كەزدەسۋ بارىسىندا ايدىن ايىمبەتوۆ قازاقستانداعى عارىش سالاسىنىڭ جوبالارى جايلى اڭگىمەلەدى. «قازاقستاننىڭ عارىش سالاسىنداعى ەڭ ۇلكەن جاڭالىعى – جەلتوقسان ايىندا جەردى جاساندى زوندتاۋدىڭ ەكى سپۋتنيگىن ۇشىرۋ. ارينە, قازاقستاندىق عارىش عىلىمى دامىپ كەلەدى. ەلوردادا ۇلتتىق عارىش كەشەنى سالىندى. قازىر قازاقستاننىڭ التى ءوز سپۋتنيگى بار. «بايقوڭىر» عارىش ايلاعىندا «بايتەرەك» كەشەنىنىڭ قۇرىلىسى ءجۇرىپ جاتىر. بۇل ۇزاق مەرزىمدى جوبالاردىڭ پايداسىن جاقىن ارادا كورەمىز دەۋ – ابەستىك. عارىشتى دامىتۋعا سالىنعان قاراجات اراعا ءبىراز ۋاقىت سالىپ, ون ەسە ناتيجەسىن بەرەدى دەپ ايتۋعا بولادى», – دەيدى ا.ايىمبەتوۆ.
بالالاردى عارىشكەرلەردىڭ نەمەن تاماقتاناتىنى, وتريادتارعا قالاي كىرۋگە بولاتىندىعى, ۇشقىشتار ۇشۋ كەزىندە قانداي اۋىرتپالىقتاردى باستان وتكەرەتىندىگىنە قاتىستى سۇراقتار قىزىقتىردى. سونداي-اق, ايدىن ايىمبەتوۆ عارىشكەرلەر تەك قانا تيۋبيك تاعامىن جەيتىنى تۋرالى اقپاراتتى جوققا شىعاردى.
«بۇل وتكەننىڭ ەنشىسىندە قالدى. شىن مانىندە, عارىشكەرلەرگە ارنالعان اس ءمازىرى وتە ءدامدى! ۇشۋ كەزىندە ءبىز ءار ەلدىڭ عارىشكەرلەرىمەن دوس بولدىق. ءبىزدىڭ راتسيوندا جاپوندىق كالمار جانە امەريكاندىق شوكولاد بولدى. ءبىز قىمىز, قۇرت جانە باسقا دا ونىمدەرىمىزدى قازاقستاننان سالەمدەمە رەتىندە ۇسىندىق», – دەدى ايدىن ايىمبەتوۆ.
كەزدەسۋگە قاتىسقان نازىك قىز-كەلىنشەكتەر: «عارىشقا ايەلدەردى نەلىكتەن سيرەك جىبەرەدى؟» دەپ سۇرادى. ايىمبەتوۆتىڭ ايتۋىنشا, بۇل كوبىنەسە دەنساۋلىق پەن فيزيكالىق جۇكتەمەلەرگە بايلانىستى.
«الايدا, ايەلدەر بۇرىننان عارىشقا ساپار شەگىپ كەلەدى. ايەلدەر ۇشۋ بارىسىندا كۇردەلى عىلىمي ەكسپەريمەنتتەرگە قاتىسىپ, ەكيپاجدىڭ ناعىز اشەكەيى بولىپ تابىلادى», – دەيدى ايدىن ايىمبەتوۆ.
