بۇگىندە اعايىندى كۇلمەنوۆتەردىڭ قولىنان شىققان ونەر بۇيىمدارى ەلىمىز عانا ەمەس, كوپتەگەن شەتەلدەرگە بەلگىلى. كۇلمەنوۆتەردىڭ شىعارماشىلىعى تۋرالى فرانتسيا, اقش, گەرمانيا, ۆەنگريا, تۋنيس, تۇركيا, پولشا سياقتى ەلدەردىڭ جۋرناليستەرى كوپتەگەن عىلىمي-دەرەكتى فيلمدەر تۇسىرگەن.
تومەندە تەمىرشى-شەبەرلەردىڭ شىعارماشىلىق جەتىستىكتەرى ۇسىنىلىپ وتىر:
اعايىندى ماحمۇت, تۇرسىنجان, ايتبەرگەن كۇلمەنوۆتەر قازاقستان ديزاينەرلەر وداعىنىڭ مۇشەلەرى, قر قازىرگى زامانعى قارۋ ونەرىنىڭ نەگىزىن قالاۋشىلارى, XII دۇنيەجۇزىلىك جاستار جانە ستۋدەنتتەر فەستيۆالىنىڭ لاۋرەاتتارى (ماسكەۋ ق., 1985 ج.), «ديزاين كەشە, بۇگىن, ەرتەڭ» رەسپۋبليكالىق كونكۋرسىنىڭ I دارەجەلى ديپلومانتتارى (الماتى, 1999 ج.).
ولاردىڭ جۇمىستارى قر مادەنيەت جانە اقپارات مينيسترلىگىنىڭ مەملەكەتتىك باعدارلاماسىنىڭ تاپسىرىسىمەن 2006 جىلى «ونەر» باسپاسى شىققان «تەمىرشى — كۋزنەتسى» البومىنا ەنگەن.
بۇل كورمەگە تەمىرشىلەردىڭ جەكە كوللەكتسياسىنان الىنعان 80-نەن استام جۇمىستارى قويىلعان.
كۇلمەنوۆتەر شىعارماشىلىقپەن عانا ەمەس, عىلىمي جۇمىسپەن دە اينالىسادى. ولاردىڭ جەتەكشىلىگىمەن «كوك ءبورى» رەسپۋبليكالىق عىلىمي-زەرتتەۋ جانە قولونەر شەبەرحاناسى قۇرىلىپ, وندا ستۋدەنتتەردىڭ ساندىك-قولدانبالى ونەر بۇيىمدارىن دايىنداۋدىڭ جانە مەتالدى وڭدەۋدىڭ ەجەلگى تەحنولوگيالارىن جاڭعىرتۋ ادىستەمەسىن زەرتتەۋىنە مۇمكىندىكتەر بار.
اعايىندىلار «ەكسپو-2017 – ەتنواۋىل», «قازاق حاندىعىنىڭ 550 جىلدىعى», «الماتى كۇنى – 2015» مەملەكەتتىك, عىلىمي, تاريحي-ەتنوگرافيالىق جوبالاردى ىسكە اسىرۋعا بەلسەندى قاتىستى. 40 جىلدىق عىلىمي-زەرتتەۋ جانە پراكتيكالىق جۇمىستارى ءۇشىن, اعايىندى ۇستالار قر مادەنيەت جانە اقپارات مينيسترلىگىنىڭ «مادەنيەت قايراتكەرى» بەلگىسىمەن ماراپاتتالعان (2007 ج.). سونداي-اق, ولارعا «تۇركى الەمىنە سىڭىرگەن ەڭبەگى ءۇشىن» حالىقارالىق اتاعى بەرىلدى (تۇركيا, 2008 ج.).
2000 جىلى كۇلمەنوۆتەردىڭ ەسكيزى بويىنشا قر مادەنيەت جانە ونەر قايراتكەرلەرىنە تاپسىرىلاتىن «الماس قىلىش» ناگراداسى قۇيىلىپ جاسالدى. ماعجان جۇماباەۆتىڭ «باتىر بايان» پوەماسىنىڭ جەلىسىمەن 1993 جىلى تۇسىرىلگەن كوركەم فيلمگە ارناپ قارۋ-جاراق پەن ساندىك-قولدانبالى ونەر بۇيىمدارىن جاساعان.
«وتىرار سازى», «مۇراگەر», «سازگەن», «ادىرنا» فولكلورلىق وركەسترلەرى ءۇشىن, «باتىر يساتاي تايمان ۇلى», «ەسەت باتىر», «رايىمبەك باتىر», «قوبىلاندى باتىر» مۋزەيلەرى ءۇشىن, سونداي-اق ەلىمىزدىڭ كوپتەگەن وبلىستىق, ولكەتانۋ مۋزەيلەرى ءۇشىن كوپتەگەن بۇيىمدار جاساعان.
اعايىندى كۇلمەنوۆتەردىڭ قولونەر جۇمىستارى رەسپۋبليكامىزدىڭ 16 وبلىسىنىڭ مۋزەيلەرىندە جانە شەتەلدىك جەكە كوللەكتسيالاردا ساقتالعان.
