قوعام • 18 ءساۋىر, 2019

قازۇۋ ماگيسترانتتارى وكسفورد ۋنيۆەرسيتەتىندە تاعىلىمدامادا ءجۇر

918 رەت كورسەتىلدى

بۇل كۇندەرى ءال-فارابي اتىنداعى قازاق ۇلتتىق ۋنيۆەرسيتەتىنىڭ ماگيسترانتتارى الەمنىڭ جەتەكشى جوعارى وقۋ ورىندارىىنڭ ءبىرى – وكسفورد ۋنيۆەرسيتەتىندە عىلىمي تاعىلىمدامادان وتۋدە. بىلتىر قازۇۋ رەكتورى, اكادەميك عالىم مۇتانوۆتىڭ وكسفورد ۋنيۆەرسيتەتىنە ساپارى كەزىندە ۋنيۆەرسيتەتتەر اراسىنداعى ارىپتەستىكتى دامىتۋ تۋرالى كەلىسىمگە قول جەتكىزگەن بولاتىن.

قازۇۋ ماگيسترانتتارى وكسفورد ۋنيۆەرسيتەتىندە تاعىلىمدامادا ءجۇر

بيىل ۇلتتىق ۋنيۆەرسيتەتتىڭ ماگيسترانتتارى ارنايى ازىرلەنگەن «عىلىمعا كىرىسپە» كۋرسى بويىنشا گەوگرافيا جانە قورشاعان ورتا مەكتەبىنە (School of Geography and the Environment) تاجىريبەدەن وتۋگە اتتاندى. تەوريا مەن تاجىريبەنى ۇشتاستىرعان بۇل مەكتەپتىڭ ەرەكشەلىگى – دارىستەر جەتەكشى پروفەسسورلاردىڭ زەرتتەۋلەرىنىڭ تۇساۋكەسەرلەرىمەن سۇيەمەلدەنەدى. ناقتى مىسالدارمەن عىلىمي جوبالاردىڭ ءادىسناماسى مەن جوسپارلانۋى زەرتتەلەدى.

ءوز كەزەگىندە قازۇۋ ماگيسترانتتارى دا عىلىمي زەرتتەۋلەرىن ۇسىنىپ وتىر. ساحارا ءشولى قۇمىنىڭ كوشۋىن, موڭعوليا تابيعاتى, ومان دارۋىشتەرىنىڭ ءومىرى مەن گيمالاي تاۋ جىنىستارىن زەرتتەۋ جۇمىستارىمەن تانىستى.

ماگيسترانتتار وكسفورد ۋنيۆەرسيتەتىنىڭ ىشكى قۇرىلىمىمەن تانىسۋعا ەرەكشە كوڭىل ءبولىپ, گەوگرافيا, بيولوگيا, حيميا, فيزيكا, ارحەولوگيا سياقتى ءارتۇرلى سالالارداعى زەرتتەۋشىلەردى بىرىكتىرەتىن زەرتحانالارعا باردى.

جاس ىزدەنۋشىلەرىمىز اتاقتى پروفەسسورلاردىڭ دارىستەرىن تىڭداپ قانا قويماي, تاجىريبەلىك تۇرعىدا ماشىقتانىپ, عىلىمي ىزدەنىستەرگە دەگەن قۇلشىنىستارىنا قۋات الىپ وتىر.

جىل سايىن الەم ۋنيۆەرسيتەتتەرىنىڭ رەيتينگىسىن جاريالايتىن QS حالىقارالىق اگەنتتىگىنىڭ مالىمەتتەرى بويىنشا, قازۇۋ وسى باعىتتاعى كورسەتكىشتەردىڭ تۇراقتى ءوسۋ ىرعاعىن كورسەتەدى. ۋنيۆەرسيتەت ەرازمۋس+, مەۆلانا, «اباي-ۆەرن», IAESTE سياقتى حالىقارالىق جوبالارعا بەلسەندى قاتىسادى. وسى وقۋ جىلىندا قازۇۋ-دىڭ مىڭنان اسا ماگيسترانتى جانە دوكتورانتى الەمدەگى ءبىلىم بەرۋ مەن عىلىمدا كوش باستاپ تۇرعان شەتەلدىك جەتەكشى ۋنيۆەرسيتەتتەردە عىلىمي تاعىلىمدامادان وتەدى. 



الماتى