سول كۇنى نە بولىپ ەدى؟
جۇما, 8 ماۋسىم 2012 7:08
كەشە باس پروكۋراتۋرانىڭ رەسمي وكىلى نۇرداۋلەت ءسۇيىندىكوۆ الماتى وبلىسى, الاكول اۋدانىندا ورنالاسقان «ارقانكەرگەن» ۋاقىتشا شەكارا بەكەتىندە ورىن العان قايعىلى وقيعاعا بايلانىستى تەرگەۋمەن انىقتالعان اقپاراتتى جاريالادى. وندا 15 ادام قايتىس بولعان ەدى. بۇل وقيعاعا بايلانىستى وسى ۋاقىتقا دەيىن ءتۇرلى قاۋەسەت تاراتىلىپ كەلگەنى بەلگىلى. دەگەنمەن, ەندى ءتيىستى قۇقىق قورعاۋ ورگاندارىنىڭ تەرگەۋىمەن كەلەسى ءمان-جايلار انىقتالىپتى.
جۇما, 8 ماۋسىم 2012 7:08
كەشە باس پروكۋراتۋرانىڭ رەسمي وكىلى نۇرداۋلەت ءسۇيىندىكوۆ الماتى وبلىسى, الاكول اۋدانىندا ورنالاسقان «ارقانكەرگەن» ۋاقىتشا شەكارا بەكەتىندە ورىن العان قايعىلى وقيعاعا بايلانىستى تەرگەۋمەن انىقتالعان اقپاراتتى جاريالادى. وندا 15 ادام قايتىس بولعان ەدى. بۇل وقيعاعا بايلانىستى وسى ۋاقىتقا دەيىن ءتۇرلى قاۋەسەت تاراتىلىپ كەلگەنى بەلگىلى. دەگەنمەن, ەندى ءتيىستى قۇقىق قورعاۋ ورگاندارىنىڭ تەرگەۋىمەن كەلەسى ءمان-جايلار انىقتالىپتى.
2012 جىلعى 10 مامىردا شەكارا قىزمەتىنىڭ 3-ءشى شەكارا جاساعىنىڭ 15 ادامى, ونىڭ ىشىندە 1 ساردار, 3 كەلىسىم-شارت بويىنشا جانە 11 مەرزىمدى قىزمەتتەگى اسكەري قىزمەتكەرلەر «ارقانكەرگەن» ۋاقىتشا شەكارا بەكەتىندە مەملەكەتتىك شەكارانى كۇزەتۋ ءۇشىن كەزەكشىلىككە تۇسەدى. اتالعان بەكەت ەلدى مەكەندەردەن الشاق ءارى 3 مىڭ مەترگە جۋىق بيىكتىكتەگى تاۋدا ورنالاسقان. ال اۋدان ورتالىعى ۇشارالعا دەيىن قاشىقتىق 224 شاقىرىم.
سودان 30 مامىردا شەكاراشىلار كەزەكتى بايلانىسقا شىعۋ كەرەك ەدى. بىراق حاباردىڭ ءۇزىلۋىنە بايلانىستى بەكەتكە كەزەكشى قۇرام جىبەرىلەدى. ولار وقيعا ورنىنا كەلگەندە ورتەنگەن كازارماعا تاپ بولدى. بۇل تۋرالى شۇعىل تۇردە جاساققا باياندالادى.
ارتىنشا وقيعا ورنىنا تىكۇشاقپەن دەرەۋ جەدەل توپ ۇشىپ شىقتى, ونىڭ قۇرامىندا شەكارا جاساعىنىڭ باسشىلىعى, اسكەري پروكۋراتۋرانىڭ, ۇلتتىق قاۋىپسىزدىك جانە ىشكى ىستەر ورگاندارىنىڭ وكىلدەرى بولدى. ولار وقيعا بولعان جەردى قاراعاندا ورتەنگەن كازارمادا جانە وفيتسەرلەر ۇيىندە 13 ادامنىڭ جانىپ كەتكەن دەنەسى تابىلدى. ءبىر كۇيگەن ءمايىت وزەن بويىندا جاتقان.
سونداي-اق, «ارقانكەرگەن» بەكەتىنەن 150 مەتر قاشىقتىقتا ورنالاسقان شارۋاشىلىق كۇزەتشىسى ۇيىنەن اۆتوماتتان بىرنەشە رەت اتىلىپ ولتىرىلگەن رۋسلان كيمنىڭ ءمايىتى شىعارىلدى. قازىرگى كەزدە گەندىك ساراپتامانى پايدالانا وتىرىپ, 10 اسكەريلەردىڭ تۇلعاسى انىقتالدى.
وسى دەرەك بويىنشا 30 مامىردا تالدىقورعان گارنيزونىنىڭ اسكەري پروكۋرورى قىلمىستىق كودەكستىڭ 96-بابى 2-تارماعىنىڭ «ا» تارماقشاسى, ياعني ەكى جانە ودان كوپ كىسىنى ءولتىرۋ بويىنشا قىلمىستىق ءىس قوزعادى. ءىس ارنايى اسكەري پروكۋرور باسشىلىق ەتەتىن ۆەدومستۆوارالىق جەدەل-تەرگەۋ توبىمەن تەرگەلۋدە.
العاشقىدا ورتەنگەن جايلاردان بەكەت كومانديرى كەرەەۆكە تيەسىلى ءبىر «ماكاروۆ» تاپانشاسىنان باسقا مارقۇم شەكاراشىلاردىڭ قولىندا بولعان بارلىق قارۋلار جانە شاتقالداردىڭ ءبىرىندە ىزدەۋ توبىمەن بەكەتتەن جوعالعان 5 قىزمەتتىك اتتار دا تابىلعان ەدى.
ال 4 ماۋسىمدا شەكارا جاساعىمەن جەرگىلىكتى شوپاندار قىستاعىنىڭ بىرىندە 1992 جىلى تۋعان, «ارقانكەرگەن» بەكەتى شەكاراشىلارىنىڭ ءبىرى چەلاح ۆلاديسلاۆ ۆالەرەۆيچ ۇستالدى. ودان كاپيتان كەرەەۆتىڭ ازاماتتىق كيىمدەرى, «ماكاروۆ» تاپانشاسى, نوۋتبۋگى جانە قايتىس بولعان كەيبىر اسكەريلەردىڭ ۇيالى تەلەفوندارى الىندى.
ادۆوكاتتىڭ قاتىسۋىمەن جاۋاپ الۋ كەزىندە چەلاح ءوزىنىڭ اسكەري قىزمەتتەستەرىن جانە رۋسلان كيمدى ولتىرگەندىگىن مويىندادى. چەلاحتىڭ ايتۋىنشا, قىلمىستى جاساۋدىڭ سەبەبى رەتىندە ىشكى تولعانىستار جانە ەسىنىڭ تۇسىندىرۋگە جاتپايتىن بۇزىلۋ جاعدايى سەبەپ بولعان. قىلمىستى جاساۋعا كومەكتەسكەندەر مەن قاتىسۋشىلاردىڭ بار بولعاندىعىن چەلاح ءۇزىلدى-كەسىلدى تەرىستەۋدە.
ونىڭ جاۋابىنا سايكەس, قاندى قىلمىس 2012 جىلعى 28 مامىردا شامامەن تاڭعى ساعات 5-تەر شاماسىندا ساقشىدان باسقا بارلىق شەكاراشىلار ۇيقىدا جاتقان كەزدە جاسالعان. چەلاح سول ءتۇنى كازارمادا كەزەكشىلىك ەتكەندىكتەن قارۋ ۇستاۋعا مۇمكىندىگى بولعان.
چەلاحتىڭ ءوزىنىڭ ءتۇسىندىرۋى بويىنشا, ول اۋەلى بەكەت اۋماعىنان ساقشىنى الداپ شاقىرىپ الىپ, اتىپ ولتىرگەن. سودان كەيىن كازارماعا ورالىپ, ونداعى قالىڭ ۇيقى قۇشاعىندا جاتقان قالعان قىزمەتتەستەرىنە تۇگەلدەي وق جاۋدىرعان. سوڭىندا اڭشى ءۇيىندەگى قورىقشى رۋسلان كيمدى ولتىرگەن. مارقۇمداردىڭ ءبارى دە قارۋسىز بولعان كورىنەدى جانە ادام ءولتىرۋشىنىڭ ايتۋى بويىنشا, ۇيقىدان ويانىپ كەتكەن ونىڭ كەيبىر قىزمەتتەستەرى وزدەرىنە چەلاحتىڭ قارۋ باعىتتاعانىن شىنايى قابىلداماعان.
ادامدار ولتىرىلگەننەن كەيىن قىلمىس ىزدەرىن جاسىرۋ ماقساتىندا چەلاح ارقيلى تۇستان اۆتوماتتان وق جاۋدىرىپ, كازارما بولمەلەرىندە وقتاردى شاشىپ, جانارماي توگىپ, بەكەتتىڭ بارلىق شارۋاشىلىق قۇرىلىستارىنا ءورت قويعان. وسىنداي تاسىلمەن بەكەت اۋماعىنان تىسقارى جاتقان ساقشى ءمايىتى دە ورتەلگەن. بۇدان سوڭ چەلاح «ماكاروۆ» تاپانشاسىن, ازىق-ت ۇلىك جانە قىزمەتتەستەرىنىڭ بىرقاتار جەكە زاتتارىن, ياعني ۇيالى تەلەفوندار, نوۋتبۋك, اقشا الىپ, كاپيتان كەرەەۆتىڭ ازاماتتىق كيىمىن كيىپ, وقيعا بولعان جەردەن تايىپ وتىرعان.
قازىرگى ۋاقىتتا چەلاحتىڭ بەرگەن جاۋاپتارىنىڭ شىنايىلىعى تەكسەرىلۋدە, ال بەكەتكە سىرتتان شابۋىل جاساۋ بەلگىلەرى تەرگەۋمەن انىقتالعان جوق. سونداي-اق, تەرگەۋ بارىسىندا بارلىق قاجەتتى ساراپتامالىق زەرتتەۋلەر ءجۇرگىزىلۋدە, سونىڭ ىشىندە ۆلاديسلاۆ چەلاحتىڭ جەكە باسىنا قاتىستى كەشەندى پسيحولوگيالىق ساراپتاما دا جۇرگىزىلەتىن بولادى.
ساراپشىلار 11 اسكەري قىزمەتكەردىڭ جەكە باستارىن انىقتادى جانە ساراپتاما شەكاراشىلاردىڭ دا, قورىقشىنىڭ دا الكوگولدى ىشىمدىك ىشپەگەنىن دالەلدەدى. سول سياقتى ءورت-تەحنيكالىق ساراپتاما كورسەتكەندەي, ەشقانداي جارىلىس بولماعان جانە جارىلعىش زاتتاردى پايدالانۋ دەرەكتەرى انىقتالماعان.
سونىمەن قاتار, «سارىبوكتەر» شەكارا بەكەتىنىڭ باستىعى الەكسەي فومينگە قاتىستى قىلمىستىق ءىس قوزعالدى. فومين ءۇستىمىزدەگى جىلعى مامىردىڭ 28-ءى مەن 30-ى ارالىعىندا «ارقانكەرگەن» شەكارا بەكەتىمەن بايلانىستىڭ بولماعانىن قاساقانا جاسىرعانى جانە ونىڭ سەبەپتەرىن انىقتاۋ مەن قالپىنا كەلتىرۋ بويىنشا شارا قولدانباعانى ءۇشىن ايىپتالۋدا.
سوت سانكتسياسىمەن ول قاماۋعا الىندى. قازىرگى كۇنى بولعان بارلىق جاعدايدى انىقتاۋعا باعىتتالعان باسقا دا جەدەل-تەرگەۋ شارالارى جۇرگىزىلۋدە. وقيعا بولعان جەرگە جاقىن اۋدانداردا جەدەل-تەرگەۋ, ىزدەۋ شارالارى جالعاسۋدا. بۇل وقيعانىڭ تەرگەلۋ بارىسىنا قاتىستى باسقا اقپارات قوسىمشا حابارلاناتىن بولادى, دەدى رەسمي وكىل.
الەكساندر تاسبولاتوۆ,
«ەگەمەن قازاقستان.
