بايقاۋ «تۋعان ەلگە ساياحات» بالالار ەكسكۋرسيالىق پويىزى» جوباسىنا دارىندى بالالاردى ىرىكتەۋگە ارنالعان. بايقاۋعا 11 جاستان 15 جاس ارالىعىنداعى «مەن ءوز وڭىرىمدە نەنى وزگەرتكىم كەلەدى» نەمەسە «ءوز قالامدى نە ءۇشىن جاقسى كورەمىن» تاقىرىبىندا ۆيدەوۇندەۋ, شىعارما نەمەسە ولەڭ شۋماقتارىن جازعان بالالار قاتىسا الادى. جۇمىستارى مازمۇندىلىعى, بىرەگەيلىگى جانە شىعارماشىلىق كوزقاراسىمەن ەرەكشەلەنگەن قاتىسۋشىلار قازاقستان بويىنشا ەكسكۋرسيالىق تۋرعا جولداما الادى.
بايقاۋ 2019 جىلدىڭ 15 ءساۋىر جانە 17 مامىر ارالىعىندا وتەدى. شىعارماشىلىق جۇمىستار poezd2019@list.ru ەلەكتروندىق پوشتاسى ارقىلى قابىلدانادى. ۇمىتكەرلەر بايقاۋعا تەك ءبىر عانا جۇمىس جولداي الادى. ناتيجەلەردى قورىتىندىلاۋ مەن جەڭىمپازداردى انىقتاۋ 2019 جىلدىڭ 17-25 مامىر ارالىعىندا وتەدى.
«تۋعان ەلگە ساياحات» بالالار ەكسكۋرسيالىق پويىز» جوباسى بالالاردىڭ جان-جاقتى دامۋىنا, قورشاعان الەمگە قىزىعۋشىلىعىن ارتتىرۋعا, ەلدىڭ تاريحي جانە ساۋلەت ەسكەرتكىشتەرىمەن تانىسىپ, ءپاتريوتيزمدى نىعايتۋعا باعىتتالعان. جوبا شەڭبەرىندە بالالار ەلىمىز بويىنشا تەگىن ەكسكۋرسيالىق تۋرعا اتتانىپ, قازاقستاننىڭ تانىمدىق جانە تاريحي ەسكەرتكىشتەرى ورنالاسقان وڭىرلەرىن ارالايدى. پويىز نۇر-سۇلتان – بايقوڭىر – تاراز – الماتى – بالحاش – نۇر-سۇلتان باعىتى بويىنشا جۇرەدى.
بۇدان باسقا, وقۋشىلارمەن بارلىق تۋر بويى تاربيەشىلەر مەن پەداگوگتار جۇمىس جاسايدى, بالالارعا ارنايى قىزىعۋشىلىقتارى بويىنشا ءتۇرلى ينتەللەكتۋالدى ۇيىرمەلەر, اعىلشىن ءتىلى كۋرستارى, سپورتتىق ويىندار جانە ت.ب. قاراستىرىلعان.
