ايماقتار • 17 ءساۋىر، 2019

جىمپيتىدا قالامدار كورمەسى اشىلدى

899 رەت كورسەتىلدى

باتىس قازاقستان وبلىسى سىرىم اۋدانىنىڭ ورتالىعى جىمپيتى سەلوسىندا اۋداندىق تاريحي-ولكەتانۋ مۋزەيىنىڭ ۇيىمداستىرۋىمەن «قالام الدىم قولىما، تاريحىمدى كورمەككە!» اتتى كورمە اشىلدى.

كۇنباتىس الاشوردانىڭ ورتالىعى بولعان تاريحي كەنتتەگى سىرىم دات ۇلى اتىنداعى تاريحي-ولكەتانۋ مۋزەيىندە اشىلعان ەرەكشە كورمەگە 40-قا جۋىق قالام قويىلىپتى. «جازۋ ەۆوليۋتسياسىنىڭ تاريحى» دەپ باعالاۋعا بولاتىن كورمەدەن سياعا ماتىرىپ جازاتىن كونە قالامۇش پەن سياساۋىتتان باستاپ، ءتۇرلى قادەسىي – ونەر ەسكەرتكىشتەرىن دە كورۋگە بولادى.

- قالامساپ – ءبىر كەزدەرى ساۋاتتى، زيالى ادامنىڭ كۇندەلىكتى قولداناتىن بۇيىمى ەدى. بۇگىندە كومپيۋتەر مەن سمارتفون ومىرىمىزگە ابدەن ەنىپ، قالاممەن جازۋدى ۇمىتىپ تا بارامىز. بۇل كورمەنى ۇيىمداستىرۋداعى ماقساتىمىز – وتكەندى ۇمىتپاۋ، قاراپايىم قۇرالمەن-اق قايتالانباس تاريح جاساعان اعا ۇرپاقتىڭ مىقتىلىعىن جاستارعا ءتۇسىندىرۋ بولاتىن، - دەيدى مۋزەي ديرەكتورى ايناگۇل ويشىباەۆا.

كورەرمەن نازارىنا ۇسىنىلعان ەڭ كونە قالامۇشتىڭ «جاسى» 60-تان اسقان ەكەن. كورمەنىڭ اشىلۋ سالتاناتىنا كەلگەن سىرىم اۋدانىنىڭ ارداگەرلەر كەڭەسىنىڭ توراعاسى ع.كاناليەۆ، ارداگەر ۇستاز ك.فەديانين اقساقالدار ءۇشىن بۇل جادىگەرلەر جاستىق شاعىنىڭ كۋاسىندەي بولدى. اعالار قالامۇش پەن سيا ساۋىت تۋرالى ءوز باسىنان وتكەن نەبىر قىزىقتى جايتتى ورتاعا سالدى.

جىمپيتىداعى كورمەدە اق جايىق وڭىرىنەن شىققان بەلگىلى قالامگەرلەر جۇبان مولداعاليەۆ، ساعىنعالي سەيىتوۆ، حامزا ەسەنجانوۆ، باقتىعۇل ويشىباەۆ ۇستاپ تۇتىنعان قالامدار كورگەن جاننىڭ كوزىن قۋانتتى. قىزىقتى قادەسىيلار، وڭىرگە بەلگىلى دارىگەر كەللەردىڭ زىمىران ءپىشىندى قالامسابى، حاميت عابدۋلليننىڭ ءبىر قارانداش، ءبىر قالامساپتان تۇراتىن جيىنتىعى، باتىر قىز ءاليا مولداعۇلوۆانىڭ مەرەيتويىنا ارنايى شىعارىلعان سىي-قالام، ساعىنعالي سەيىتوۆكە سىيلانعان الىپ قالام، «اق جايىق» تريلوگياسىنىڭ اۆتورى حامزا ەسەنجانوۆتىڭ شەتەلدىك قارىنداشى، وسى توپىراقتىڭ تۋماسى، تارلانبوز قادىر مىرزا ءالىنىڭ ۇشتى قارىنداشى – بۇلاردىڭ ءبارى كەشەگى كۇننىڭ كوزى، قۇندى تاريحي جادىگەر ەكەنى ءسوزسىز.

جىمپيتىداعى قالامدار كورمەسى ءبىر ايعا سوزىلماق.


باتىس قازاقستان

سوڭعى جاڭالىقتار

سىردىڭ سۋى تومەندەپ بارادى

ايماقتار • بۇگىن، 17:27

دوللار ارزاندادى

قارجى • بۇگىن، 16:56

الماتى ماڭىندا جەر سىلكىندى

ايماقتار • بۇگىن، 16:38

قازاقستاندا ەت قىمباتتادى

قوعام • بۇگىن، 15:10

ەلىمىزدە كيىك سانى كوبەيىپ كەلەدى

قازاقستان • بۇگىن، 14:41

ۇقساس جاڭالىقتار