ەكى مىڭ جىلدان استام كونە تاراز شاھارىنىڭ باي تاريحى ۇلتتىق قازىنا. مۇنداعى ءاربىر تاريحي نىساننىڭ وزىندىك تاريحى مەن تاعدىرى بار. ال كەلۋشىلەردى ءاربىر نىسانمەن ەرەكشە تانىستىرعان ەكسكۋرسوۆود جامال اقپان اڭىزعا اينالعان قاراحان كەسەنەسىنىڭ 1906 جىلعا دەيىن ءوزىنىڭ ساۋلەتتىك كەلبەتىن جوعالتىپ كەلگەنىن دە ايتىپ ءوتتى. ءارى قاراحان جانە ايشا ءبيبى اڭىزىنىڭ سان ءتۇرلى نۇسقالارىن دا اڭگىمەلەدى. سونىمەن قاتار, ورتاعاسىرلىق تاريحي جادىگەرلەرگە جاتاتىن ورنەكتى شىراعداندار, قىش قۇمىرالار سياقتى بىرقاتار دۇنيەلەر دە تانىستىرىلدى. بۇدان كەيىن «ەجەلگى تاراز ەسكەرتكىشتەرى» تاريحي-مادەني قورىق-مۋزەيىنىڭ ديرەكتورى نۇرلان بىقىباەۆ جۋرناليستەرگە اشىق سۇحبات بەردى. «قازىرگى تاڭدا «ەجەلگى تاراز ەسكەرتكىشتەرى» تاريحي-مادەني قورىق-مۋزەيىنىڭ قاراۋىنا اعىمداعى جىلدىڭ مەجەسىندە 30 رەسپۋبليكالىق دارەجەدەگى تاريحي-مادەني نىساندار تىركەلگەن. ونىڭ ىشىندە 5 تاريحي مۇرا يۋنەسكو-نىڭ بۇكىلالەمدىك مادەني مۇرالار تىزىمىنە الىنعان. ولار اقىرتاس, قۇلان, قوستوبە, ورنەك جانە اقتوبە-بالاساعۇن قالاشىقتارى. قورىق-مۋزەيدىڭ نەگىزگى قىزمەتى – تاريحي-مادەني مۇرالاردى ساقتاۋ, ناسيحاتتاۋ, قايتا جاڭعىرتۋ بولىپ تابىلادى. ەندىگى ماقسات – تاريحي نىساندارىمىزدى جۋرناليستەردىڭ كوزىمەن جاڭا فورماتتا حالىققا ناسيحاتتاۋ» دەدى نۇرلان بىقىباەۆ.
جامبىل وبلىسى
