سوت جۇيەسى: بىلىكتىلىك پەن جاۋاپكەرشىلىك ارتادى
جۇما, 12 قازان 2012 7:01
«جوعارعى سوتتان باستاپ, بۇكىل سوت جۇيەسىنە وزدەرىنىڭ جاۋاپكەرشىلىگى مەن بىلىكتىلىگىن ارتتىرۋ, ءسويتىپ ءوز جۇمىسىن جەتىلدىرۋدى وزدەرى باستاۋ تالابى قويىلادى», دەپ اتاپ ايتىلعان بولاتىن مەملەكەت باسشىسىنىڭ قازاقستان حالقىنا بيىلعى جولداۋىندا. شىن مانىسىندە دە سۋديالىق ەتيكا نورمالارىن ساقتاۋ, سوت پروتسەسىنىڭ اشىقتىعى مەن جاريالىلىعىن قامتاماسىز ەتۋ جانە سۋديانىڭ كاسىبي بىلىكتىلىگى مەن شەبەرلىگىن قالىپتاستىرۋدىڭ ماڭىزى زور ەكەندىگى ايتپاسا دا تۇسىنىكتى. بۇگىنگى كۇننىڭ باستى ءارى وزەكتى تالابىنا اينالىپ وتىرعان بۇل ماسەلەلەر الماتى قالالىق سوتىندا وتكەن «سوتتار جانە باق» اتتى جيىندا كەڭىنەن ءسوز بولدى.
جۇما, 12 قازان 2012 7:01
«جوعارعى سوتتان باستاپ, بۇكىل سوت جۇيەسىنە وزدەرىنىڭ جاۋاپكەرشىلىگى مەن بىلىكتىلىگىن ارتتىرۋ, ءسويتىپ ءوز جۇمىسىن جەتىلدىرۋدى وزدەرى باستاۋ تالابى قويىلادى», دەپ اتاپ ايتىلعان بولاتىن مەملەكەت باسشىسىنىڭ قازاقستان حالقىنا بيىلعى جولداۋىندا. شىن مانىسىندە دە سۋديالىق ەتيكا نورمالارىن ساقتاۋ, سوت پروتسەسىنىڭ اشىقتىعى مەن جاريالىلىعىن قامتاماسىز ەتۋ جانە سۋديانىڭ كاسىبي بىلىكتىلىگى مەن شەبەرلىگىن قالىپتاستىرۋدىڭ ماڭىزى زور ەكەندىگى ايتپاسا دا تۇسىنىكتى. بۇگىنگى كۇننىڭ باستى ءارى وزەكتى تالابىنا اينالىپ وتىرعان بۇل ماسەلەلەر الماتى قالالىق سوتىندا وتكەن «سوتتار جانە باق» اتتى جيىندا كەڭىنەن ءسوز بولدى.
الماتى قالالىق سوتىنىڭ توراعاسى مەيرامبەك تايمەردەنوۆتىڭ پىكىرىنشە, «اقپارات الماسۋدىڭ ءبۇگىنگىدەي جاڭا ءارى ساپالى كەزەڭىندە سوت جۇيەسىندە جاريالىلىق پەن اشىقتىق باستى قاجەتتىلىككە اينالۋدا». سوندىقتان دا الماتى قالالىق سوتى كەلەشەكتە وسى باعىتتا بىرقاتار ءىس-شارالاردى جۇزەگە اسىرماق. «ۇلان-بايتاق قازاقستانداعى ەڭ ءىرى شاھار – الماتى تەك ينۆەستورلاردىڭ عانا ەمەس, قىلمىسقا يكەمى بارلاردىڭ, قۇقىق بۇزۋشىلاردىڭ دا نازارىن وزىنە اۋدارۋدا. ەكى ميلليونعا جۋىق تۇرعىنى بار قالادا, وكىنىشكە قاراي ءىرى قىلمىستار دا ورىن الىپ وتىرعانى جاسىرىن ەمەس.
مەنىڭ ويىمشا, كوپشىلىكتىڭ, قالا تۇرعىندارىنىڭ سوت بيلىگى, سوت تورەلىگىنىڭ جۇرگىزىلۋى باعىتىنداعى جۇمىستار جونىندە حاباردار بولۋىنىڭ قاجەتتىلىگى دە, بەرەرى دە مول ەكەندىگى ءسوزسىز. سوعان وراي, بۇگىنگى كۇنى ەسىگىن ايقارا اشىپ وتىرعان «ءباسپاسوز ورتالىعىندا» جۇيەلى تۇردە «اشىق ەسىك كۇنىن» ۇيىمداستىرۋ جوسپارلانىپ وتىر. تۇراقتىلىق سيپات الاتىن مۇنداي كەزدەسۋلەردىڭ مازمۇندى وتەتىندىگىنە سەنىم مول», دەدى مەيرامبەك تايمەردەنوۆ ءوز ويىن ورتاعا سالىپ.
ادام تاعدىرى تارازىعا تۇسەتىن سوت جۇمىسىنىڭ كۇردەلىلىگى مەن جوعارى جاۋاپكەرشىلىگى جانە الداعى ۋاقىتتا اتقارىلاتىن ءىس-شارالار تۋرالى جيىنعا قاتىسۋشىلار سالماقتى ويلارىمەن ءبولىستى. الماتى قالالىق سوتى قىلمىستىق ىستەر جونىندەگى اپەللياتسيالىق سوت القاسىنىڭ توراعاسى لۇقمات مەرەكەنوۆ, سۋديا شولپان قۇرمانبەكوۆا جانە باسقالار باق وكىلدەرىنىڭ كوپتەگەن ساۋالدارىنا جاۋاپ بەردى. سونىمەن, جالپىلاي العاندا ەلىمىزدەگى سوت بيلىگىنە كوپشىلىكتىڭ قۇرمەتىن قالىپتاستىرۋدىڭ ءتيىمدى جولدارى كاسىبي ءىسكەرلىكپەن جانە ىرگەلى ىزدەنىسپەن كەلمەك. كوپ ءتۇيىنى وسى.
باقىت بالعارينا,
«ەگەمەن قازاقستان».
الماتى.
