سپورت • 11 ءساۋىر، 2019

كاسىپقوي بوكسقا قازىنادان نەگە قارجى بولىنەدى؟

833 رەت كورسەتىلدى

بۇل كۇندەرى بىرقاتار بۇقارالىق اقپارات قۇرالدارى مەن ءتۇرلى الەۋمەتتىك جەلىلەردە قازاق­ستاننىڭ تانىمال كاسىپقوي بوكسشىسى فيرۋزا ءشارىپوۆانىڭ IBO جانە WBC Silver نۇسقالارى بويىنشا چەمپيوندىق بەلبەۋدەن ايىرىلۋى جانە ايتۋلى سپورتشىعا مەملەكەتتىك قازىنادان قىرۋار قاراجات بولىنگەنى جايىنداعى ماسەلە قىزۋ تالقىعا تۇسۋدە.

ۇزىن-سونار اڭگىمەنىڭ «القيسساسى» مىناداي: بىرەر كۇن بۇرىن حالىقارالىق بوكس ۇيىمىنىڭ رەسمي سايتىندا جاريالانعان چەمپيوندىق اتاقتىڭ يەگەرلەرى تىزىمىنەن فيرۋزا ءشارىپوۆانىڭ ەسىمى سىزىلىپ تاس­تالدى. وسىلايشا، ايتۋلى ۇيىم جەر­لەسىمىزدى مارتەبەلى اتاقتاردان ايىرۋ­دى ءجون كورگەن ەكەن. بۇل كەلەڭ­سىز جايتتان بوكسشىنىڭ ءوزى دە حابار­سىز بولىپ، بارلىعىن تەك باس­پاسوز بەتتەرىنەن بىلگەن. باق وكىل­دەرىنە بەر­گەن سۇحباتىندا: «بۇل جەردە تاڭ­دانا­تىنداي ەش نارسە جوق. سولاي بولۋعا ءتيىس. حالىقارالىق بوكس ۇيى­مىنىڭ ەرەجەسىنە ساي ءبىر جىلدىڭ ىشىندە مەن ءوز اتاعىمدى قورعاۋ ءۇشىن شارشى الاڭعا شىعۋعا ءتيىس ەدىم. ءبىز WBC نۇسقاسىنىڭ تولىققاندى الەم چەمپيونى ەۆا ۆالسترەممەن جەكپە-جەك وتكىزۋدى جوسپارلادىق. وسى ورايدا اكىمدىك پەن مادەنيەت جانە سپورت مي­نيستر­لىگىنە حات جولداپ، قارجىلاي كومەك كورسەتۋدى سۇرادىق. الاي­دا، قاجەتتى قاراجات تابىلمادى»،  دەپ بوكسشى قازاقستاننىڭ تاراپىنان ەش قولداۋ كورسەتىلمەگەنىن اشىنا ايتتى. 
فيرۋزا ءشارىپوۆانىڭ ءباسپاسوز بەتتەرىندە وسى مالىمدەمەسى جارىق كورگەن بەتتە مادەنيەت جانە سپورت مينيسترلىگى وسى جاعدايعا بايلانىستى رەسمي تۇردە جاۋاپ قايتاردى.    
– وتاندىق سپورتشىعا قولداۋ كورسەتۋ ماقساتىندا فيرۋزا ءشارىپوۆا­نىڭ WBC چەمپيوندىق بەلبەۋىنىڭ يەگەرى ەۆا ۆالسترەممەن بىرىككەن جەكپە-جەگىن وتكىزۋ ءۇشىن مادەنيەت جانە سپورت مينيسترلىگى 2018 جىلدىڭ ما­مىر ايىندا 74،8 ملن تەڭگە كولە­مىندە قاراجات ءبولدى. الايدا، ونىڭ ورنىنا ول يۋليا كۋتسەنكومەن ءوز تيتۋلىن قورعاۋ جەكپە-جەگىن وتكىزدى. وسىلايشا، اسا ماڭىزدى بىرلەسكەن كەز­دەسۋگە بولىنگەن 74،8 ملن تەڭگە قارا­جات تيتۋلدى قورعاۋ جەكپە-جەگىن ۇيىم­داستىرۋعا جۇمسالعان»، دەپ اتالعان مينيسترلىكتىڭ سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ ءىستىڭ ءمان-جايىن باياندادى.  
جوعارىداعى اقپارات تاراعان بەتتە بۇل ماسەلە ءباسپاسوز بەتتەرى مەن الەۋمەتتىك جەلىلەردە قىزۋ تالقى­عا تۇسە باستادى. شىنى كەرەك، «في­رۋزانى قولدايىق نەمەسە وعان كومەك كورسەتەيىك» دەپ پىكىر ءبىلدىر­گەن­دەردىڭ سانى نەكەن-ساياق. وقىر­مان­دار­دىڭ دەنى وسىنشاما قاراجات­تىڭ ءبىر ادامنىڭ عانا يگىلىگى ءۇشىن جۇم­سال­عانىنا وكپە-رەنىشىن ءبىلدىردى. ءتۇرلى پوستتار مەن جازىلعان پىكىرلەردىڭ كوبى  «كاسىپقوي بوكسشىلار مەملەكەت ەسەبىنەن كۇن كورۋگە ءتيىستى ەمەس. قاجەتتى اقشانى ولاردىڭ وزدەرى تابۋعا ءتيىس...»، «اينالايىندار، وسى سىزدەر كاسىپقوي سپورتتى اۋەسقوي نەمەسە بۇقارالىق سپورتپەن شاتاستىرىپ العان جوقسىزدار ما؟..»، «بۇل ەلىمىزدەگى جاقسى ءبىر كوماندانىڭ ءبىر جىلدىق بيۋدجەتى عوي...»، «سوندا فيرۋزا ءشارىپوۆانىڭ وسى ىسكە جاۋاپتى پروموۋتەرلەرى مەن مەنەدجەرلەرى اي قاراپ وتىر ما؟..»، «وزدەرىنە كەرەك قاراجاتتى تابۋ مەملەكەتتىڭ ەمەس، پرو­موۋتەرلەردىڭ تىكەلەي مىندەتى. وسى ماسەلەنى سولار شەشۋ كەرەك...»، «وسىنداي مول قارجىنى جاسوسپىرىمدەر مەن بالالار سپورتىنا جۇمساسا، الدەقايدا ءتيىمدى بولار ەدى...»، «500 000 دوللار – از اقشا ەمەس. وسى سوما قۇرامىندا 300-دەي بالعىن بىلعارى قولعاپ شەبەرلەرى بار ەلىمىزدەگى ەكى-ءۇش بوكس مەكتەبىن ءبىر جىل بويى قامتا­ماسىز ەتۋ ءۇشىن جەتكىلىكتى...»، «كاسىپ­قوي بوكس – بۇل بيزنەس. سالىق تولەۋ­شى­لەردىڭ قالتاسىنا قول سۇعا بەر­مەي، كەرەك اقشانى دەمەۋشىلەردىڭ كومە­گىمەن نەمەسە مىقتى جارناما جاساۋ ارقىلى تابۋعا بولادى...»، «قازاق­ستاندا ءشارىپوۆادان باسقا دا دارىندى كاسىپقوي بوكسشىلار جەتەرلىك. سو­لار­دىڭ ارقايسىسىنا وسىنداي كوپ مولشەردە قاراجات شاشساق، وندا نەمىز قالادى؟..»، «كانەلو، دجەيكوبس نەمەسە دجوشۋانىڭ الاقاندارىن جايىپ، ۇكىمەتتەن اقشا سۇراپ جۇرگەنىن كوز الدارىڭىزعا ەلەستەتىپ كورىڭىزدەرشى. وركەنيەتتى ەلدەردە ونداي باسسىزدىققا جول بەرىلمەيدى...»، «فيرۋزانىڭ وزگە­لەر­دەن نە ارتىقشىلىعى بار. وندا شەتەل­دە جۇدىرىقتاسىپ جۇرگەن بارشا بوكسشىلارىمىزعا جاردەمدەسەيىك» دەگەنگە سايادى. 
«حالىق ايتسا، قالت ايتپايدى» دەيدى. راسىندا دا، بارلىق شەت مەملەكەتتەردە كاسىپقوي سپورتشىلار ءوز كۇندەرىن وزدەرى كورىپ ءجۇر. مەملەكەتتىڭ اۋزىنا قاراپ، الاقان جايىپ وتىرعان ەشكىم جوق. وسى مانساپ جولىندا بايىعاندارى جومارتتىعىمەن دە كوزگە ءتۇسىپ ءجۇر. ماسەلەن، فيليپپيندىك بوكسشى مەنني پاكياو مەن مىسىرلىق فۋتبولشى مۇحاممەد سالاح ءوز وتانداس­تارىنا مىڭداعان باسپانا، مەكتەپتەر پەن اۋرۋحانالار سالىپ، سان ميلليون حالىقتىڭ العىسىنا بولەنۋدە. اسا اۋىر سالماقتاعى ۇلىبريتانيالىق بوكس­شى تايسون فيۋري ءۇيسىز-كۇيسىز جۇرگەندەرگە جانە ىشىمدىك پەن ەسىرتكى دەرتىنە شالدىققان جاندارعا ءۇي تۇرعىزىپ بەردى. ءتۇرلى اۋرۋعا دۋشار بولعان ادامدارعا ۇزبەي كومەك كورسەتىپ جۇرگەن سپورتشىلار دا جەتەرلىك. مىنە، وسىنداي مارتتىگىمەن تانىلعان قۇشاعى كەڭ، پەيىلى تازا ساڭلاقتاردى الەمنىڭ ءار قيىرىنان كەزدەستىرۋگە بولادى. ال بىزدە قالاي؟   حالىقارالىق دودالاردا ەندى عانا تانىلا باستاعان، ءىرى جەڭىستەردىڭ ءدامىن ءالى دە تاتىپ ۇلگەرمەگەن قاتارداعى كوپ سپورتشىلاردى ايتپاعاندا، اتاق-داڭقتارى الىسقا جايىلعان ساڭلاقتاردىڭ وزدەرى قيت ەتسە، مەملەكەتكە جالتاقتاپ، اقشا سۇراۋدى ادەتكە اينالدىرعان. ارينە بۇل جاقسىلىقتىڭ نىشانى ەمەس. 
جوعارىداعى جاعدايعا بايلانىستى وسى سپورت ءتۇرىنىڭ وتىمەن كىرىپ، ك ۇلىمەن شىققان مايتالمان مامان، كەزىندە ماسكەۋ وليمپياداسىنىڭ كۇمىس جۇلدەگەرى جانە كسرو مەن ەۋروپا چەمپيونى اتانىپ، بۇل كۇندەرى قازاقستان كاسىپقوي بوكس فەدەراتسياسىنىڭ ۆيتسە-پرەزيدەنتى قىزمەتىن اتقارىپ وتىرعان ۆيكتور دەميانەنكو مىناداي پىكىر ءبىلدىردى: «بۇل ماسەلەنىڭ بايىبىنا بارعىم دا كەلمەيدى. دەسەك تە مەنىڭ ءبىر بىلەتىنىم – كاسىپقوي بوكسشىلار مەملەكەتتەن كومەك سۇراماۋعا ءتيىس. ويتكەنى بيۋدجەتتىڭ اقشاسى سالىق تولەۋشىلەرگە تيەسىلى. ال دەمەۋشىلەر مەن مەتسەناتتاردى ءشارىپوۆانىڭ ءوزى مەن ونىڭ كومانداسى ىزدەپ تابۋعا ءتيىس. فيرۋزا جاقسى بوكسشى. ەندى ونى الەمدىك رەيتينگتە جوعارىلاتۋدىڭ جولىن ىزدەۋ قاجەت. ۇكىمەتتەن كومەك سۇراۋ – بۇل پروموۋتەردىڭ ساۋاتسىزدىعى. بىلە بىلسەك، مەملەكەت ولاردى قولداۋعا مىندەتتى ەمەس. قاراڭىزدارشى، رەسەيدە قانشاما كاسىپقوي بوكس جارىستارى وتۋدە. سولاردىڭ بىردە-بىرەۋى مەملەكەتتىك بيۋدجەتتەن قارجىلان­دىرىلمايدى. بۇل ىسكە ولار مەتسەناتتار مەن دەمەۋشىلەردى تارتادى. ءبىزدىڭ ەلدە بۇل سالا كەنجە قالعان. سول سەبەپتى دە كاسىپقوي رينگتە كۇش سىناسىپ جۇرگەن بوكسشىلارىمىزدىڭ دەنى اقش نەمەسە كاناداعا كەتۋگە اسىعادى. ايتۋلى مەملەكەتتەردە ءوز-ءوزىڭدى مويىنداتۋعا مۇمكىندىك مول».
قازىنادان كاسىپقوي بوكسشىعا بولىنگەن قارجى تۋرالى جۇرتشىلىق­تىڭ، مامانداردىڭ پىكىرى وسىنداي. قالاي بولعاندا دا قازىنا قارجىسىن وسىلايشا ىسىراپ ەتۋ زاڭسىزدىق ەكەنى ءسوزسىز. الدە مادەنيەت  جانە سپورت مينيسترلىگى اتالعان قارجى مەم­لەكەتتىڭ مەرەيىن ءوسىرىپ، بەدەلىن بيىكتەتۋگە جۇمسالدى دەپ اقتالا ما؟

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار