ارميالىق اۆياتسيا بولىمشەلەرىنىڭ قايتا توپتاسۋى بويىنشا ءىس-شارالاردىڭ ورىندالۋى بارىسىندا «شوڭجى» اۋەايلاعىنا قر قك قۇرلىق اسكەرلەرىنىڭ بولىمشەلەرىن اۋەدەن ءارى قاراي تاسالاۋ ءۇشىن كولىك-جاۋىنگەرلىك جانە جاۋىنگەرلىك تىكۇشاقتارى جىبەرىلدى.
سونداي-اق «شوڭجى» اۋەايلاعىندا س-295 اسكەري-كولىك اۆياتسياسىنىڭ ۇشاقتارى شوعىرلاندى. ونىڭ كومەگىمەن وپەراتسيا وتكىزىلەتىن شارتتى اۋداندارعا اسكەري م ۇلىكتى, وق-دارىلەر مەن تاكتيكالىق دەسانتتى جونەلتۋ جۇزەگە اسىرىلادى. ارميالىق اۆياتسيا تىكۇشاقتارىنىڭ قايتا توپتاسۋى قر قك اقك ااك قولباسشىسى اۆياتسيا گەنەرال-مايورى د. قوسانوۆتىڭ جەتەكشىلىگىمەن جۇزەگە اسىرىلدى.
«اۆياتسيالىق تەحنيكانىڭ ىستەن شىعۋى ورىن العان جوق. ۇشۋلار شتاتتىق رەجيمدە ءوتتى. جاڭادان كەلگەن ۇشۋ قۇرامى تاجىريبەلى ۇشقىش نۇسقاۋشىلارمەن بىرلەسە وقۋ-جاۋىنگەرلىك تاپسىرمانى ورىندادى جانە تاۋلى جەردە ۇشۋلاردى ورىنداۋ, سونداي-اق موتواتقىش بولىمشەلەردىڭ لەكتەرىنە ىلەسىپ ءجۇرۋ بويىنشا پراكتيكالىق تاجىريبە جيناقتادى», - دەدى اۆياتسيا گەنەرال-مايورى د. قوسانوۆ.
وقۋ-جاتتىعۋدىڭ نيەتى بويىنشا ارميالىق اۆياتسيا بولىمشەلەرى ءىس جۇزىندە توپتامالاردى كۇشەيتۋ, اۆياتسيانىڭ كۇشىن بىتىراتىپ جىبەرۋ جانە ۇلكەن قاشىقتىقتارعا قايتا توپتاستىرۋ بارىسىندا جان-جاقتى قامتاماسىز ەتۋ ماسەلەلەرىن پىسىقتايدى.
