الماتىداعى «دوستىق ۇيىندە» پوەزيا جانە پروزا جيناقتارىنىڭ ءسۇيىنشى داناسىنىڭ تانىستىرىلىمى ءوتىپ, وندا شىعارمالارى العاشقى انتولوگياعا ەنگەن قالامگەرلەرمەن قاتار ۇلىبريتانيا, يسپانيا, فرانتسيا, رەسەي, قىتاي, ەگيپەت جانە تاياۋ شىعىس ەلدەرىنىڭ اۋدارماشىلارى, ادەبيەتشىلەرى, باسپاگەرلەر قاتىسىپ, وسىناۋ يگى ءىستىڭ بارىسىنا قاتىستى پىكىرلەرىمەن ءبولىستى.
شارانىڭ اشىلۋ سالتاناتىندا قر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ايدا بالاەۆا ءسوز سويلەپ, قازاق قالامگەرلەرىن الەم تىلىنە اۋدارۋدا جاسالعان جۇمىستاردىڭ بارىسىنان حابار ەتتى. تاۋەلسىزدىك جىلدارىنداعى قازاق ادەبيەتى مەن مادەنيەتى, مۋزىكاسى مەن بەينەلەۋ ونەرىن, حورەوگرافيا, كينو جانە تەاتر سالاسىنداعى جەتىستىكتەرىن الەمگە تانىتۋدى ماقسات ەتەتىن وسىناۋ جوبا الداعى ۋاقىتتا جالعاسىن تابا بەرەتىندىگىنە توقتالعان ايدا عالىمقىزى «قازاق ادەبيەتىنىڭ ۇزدىك ۇلگىلەرىن بۇۇ-نىڭ 6 تىلىنە اۋدارىپ, تاراتۋ – ۇلت تاريحىندى بۇرىن-سوڭدى بولماعان, قازاق مادەنيەتىن الەمگە تانىستىرۋ تۇرعىسىنان تەڭدەسى جوق باستاما ەكەنىن ايتتى. 160 قازاقستاندىق اۆتوردىڭ تاڭدامالى شىعارمالارى ءبىر مەزەتتە الەمنىڭ ەڭ ءىرى 6 تىلىنە اۋدارىلىپ, سول تىلدەردە جۇمىس ىستەيتىن ەڭ بەدەلدى باسپالاردان شىعىپ, 5 قۇرلىقتاعى 90-نان اسا ەلدىڭ جوعارى وقۋ ورىندارى, كىتاپحانالارى مەن عىلىمي ورتالىقتارىنا جەتەدى. جالپى سانى 2 ميلليارد 600 ميلليون حالىق قازىرگى قازاق ادەبيەتىنىڭ جاۋھارلارىمەن تانىسۋعا مۇمكىندىك الادى», دەپ اتاپ ءوتتى.
اۋدارما باستالماستان بۇرىن جوباعا قاتىسۋشى شەتەلدىك باسپاگەرلەر, اۋدارماشىلار ارنايى كەلىپ, قازاقستاننىڭ تاريحى مەن مادەنيەتىمەن تانىسىپ, شىعارما اۆتورلارىمەن سۇحبات الاڭىندا باس قوسقان. تۋىنداعان سۇراقتاردى تالقىلاپ, اۋدارمانى تۇپنۇسقا ماتىنگە مەيلىنشە جاقىنداتىپ, ونىڭ كوركەمدىك دەڭگەيگە جەتكىزۋدەگى ەڭبەكتەرى ۇشان-تەڭىز.
قازىرگى قازاق ادەبيەتى جيناقتارىن اعىلشىن تىلىنە اۋدارۋ, باسىپ شىعارۋ جانە تاراتۋ جۇمىسى كەمبريدج ۋنيۆەرسيتەتى باسپاسى, يسپان تىلىندە سويلەتۋگە يسپانيا مادەنيەت مينيسترلىگى قولداۋ كورسەتسە, «سەرۆانتەس ينستيتۋتىنىڭ» كەڭەسى بويىنشا كىتاپتاردى باسىپ, تاراتۋعا ادەبي اۋدارماعا ماماندانعان «Visor» باسپاسى جاۋاپتى, ال فرانتسۋز تىلىندەگى نۇسقاسىن دايىنداۋعا پاريج قالاسىنىڭ مەرياسى قولداۋ جاساپ, جيناقتاردى شىعارۋ «ميشەل دە مول» فرانتسۋز باسپا ۇيىنە تاپسىرىلعان. ال ورىس تىلىندەگى اۋدارما مەن ادەبي رەداكتسيا جۇمىسىن ۇيلەستىرۋگە رەسەي جازۋشىلار وداعىنىڭ ماسكەۋلىك ۇيىمى, جيناقتى باسىپ شىعارۋ مەن تاراتۋعا م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ باسپاسى اتسالىسۋدا. قىتاي تىلىنە اۋدارۋ, باسىپ شىعارۋ جانە تاراتۋعا قىتاي حالىق رەسپۋبليكاسىنىڭ «ۇلتتار باسپاسى», اراب الەمىنە ەگيپەت اراب رەسپۋبليكاسىنىڭ مادەنيەت جانە ءبىلىم ورتالىعىنىڭ قولداۋىمەن «MediaHub» باسپاسى تانىستىراتىن بولادى.
شارا اياسىندا شىعارمالارى شەت تىلدەرىنە اۋدارىلعان قابدەش ءجۇمادىلوۆ, دۋلات يسابەكوۆ, مۇحتار شاحانوۆ, ەسەنعالي راۋشانوۆ سىندى قالامگەرلەر ءسوز الىپ, يگى شاراعا ريزاشىلىقتارىن ءبىلدىردى.
جوبا قر مادەنيەت جانە سپورت مينيسترلىگىنىڭ تاپسىرىسى بويىنشا «ۇلتتىق اۋدارما بيۋروسى» قوعامدىق قورىنىڭ ۇيلەستىرۋىمەن جۇزەگە اسىپ, سەرىكتەس-ۇيىمدار اۋدارما, باسىپ شىعارۋ, تاراتۋ-ناسيحاتتاۋ جۇمىستارىنا جالپى سانى 70-تەن اسا مامان جۇمىلدىرىلعان.
