سپورت • 22 ءساۋىر، 2019

ارۋلارعا اق جول تىلەيمىز!

355 رەت كورسەتىلدى

ساناۋلى كۇندەردەن كەيىن قىتايدىڭ سيان قالاسىندا سارى قۇرلىقتىڭ بارلىق بەلدى بالۋاندارى باس قوسادى. بۇعان دەيىن ءبىز گرەك-ريم جانە ەركىن كۇرەسىنەن وتكەن ازيا چەمپيوناتتارىنىڭ تاريحى جانە قازاقستاندىق سپورتشىلاردىڭ سول جارىستاردا قول جەتكىزگەن تابىستارى تۋراسىندا ءبىراز ماعلۇمات بەردىك. ال بۇگىنگى ماقالامىزدا ايەلدەر كۇرەسى جايىندا اڭگىمە قوزعايمىز.

ايەلدەر كۇرەسىنەن العاشقى ازيا چەمپيوناتى 1996 جىلى قىتايدىڭ سياوشاني قالاسىندا ۇيىمداستىرىلدى. ايتۋلى جارىس­تا توعىز سالماق دارەجەسى بويىنشا جۇلدەلەر ساراپقا سالىنىپ، ونىڭ جەتەۋىندە جاپون قىزدارى جەڭىمپاز اتاندى. ءبىر التىن قىتاي سپورتشىسىنا بۇيىرسا، تاعى بىرەۋىن اقش-تان كەلگەن پاتريسيا ساۋندەرس يەلەندى. سارى قۇرلىقتىڭ ىشكى جارىسىندا امەريكالىق بالۋاننىڭ نە سەبەپتى ونەر كورسەتكەنىن جانكۇيەرلەر وسى كۇنگە دەيىن تۇسىنە الماي دال. وسى ماسەلە جونىندە كۇرەس ونەرىنىڭ باسى-قاسىندا جۇرگەن ماماندارعا ساۋال جولداعان ەدىك، ولار دا تۇشىمدى جاۋاپ قايتارا المادى. بىراق بىزدەر ءۇشىن بۇل ماڭىزدى ەمەس. بىزدەر ءۇشىن ماڭىزدىسى – اسپاناستى ەلىندە وتكەن باسەكەدە قازاقستاندىق سۆەتلانا ۆولكوۆانىڭ (57 كيلو) قولا مەدال يەلەنۋى. 

1997-2001 جىلدار ارالىعىندا ازيا چەمپيوناتىنىڭ جالاۋى ءتورت مارتە جەلبىرەدى. سول ءتورت جارىستا جۇلدە العانداردىڭ تىزىمىندە بىردە-ءبىر جەرلەستەرىمىز جوق. 2003 جىلى نيۋ-دەليدە وتكەن بايراقتى باسەكەدە قازاقستاننىڭ تۋى استىندا ونەر كورسەتكەن سۆەتلانا ياروشەۆيچ (75 كيلو) التىننان القا تاعىنسا، 2004 جىلى توكيودان قورجىنىمىز بوس قايتتى. 

2005 جىلدان بەرى ەلىمىزدە ايەلدەر كۇرەسىنىڭ ورلەۋ كەزەڭى باستالدى. سول جىلى ۋحاندا بەكزات مۇستافينا (48 كيلو) مەن ولگا جانىبەكوۆا (72 كيلو) ءۇشىنشى ورىنعا تابان تىرەسە، كەلەسى ماۋسىمدا الماتىدا ەلەنا شالىگينا (63 كيلو) كۇمىس جانە ولگا كالينينا (67 كيلو) مەن ولگا جانىبەكوۆا (72 كيلو) قولا مەدالدى يەمدەندى. 

2007 جىلى بىشكەكتە ءتورت سپورتشىمىز فينالعا شىقتى. سولاردىڭ اراسىنان جۇلدىز ەشىموۆانىڭ (51 كيلو) باق جۇلدىزى جاندى. ەلەنا شالىگينا (63 كيلو)، داريا كارپەنكو (67 كيلو) جانە ولگا جانىبەكوۆا (72 كيلو) شەشۋشى تۇستا ۇتىلدى. ال ولگا سميرنوۆا (55 كيلو) قولاعا قول جەتكىزدى. 

2008 جىلى چەدجۋدە بەس جۇلدە الدىق. جۇلدىز ەشىموۆانىڭ (51 كيلو)، سالتانات ءابدىراحمانوۆا (55 كيلو) جانە ولگا سميرنوۆا (59 كيلو) كۇمىسكە قول سوزسا، ەلەنا شالىگينا (63 كيلو) مەن داريا كارپەنكو (67 كيلو) قولانى قاناعات تۇتتى. 

2009 جىلى پاتتايا دا تۇڭعىش رەت قازاق ەلىنىڭ ءانۇرانى ەكى مارتە شىرقالدى. تاتيانا امانجولوۆا (51 كيلو) مەن ەلەنا شالىگينا (63 كيلو) التىننان القا تاعىندى. جۇلدىز ەشىموۆا (51 كيلو) فينالدا سۇرىنسە، ايىم ءابدىلدينا (55 كيلو) ۇزدىك ۇشتىكتى قورىتىندىلادى.  

2010 جىلى ءۇندىستاننىڭ استاناسىندا ءتۇرلى مەدالداردى ءبىر-بىردەن ولجالادىق. گۇزەل مانيۋروۆا (72 كيلو) التىن، جۇلدىز ەشىموۆا (51 كيلو) كۇمىس جانە ولگا جانىبە­كوۆا (67 كيلو) قولا مەدالدى مويىندارىنا ءىلدى.   

2011 جىلى تاشكەنتتە گۇزەل مانيۋروۆا (72 كيلو) تاعى دا تەڭدەسسىز دەپ تانىلدى. ايىم ءابدىلدينا (55 كيلو) مەن تاتيانا زاحاروۆا (67 كيلو) ءۇشىنشى ساتىعا جايعاستى. 

2012 جىلى كۋميدە قازاقستان قۇراماسى وتە كەرەمەت ونەر كورسەتتى. قورجىنىمىزدا ­– بەس جۇلدە. ەلەنا شالىگينا (63 كيلو) ەكىنشى جانە گۇزەل مانيۋروۆا (72 كيلو) ءۇشىنشى رەت ازيا چەمپيونى دەگەن اتاققا قول جەتكىزدى. ايجان يسماعۇلوۆا (55 كيلو)، ايىم ءابدىلدينا (59 كيلو) جانە تاتيانا زاحاروۆا (63 كيلو) ءۇشىنشى ورىندى يەلەندى. 

2013 جىلى نيۋ-دەليدە جالعىز عانا تاتيانا امانجولدىڭ (51 كيلو) التىنىن قاناعات تۇتساق، 2014 جىلى قازاقستاننىڭ باس قالاسىندا ءانۇرانىمىز ەكى مارتە شىرقالىپ، تۋىمىز ءۇش رەت كوكتە جەلبىرەدى. تاتيانا امانجول (48 كيلو) مەن گۇزەل مانيۋروۆا (75 كيلو) قارسىلاس شاق كەلتىرمەسە، ايىم ءابدىلدينا (55 كيلو)، ەكاتەرينا لاريونوۆا (63 كيلو) جانە ەلميرا سىزدىقوۆا (67 كيلو) جۇلدەگەرلەر قاتارىنان كورىندى. 

2015 جىلى دوحادا التى ارۋىمىز جەڭىس تۇعىرىنا كوتەرىلدى. الايدا ولاردىڭ ەشقايسىسىنا التىن بۇيىرمادى. ەلميرا سىزدىقوۆا (67 كيلو) كۇمىس،  تاتيانا امانجول (48 كيلو)، جۇلدىز ەشىموۆا (55 كيلو)، ايىم ءابدىلدينا (58 كيلو)، ەكاتەرينا لاريونوۆا (63 كيلو) جانە گۇلمارال ەركەباەۆا (75 كيلو) قولا مەدالدى ەنشىلەدى. 

2016 جىلى بانگكوكتا ءۇش بالۋانىمىز اقتىق سىنعا القىنباي جەتكەنىمەن، ۇشەۋى دە شەشۋشى تۇستا ءوز قارسىلاستارىنا ەسە جىبەردى. ولار – يرينا بوريسوۆا (48 كيلو)، ايىم ءابدىلدينا (58 كيلو) جانە ەلميرا سىزدىقوۆا (69 كيلو). مادينا باقبەرگەنوۆا (60 كيلو) مەن گۇلمارال ەركەباەۆا (75 كيلو) ءۇشىنشى ساتىعا تابان تىرەدى. 

2017 جىلى نيۋ-دەليدەگى دودانى ءتورت جۇلدەمەن قورىتىندىلادىق. جۇلدىز ەشىموۆا (53 كيلو) فينالدا ۇتىلدى. يرينا بوريسوۆا (48 كيلو)، اياۋلىم قاسىموۆا (60 كيلو) جانە گۇلمارال ەركەباەۆا (75 كيلو) جۇلدەگەرلەر ساناتىنا قوسىلدى.  ال 2018 جىلى بىشكەكتە شىمىلدىعى تۇرىلگەن جارىستا جۇلدىز ەشىموۆا (53 كيلو)، يرينا كازيۋلينا (68 كيلو) جانە گۇلمارال ەركەباەۆا (76 كيلو) قولا مەدالدى يەلەندى. 

وسى كۇنگە دەيىن ايەلدەر اراسىنداعى ازيا چەمپيوناتىنىڭ كوماندالىق ەسەبىنىڭ باس جۇلدەسى تەك ەكى مەملەكەتتىڭ وكىلدەرىنە عانا بۇيىرعان ەكەن. بۇل رەتتە سارى قۇرلىقتىڭ كوشباسشىسى دەپ جاپونيانى ايتۋعا تولىق نەگىز بار. 1996-2008 جىلدار ارالىعىندا ايتۋلى جارىستىڭ جالاۋى 21 مارتە جەلبىرەسە، كۇنشىعىس ەلىنىڭ قىزدارى 16 رەت دارا شىققان ەكەن. قالعان جۇلدەنىڭ بەسەۋى قىتاي قۇراماسىنىڭ ەنشىسىندە. 

جەڭىپ العان باس جۇلدەلەردىڭ سانى بويىن­شا قازاقستان ءۇشىنشى ورىندا. ءار جىلدارى ءبىزدىڭ سۇلۋلارىمىز 11 رەت التىننان القا تاعىندى. موڭعوليانىڭ سەگىز باس جۇلدەسى بار. وڭتۇستىك كورەيانىڭ وكىلدەرى ءتورت مارتە تەڭدەسسىز دەپ تانىلدى. ولاردىڭ سولتۇستىكتەگى كورشىلەرى 3 رەت جەڭىس تۇعىرىنىڭ ەڭ بيىك ساتىسىنا كوتەرىلدى. قىرعىزستاندا ەكى التىن بار. تۇرىكمەنستان، تايپەي، ءۇندىستاننىڭ قىزدارى ءبىر-ءبىر رەتتەن توپ جاردى. مىنە، ازيانىڭ التىنى وسى ساناۋلى ەلدەردىڭ بالۋاندارىنا عانا بۇيىرعان ەكەن. وسى دەرەكتەردىڭ وزىنەن-اق، باس جۇلدەلەردىڭ كوبى جاپونيا مەن قىتايعا كەتكەنىن اڭعارۋعا بولادى. 

قازاقستان قۇراماسىنىڭ ازيا چەمپيوناتىندا جەڭىپ العان جالپى جۇلدەلەر سانى – 56. تارقاتىپ، ايتساق، ءبىزدىڭ ارۋلار 11 التىن، 14 كۇمىس جانە 31 قولانى ولجالادى. 31 مارتە وتكەن ايتۋلى جارىستىڭ بەسەۋىندە جەرلەستەرىمىز كوماندالىق ەسەپتە ءۇشىنشى ورىندى يەلەندى. بۇل كورسەتكىشتەرگە ءبىز 2007 جىلى – بىشكەكتە (1 التىن+3 كۇمىس+1 قولا)، 2009 جىلى – پاتتايادا (2+1+1)، 2010 جىلى نيۋ-دەليدە (1+1+1)، 2011 جىلى تاشكەنتتە (1+0+2)، 2012 جىلى كۋميدە (2+0+3) جانە 2014 جىلى نۇر-سۇلتاندا (2+0+3) قول جەتكىزدى.      


2018 جىلعى ازيا چەمپيوندارى

50 كيلو ­– لەي چۋن (قىتاي)

53 كيلو – پاك ەن مي (سولتۇستىك كورەيا)
55 كيلو ­– ساكي يگاراسي (جاپونيا) 
57 كيلو – پەي سينجۋ (قىتاي)
59 كيلو –  جۋ نيننين (قىتاي)
62 كيلو – پۋرەۆدورجين ورحون (موڭعوليا)
65 كيلو –  ناۆدجوت كاۋر ء(ۇندىستان)
68 كيلو –  چجوۋ فەن (قىتاي)
72 كيلو –  حان يۋە (قىتاي)
76 كيلو –   چجوۋ تسيان (قىتاي)
سوڭعى جاڭالىقتار

دوللار باعامى ارزاندادى

قارجى • بۇگىن، 15:49

ۇقساس جاڭالىقتار