ءبىزدىڭ بوكسشىلار بيىكتەن كورىندى
بەيسەنبى, 10 مامىر 2012 6:42
الماتىدا قازاقستان رەسپۋبليكاسى پرەزيدەنتىنىڭ كۋبوگى ءۇشىن بوكستان ەرەسەكتەر اراسىندا وتكەن ءدۇبىرلى دودا اياقتالدى. ون سالماقتىڭ جەتەۋىندە قانجىعاعا التىن بايلاعان ءبىزدىڭ جىگىتتەر جاقسى كورسەتكىشپەن العا وزدى.
ەكى جىلدا ءبىر رەت وتەتىن بۇل حالىقارالىق تۋرنير بۇعان دەيىن 2006, 2010 جىلدارى استانا قالاسىندا ۇيىمداستىرىلعان ەدى. بۇل جولعى جەكپە-جەكتەردىڭ باستى ەرەكشەلىگى, لوندون وليمپياداسى قارساڭىندا ۇيىمداستىرىلۋى بولىپ وتىر. بايراقتى باسەكەگە قازاقستان قۇراماسى مەن الماتى قالاسى جەكە كوماندامەن قاتىستى. التى كۇن بويى بالۋان شولاق اتىنداعى سپورت سارايىن كەرەمەت جەكپە-جەكتەرمەن دۋماندى ەتكەن حالىقارالىق جارىستىڭ جەڭىمپازدارى دا انىقتالدى.
بەيسەنبى, 10 مامىر 2012 6:42
الماتىدا قازاقستان رەسپۋبليكاسى پرەزيدەنتىنىڭ كۋبوگى ءۇشىن بوكستان ەرەسەكتەر اراسىندا وتكەن ءدۇبىرلى دودا اياقتالدى. ون سالماقتىڭ جەتەۋىندە قانجىعاعا التىن بايلاعان ءبىزدىڭ جىگىتتەر جاقسى كورسەتكىشپەن العا وزدى.
ەكى جىلدا ءبىر رەت وتەتىن بۇل حالىقارالىق تۋرنير بۇعان دەيىن 2006, 2010 جىلدارى استانا قالاسىندا ۇيىمداستىرىلعان ەدى. بۇل جولعى جەكپە-جەكتەردىڭ باستى ەرەكشەلىگى, لوندون وليمپياداسى قارساڭىندا ۇيىمداستىرىلۋى بولىپ وتىر. بايراقتى باسەكەگە قازاقستان قۇراماسى مەن الماتى قالاسى جەكە كوماندامەن قاتىستى. التى كۇن بويى بالۋان شولاق اتىنداعى سپورت سارايىن كەرەمەت جەكپە-جەكتەرمەن دۋماندى ەتكەن حالىقارالىق جارىستىڭ جەڭىمپازدارى دا انىقتالدى.
ءبىزدىڭ بوكسشىلار 10 سالماق بويىنشا كۇش سىناسىپ, ونىڭ جەتەۋىندە التىن القاعا يە بولسا, قالعان جۇلدەلەردى كۋبا مەن سيريا سپورتشىلارى ءبولىستى. ءبىزدىڭ ويىمىزشا, پرەزيدەنت كۋبوگىن ساراپقا سالعان وسى سايىس وليمپيادا قارساڭىندا وتە ساتىمەن ۇيىمداستىرىلىپ وتىر. كۇنى ەرتەڭ تورتجىلدىقتىڭ باستى ءباسەكەسىندە كۋبالىقتارمەن قولعاپ ءتۇيىستىرەتىنىمىز تاعى دا انىق ءجايت. ياعني, بوستاندىق ارالى بوكسشىلارىنىڭ قارىم-قابىلەتىن تاعى ءبىر بايقاپ كورۋگە تاپتىرمايتىن مۇمكىندىككە يە بولدى ءبىزدىڭ سپورتشىلار. باسەكەگە ون ەل قاتىسقانىمەن, ۋكراينا مەن رەسەي قوسالقى قۇرامىن جىبەرگەن سوڭ, باستى نازارىمىز كۋبا بوكسشىلارىندا بولعانىن جاسىرمايمىز. اۋەلدەن قاراكوز قازاق بالاسىنا قارا ءتۇستى قارسىلاستىڭ شارشى الاڭداعى ناعىز باسەكەلەسكە اينالعانى راس.
جارىستىڭ سوڭعى كۇنى, فينالدىق كەزدەسۋدىڭ شىمىلدىعىن 49 كيلو سالماقتاعى كۋبا بوكسشىسى يوسۆانيا ۆەيتيا مەن ۇندىستاندىق دەۆەندرو سينگحتىڭ اراسىنداعى جەكپە-جەك اشىپ, 4:4 ەسەبىمەن تەڭ تۇسكەن ەكى جاس پەرىنىڭ اراسىندا كۋبالىقتىڭ باعى جاندى. ۇپاي سانىمەن يوسۆانيا ۆەيتيا جەڭىمپازدار تۇعىرىنا كوتەرىلدى. ايتا كەتۋ كەرەك, ءۇندى سينگح ءوزىنىڭ بولاشاعى جارقىن بوكسشى بولۋعا لايىق ەكەندىگىن ابدەن دالەلدەپ ۇلگەردى بۇل تۋرنيردە.
52 كيلو سالماقتاعى قوس قازاقستاندىق بوكسشى ءىلياس سۇلەيمەنوۆ پەن ميراس جاقىپوۆتىڭ اراسىنداعى كەزدەسۋ دە مەيلىنشە تارتىستى وتكەن ويىن بولدى. جارتىلاي فينالدا كۋبا بوكسشىسىن قۋالاپ ءجۇرىپ ساباعان ميراس فينالدا ەكى راۋند بويى ءىلياستان سوققى جەدى. تەك شەشۋشى راۋندتا عانا تىنىسى اشىلعانداي بولعانىمەن, الدىڭعى ويىن ەسەبى بويىنشا سۇلەيمەنوۆ جەڭىستى ولجالاپ كەتتى.
56 كيلو سالماقتاعى قانات ءابۋتالىپوۆ – لازارو الۆارەس ەسترادو اراسىنداعى كەزدەسۋ جانكۇيەر بىتكەننىڭ دەلەبەسىن قوزدىرىپ, نامىستى جانىعان ناعىز مايدان بولدى. باكۋدە وتكەن الەم چەمپيوناتىنىڭ التىن جۇلدەگەرى لازارو الۆارەس ەسترادونى ءا دەگەندە ءابۋتالىپوۆ قارشا بوراعان سوققىنىڭ استىنا الدى. ءسويتىپ, ءبىرىنشى راۋندتا قانات 7:3 ەسەبىمەن العا شىقتى. الايدا, سوڭعى ەكى راۋندتا ەسترادو ەس جيىپ, ءبىزدىڭ جىگىتتە كەتكەن ەسەسىن ەڭسەرە قايتارعانى راس. ەلەكتروندى تاقتاداعى ۇپاي سانى 17:17 بولعان كەزدە ءبارىمىز جەڭىستى كۋبالىق شەبەرگە بەرىپ قويعانداي ەدىك. بىراق كومپيۋتەردىڭ ەسەپتەۋى بويىنشا قانات جۇمساعان ءدال سوققىلارى بويىنشا العا شىعىپ, جەڭىسكە جەتتى. بۇل شەشىمگە ريزا بولماعانداي ەسترادو دا سۇق ساۋساعىن اسپانعا كەزەپ, باسىن شايقاي بەردى.
60 كيلو سالماقتا عاني جايلاۋوۆ پەن ياسنيەر تولەدو لوپەس كەزدەستى. بۇل جولى دا ءبىزدىڭ جايلاۋوۆ لوپەستەن 8:12 ەسەبىمەن جەڭىلىپ قالدى. باكۋدەگى جەڭىلىس ءوز الدىنا, تۋعان جەردىڭ توپىراعىن باسىپ تۇرىپ جەڭىلىستىڭ اششى ءدامىن تاتۋ قيىن بولدى ءبىزدىڭ جاس بوكسشىعا. كەلەسى 64 كيلو سالماقتا تاعى دا قوس جەرلەسىمىز اسەت قاسىموۆ پەن المازبەك الىبەكوۆ كۇش سىناستى. العاشقى راۋندتا كوپ تەرلەمەي-اق العا وزعان المازبەكتى سوڭعى راۋندتاردا اسەت ايقىن باسىمدىقپەن ۇتتى. ەسەپ – 10:7.
ۇلتتىق قۇرامانىڭ كاپيتانى, ەكى ءدۇركىن الەم چەمپيونى, الەم چەمپيوناتىنىڭ كۇمىس جانە قولا جۇلدەگەرى سەرىك ساپيەۆ ءوزىنىڭ 69 كيلو سالماقتا دارا بوكسشى ەكەندىگىن تاعى ءبىر دالەلدەدى. قارسىلاسى باقىتجان قوجابەكوۆتى ءۇش راۋند بويى ەس جيدىرماي, 16:5 ەسەبىمەن جەڭىپ, تاعى دا ەل الدىندا مەرەيىن اسىردى.
75 كيلو سالماقتا وليمپياداعا جولداما العان دانابەك سۋجانوۆ پەن نۇرداۋلەت جارمانوۆ كەزدەستى. دانابەكتەن دەنە ءبىتىمى ءىرى نۇرداۋلەت العاشقى اينالىمدا ءۇش ۇپاي ايىرماسىمەن العا شىققان. ەكىنشى راۋندتا ەسەپ تەڭەستىرگەن دانابەك سوڭعى راۋندتا جەڭىسكە جەتۋ ءۇشىن كوپ تەر توككەنى انىق بايقالدى. 12:9 ەسەبىمەن جەڭگەن سۋجانوۆتان الدا دا ءۇمىتىمىز زور.
ادىلبەك نيازىمبەتوۆ پەن حۋليو لاكرۋز اراسىنداعى جەكپە-جەك 81 كيلو سالماقتاعى كەزدەسۋلەردىڭ ىشىندەگى ەڭ ءبىر تارتىستى وتكەنى بولدى دەسەك, استە قاتەلەسپەيمىز. العاشقى ەكى راۋندتا ۇپاي سانىمەن العا وزعان ادىلبەك سوڭعى راۋندتا ءبىراز سوققىنىڭ استىندا قالعانداي بولىپ ەدى, الايدا قورعانىستا تۇرىپ-اق دىتتەگەن جەرىن ءدال كوزدەگەن ەكەن. 16:10 ەسەبىمەن تازا جەڭىسكە جەتتى.
91 كيلو بويىنشا شارشى الاڭعا شىققان موحاممەد گاسسوۋن مەن اربەك ابدىعانيەۆتىڭ اراسىنداعى كەزدەسۋ سيريا بوكسشىسىنىڭ ەسەبىنە جازىلدى. ۇلكەن رينگتەردە ءپىسىپ-جەتىلمەگەن اربەك ءۇشىن بۇل دا ساباق. فينالدىڭ ەڭ قىزىق تا شەشۋشى ايقاسى قوس الىپ يۆان دىچكو مەن ەريسلاندي ساۆون اراسىنداعى كەزدەسۋ بولدى. 91 كيلودان جوعارى سالماقتاعى ەكى ءداۋ ءبىرىن ءبىرى سۇلاتىپ سالماسا دا, كوپ اڭدىسىپ ءجۇرىپ سوققى جۇمساعاندارىنىڭ ءوزى كورەر كوزگە ءبىر قىزىق.
ءۇشىنشى مارتە وتكىزىلىپ وتىرعان پرەزيدەنت كۋبوگىنا نۇكتە قويعان بۇل جەكپە-جەكتە يۆان دىچكونىڭ بابى دا, باعى دا وزدى. جەتى التىنعا يە بولعان ءبىزدىڭ بوكسشىلارىمىز قازاق بوكس مەكتەبىنىڭ ابىرويىن ساقتاپ قالدى.
قانات ەسكەندىر,
«ەگەمەن قازاقستان».
الماتى.
