ايماقتار • 21 ءساۋىر، 2019

ەدىل مەن جايىق سۋى ارالاستى

405 رەت كورسەتىلدى

باتىس قازاقستان وبلىسىندا ءتورت اۋداندى سۋمەن قامتىپ، شارۋا قوجالىقتارىنا مال سۋارۋعا جانە ەگىندى جەرلەردى سۋلاندىرۋعا مۇمكىندىك بەرەتىن كيروۆ-شەجىن ارناسى ىسكە قوسىلدى. ۇزىندىعى 180 شاقىرىمعا سوزىلعان ارنانىڭ قۇرىلىسىنا جەرگىلىكتى بيۋدجەتتەن 2 401،726 ملن. تەڭگە جۇمسالعان.

قازتالوۆ اۋدانىنىڭ اقپاتەر اۋىلى ماڭىندا سۋ قاقپاسىن اشۋ راسىمىنە قاتىسقان باتىس قازاقستان وبلىسىنىڭ اكىمى التاي كولگىنوۆ بۇل كۇندى تاريحي وقيعا دەپ باعالادى.

- قاراوزەندەگى ەدىلدىڭ سۋىنا كيروۆ-شەجىن ارناسى ارقىلى جايىق سۋى قوسىلىپ وتىر. كانالدىڭ ىسكە قوسىلۋى اۋىل شارۋاشىلىعى سالاسىمەن اينالىساتىن ازاماتتار مەن اۋدان تۇرعىندارىنا ۇلكەن قولداۋ. ەلباسىمىزدىڭ ساليقالى ساياساتىنىڭ ارقاسىندا وسى كۇنگە قول جەتكىزدىك. حالىقتىڭ تۇرمىس ساپاسىن ارتتىرۋ ماسەلەسى مەملەكەت باسشىسى ق.توقاەۆتىڭ جەكە باقىلاۋىندا. ءبىز وڭىردە مەملەكەتتىك باعدارلامالار بۇدان ءارى ناتيجەلى ورىندالاتىنىنا سەندىرەمىز. ەندىگى ماقسات – وسى سۋدىڭ يگىلىگىن كورىپ، مال شارۋاشىلىعىن دامىتۋ كەرەك. كانال بويىندا ورنالاسقان شارۋاشىلىقتار جۇگەرى، كوپجىلدىق ءشوپ ەگۋ سياقتى جۇمىستاردى جۇزەگە اسىرۋى قاجەت، - دەدى ءوڭىر باسشىسى قازتالوۆ اۋدانى حالقىمەن جۇزدەسۋ كەزىندە.

بۇل جوبا رەسەي فەدەراتسياسىنان كەلەتىن سۋعا تاۋەلدىلىكتى ازايتۋدى ماقسات ەتكەن. وسى ارقىلى ارنا بويىنداعى 130 مىڭ گەكتار جەر سۋلاندىرىلىپ، 22 توعان سۋعا تولادى. ولاردىڭ ارقايسىسى 10 مىڭ شارشى مەتر اۋماقتى قامتىماق. كانال شارۋا قوجالىقتارىنا مالدارىن سۋارۋعا جانە ەگىندى جەرلەردى سۋلاندىرۋعا مۇمكىندىك تۋادى.

كيروۆ-شەجىن كانالىنىڭ قۇرىلىس جۇمىستارىنا جاۋاپتى «قازسۋشار» مەكەمەسى باتىس قازاقستان وبلىستىق فيليالىنىڭ ديرەكتورى نۇربولات جۇماعاليەۆتىڭ ايتۋىنشا، جايىق سۋى قازىرگى كۇندە سەكۋندىنا 5 تەكشەمەتر جىلدامدىقپەن قاراوزەنگە قۇيىلىپ جاتىر.

التاي كولگىنوۆ وسى ساپارىندا اقپاتەر اۋىلىنداعى «رۋحاني جاڭعىرۋ» باعدارلاماسىنىڭ «تۋعان جەر» جوباسى اياسىندا سالىنعان فەلدشەرلىك-اكۋشەرلىك پۋنكتىنىڭ جۇمىسىمەن تانىستى. بۇل مەديتسينالىق پۋنكت عيماراتىن جەكە كاسىپكەر سامات حاسانوۆ ءوزىنىڭ 16 ملن. تەڭگە قاراجاتىنا سالىپ، اۋىل حالقىنا تارتۋ ەتكەن بولاتىن.

سوڭعى جاڭالىقتار

شىرقاۋ شىڭى شوقاننىڭ

رۋحانيات • كەشە

ۇقساس جاڭالىقتار