ۇكىمەت باسشىسىنىڭ ورىنباسارى مىستى قالاداعى قۇرامىنا 300 ورىندىق ستاتسيونار مەن ءبىر اۋىسىمدا 800-گە جۋىق ادامدى قابىلداي الاتىن ەمحانا ەنەتىن مەديتسينالىق ورتالىقتا بولىپ, ەمدەۋ مەكەمەسىنىڭ تىنىس-تىرشىلىگىمەن تانىستى.
بۇدان كەيىن گۇلشارا ابدىحالىقوۆا قالالىق جۇمىسپەن قامتۋ ورتالىعىندا بولدى. وتكەن جىلى اتالعان ورتالىقتىڭ كومەگىمەن جەزقازعان قالاسىندا 2728 ادام جۇمىسقا ورنالاسقان. قىسقا مەرزىمدى كاسىپتىك وقۋلارعا 243 ادام جىبەرىلسە, «باستاۋ-بيزنەس» جوباسى اياسىندا 100 ادام كاسىپكەرلىك بويىنشا ءبىلىم الىپ جاتىر.
– جەزقازعاندا 1,5 مىڭنان استام كوپبالالى وتباسى بار. ولاردىڭ 300-ءى الەۋمەتتىك از قامتىلعاندار ساناتىنا جاتادى. قازىر قالادا جاڭا ەرەجەلەر بويىنشا اتاۋلى الەۋمەتتىك كومەكتى بەرۋگە ازىرلىك جۇمىستارى ءجۇرىپ جاتىر, – دەپ اتاپ ءوتتى پرەمەر-ءمينيستردىڭ ورىنباسارى.
جۇمىس ساپارى بارىسىندا ۇكىمەتتىك توپ مۇشەلەرى, سونداي-اق, جەزقازعانداعى «ەرتوستىك» بوبەكجايىنىڭ جانە مەكتەپ وقۋشىلارى باعدارلامالاۋ مەن روبوت تەحنيكاسى بويىنشا ءبىلىم الاتىن «IT TECHNOLOGY FOR YOU» ءبىلىم ورتالىعىنىڭ جۇمىسىمەن تانىستى.
بۇدان كەيىن ۆيتسە-پرەمەر جەزقازعاندا ازاماتتاردى جەكە ماسەلەلەرى بويىنشا قابىلدادى. سونان سوڭ گۇلشارا ابدىحالىقوۆا جەزقازعان, ساتباەۆ, قاراجال قالالارىنىڭ جانە جاڭاارقا مەن ۇلىتاۋ اۋداندارى اكىمدەرىنىڭ, جەزقازعان ءوڭىرىنىڭ ءىرى كاسىپورىن, بيزنەس قۇرىلىمدار مەن كاسىپوداق ۇيىمدارى جەتەكشىلەرىنىڭ قاتىسۋىمەن وتكەن جيىنعا قاتىستى.
پرەمەر-ءمينيستردىڭ ورىنباسارى باستاعان ۇكىمەتتىك توپتىڭ قاراعاندى وبلىسىنا جۇمىس ساپارى ەكى كۇنگە سوزىلادى.
قاراعاندى وبلىسى
