وزىق ۇلگىلەرى توپتاستىرىلعان جيناقتىڭ كوپشىلىككە قولجەتىمدىلىگىن ارتتىرۋ ماقساتىندا ونىڭ ارنايى سايتى مەن ءموبيلدى قوسىمشاسىن ازىرلەۋ دە قولعا الىنباق.
