مەملەكەت باسشىسى قاسىم-جومارت توقاەۆتىڭ ماسكەۋگە جاساعان رەسمي ساپارى حالىقارالىق قوعامداستىقتىڭ نازارىن اۋدارعان ساياسي وقيعالاردىڭ ءبىرى بولعانى انىق. وسى ورايدا وتاندىق, شەتەلدىك, ولاردىڭ ىشىندە, اسىرەسە رەسەيلىك بۇقارالىق اقپارات قۇرالدارى كوپتەگەن حابار تاراتتى, سونداي-اق ساپاردىڭ ءمان-ماڭىزىن اشىپ كورسەتە وتىرىپ, ءوزارا بايلانىستاردىڭ بۇگىنى مەن بولاشاعى تۋرالى وي-تولعامدار مەن پىكىرلەردى كەڭىنەن جاريالادى.
رەسەيدىڭ ىقپالدى ءارى جەتەكشى بۇقارالىق اقپارات قۇرالدارى مەملەكەت باسشىسى ق.توقاەۆتىڭ ماسكەۋگە رەسمي ساپارى قازاقستان-رەسەي قاتىناستارىنا تىڭ سەرپىن بەرەتىنىن جارىسا جازدى. سونداي-اق ولار قاسىم-جومارت توقاەۆتىڭ پرەزيدەنت رەتىندە شەتەلدەرگە ساپارلارىن الدىمەن رەسەيدەن باستاعانىنا ماڭىز بەردى.
سونىمەن قاتار رەسەيلىك باق-تار قازاقستاننىڭ كوپۆەكتورلى ساياسات ۇستانىپ, باتىس پەن شىعىستىڭ اراسىندا «التىن كوپىر», سەنىمدى, تەڭ دارەجەلى سەرىكتەس مەملەكەت رەتىندە تانىلعانىنا, ەلىمىزدىڭ وسى باعىتىن حالىقارالىق قوعامداستىق ۇدايى قولداپ كەلە جاتقانىنا, قازاقستان مەن رەسەيدىڭ جاي عانا كورشىلەس ەلدەر عانا ەمەس, بارلىق سالالار بويىنشا, اسىرەسە ساياسي-ەكونوميكالىق تۇرعىدا سەنىمدى سەرىكتەس بولا ءبىلگەنىنە, سونداي-اق نۇر-سۇلتان قالاسىنىڭ الەمدىك جانە ايماقتىق قاۋىپسىزدىكتى نىعايتۋداعى رولىنە باسا نازار اۋدارعان.
تارقاتا ايتار بولساق, «ريا نوۆوستي» اگەنتتىگى قازاقستان پرەزيدەنتى مەن رەسەي باسشىسىنىڭ كەلىسسوزدەرى نۇرسۇلتان نازارباەۆ قالىپتاستىرعان داستۇرگە ساي وتكەنىن ايتا كەلىپ, ۆ.ءپۋتيننىڭ: «ءبىز قازاقستان پرەزيدەنتىنە ءوزىنىڭ شەتەلدىك ءبىرىنشى رەسمي ساپارىن ءبىزدىڭ ەلگە, رەسەيگە جاساعانىنا ريزاشىلىعىمىزدى بىلدىرەمىز. ءتۇرلى مەملەكەتتىك لاۋازىمداردا قىزمەت ەتكەن قاسىم-جومارت توقاەۆ مىرزا بۇعان دەيىن رەسەيلىك ارىپتەستەرىمەن تىعىز بايلانىستا بولعاندىقتان, پرەزيدەنت رەتىندە دە ءبىزدىڭ ەلدەرىمىز اراسىنداعى ءوزارا ءتيىمدى ىنتىماقتاستىق پەن وداقتاستىق قاتىناستاردى ودان ءارى دامىتۋعا ۇنەمى نازار اۋداراتىنىنا كۇمان جوق», دەگەن سوزىنە ەكپىن بەرگەن.
اتالعان اقپارات اگەنتتىگى قازاقستان پرەزيدەنتى ق.توقاەۆتىڭ ەكى ەل اراسىنداعى دوستىق قارىم-قاتىناستاردى جالعاستىرۋ ءوزىنىڭ مىندەتى ەكەنىن ايتقانىنا نازار اۋدارعان. وسى ورايدا اگەنتتىك قازاقستان باسشىسىنىڭ: «ءبىزدىڭ قارىم-قاتىناسىمىز ۇنەمى دامىپ كەلەدى. مەنىڭ مىندەتىم – وسى ستراتەگيالىق بايلانىستىڭ ۇزدىكسىز جالعاسۋىن قامتاماسىز ەتۋ. مەن ءبىزدىڭ حالىقتارىمىزدىڭ دوستىق الەۋەتىن نىعايتۋ ءۇشىن بار كۇش-جىگەرىمدى سالامىن», دەگەن ءسوزىن كەلتىرەدى. سونداي-اق «ريا نوۆوستي» رەسەي پرەزيدەنتى ۆلاديمير پۋتين مەن ونىڭ قازاقستاندىق ارىپتەسى قاسىم-جومارت توقاەۆ «استانا پروتسەسى» اياسىندا سيرياداعى قاقتىعىستى شەشۋ جونىندەگى كۇش-جىگەردى جالعاستىرۋعا كەلىسكەنىن جازدى.
«روسسيسكايا گازەتا» (RG.RU) پورتالى قازاقستان پرەزيدەنتى قاسىم-جومارت توقاەۆتىڭ رەسەي پرەزيدەنتى ۆلاديمير پۋتينمەن بۇرىننان تانىس ەكەندەرىن ايتا كەلىپ, مەملەكەتتەر باسشىلارىنىڭ ءبىر-بىرىنە ايتقان جىلى لەبىزدەرىنە توقتالعان. وسى ورايدا RG.RU پورتالى ۆ.ءپۋتيننىڭ: «ءسىز ءبىزدىڭ قارىم-قاتىناستارىمىزدىڭ دەڭگەيىن بىلەسىز. ءسىز رەسەي مەن قازاقستان اراسىنداعى بايلانىستاردى وسى دەڭگەيگە كوتەرۋ ءۇشىن كوپ قىزمەت اتقاردىڭىز. ارينە, بۇل ماسەلەدە ەڭ الدىمەن قازاقستاننىڭ تۇڭعىش پرەزيدەنتىنىڭ ەڭبەگى ايرىقشا. ءبىز ءوزارا ىنتىماقتاستىعىمىزدى نىعايتۋ ماقساتىندا جۇمىس ىستەدىك, ناتيجەسىندە كوپ جەتىستىككە جەتتىك», دەپ قازاقستاندىق ارىپتەسىنە ايتقان سوزىنە توقتالعان.
سونىمەن بىرگە RG.RU پورتالى رەسەي باسشىسىنىڭ: «ءبىز جاي عانا سەرىكتەس ەمەسپىز, ءبىز ەڭ جاقىن وداقتاسپىز», دەگەن سوزىنە ءمان بەرە وتىرىپ, ۆ.ءپۋتيننىڭ مەملەكەتتەر اراسىنداعى قارىم-قاتىناستار حالىقارالىق ۇيىمدار اياسىندا دا, ەكىجاقتى بايلانىستاردا دا ءتيىمدى دامىپ كەلە جاتقانى, بۇل ءوز كەزەگىندە ەكى مەملەكەت حالىقتارىنىڭ ءومىر ءسۇرۋ دەڭگەيىنە وڭ اسەر ەتەتىن ەلەۋلى ناتيجەلەرگە قول جەتكىزۋگە جول اشاتىنى تۋرالى پىكىرىن جەتكىزگەن. سونداي-اق اتالعان پورتال ق.توقاەۆتىڭ ءوزارا ىنتىماقتاستىقتى ودان ءارى نىعايتۋ ءۇشىن بارلىق مۇمكىندىكتى جاساۋعا كۇش-جىگەرىن ايامايتىنى جونىندە ايتقانىن كەلتىرگەن. بۇعان قوسا, «روسسيسكايا گازەتا» ق.توقاەۆتىڭ «1992 جىلعى شارتتى دايىنداۋعا قاتىسقانىم ەسىمدە, وسى كەلىسىم نەگىزىندە ءبىزدىڭ ەلدەرىمىز وداقتاستىق قاتىناستارعا مۇمكىندىك الدى. ءبىز وداقتاستىق قارىم-قاتىناستار جانە ولاردان تۋىندايتىن مىندەتتەمەلەر تۋرالى جاقسى بىلەمىز», دەگەن ءسوزىن جاريالادى.
ال «موسكوۆسكي كومسومولەتس» («MK.ru»): «قاسىم-جومارت توقاەۆ پەن ۆلاديمير پۋتين ءبىر-ءبىرىمەن تانىسۋ ءۇشىن ۋاقىت جۇمسامادى. ساراپشىلار قازاقستاننىڭ جاڭا پرەزيدەنتىنىڭ ماسكەۋگە جاساعان ساپارى بارىنشا سىپايى وتەتىنىن ايتقانىمەن, پرەزيدەنتتەر وزدەرىنىڭ جاۋىنگەرلىك-كوشباسشىلىق رۋحىن كورسەتتى جانە ىنتىماقتاستىقتى جالعاستىرۋعا باعىتتالعان ءبىرقاتار كەلىسىمدەرگە قول قويدى. قاسىم-جومارت توقاەۆتىڭ قازاقستان پرەزيدەنتى رەتىندە ماسكەۋگە ساپار جاساۋ ءۇشىن دايىندالۋعا ەكى اپتا عانا ۋاقىت كەتتى. ول انت قابىلداعان كۇنى كرەملدەن شاقىرۋ الدى. اقوردا بىردەن كەلىستى. بۇل كوپۆەكتورلى ساياسات ۇستاناتىن قازاقستان رەسەيدىڭ الداعى ۋاقىتتا باستى سەرىكتەسى ءارى وداقتاسى بولىپ قالا بەرەتىنىن كورسەتەدى.
ۆلاديمير پۋتين قازاقستان پرەزيدەنتى قاسىم-جومارت توقاەۆتى كرەملدىڭ ۇلكەن سارايىندا قابىلدادى. بۇل فورمات ادەتتە ەڭ قۇرمەتتى قوناقتار ءۇشىن قولدانىلادى.
پرەزيدەنتتەر ءبىر-بىرىمەن ارنايى تانىسۋدى قاجەت ەتپەدى. ولار العاش رەت 2000 جىلى تانىسقان. سودان بەرى ولار ءتۇرلى الاڭداردا بىرنەشە رەت كەزدەسكەن», دەپ جازدى.
سونىمەن قاتار رەسەيلىك باسقا دا بۇقارالىق اقپارات قۇرالدارى ەكى ەل اراسىنداعى ستراتەگيالىق ارىپتەستىكتى جان-جاقتى نىعايتۋعا دەگەن ورتاق نيەتتىڭ بار ەكەنىن, قازاقستان مەن رەسەي ءتۇرلى سالالار بويىنشا ءوزارا ءىس-قيمىل جاساۋدا مول تاجىريبە جيناقتاعانىن, تاراپتار ءۇشىن ماڭىزى زور ەكىجاقتى بايلانىستاردىڭ قۇقىقتىق بازاسىن قۇرايتىن مەملەكەتارالىق جانە ۇكىمەتارالىق 450-دەن استام قۇجات قابىلدانعانىن, ولاردىڭ ەكىجاقتى ىنتىماقتاستىقتىڭ بولاشاعىنا سەنىممەن قاراۋعا, بارلىق باعىتتارداعى ارىپتەستىكتى كەڭەيتۋگە مۇمكىندىك بەرەتىنىن, قازاقستاندا جۇمىس ىستەيتىن 9 مىڭنان استام بىرلەسكەن كاسىپورىن اراداعى ساۋدا-ەكونوميكالىق بايلانىستارعا زور ۇلەسىن قوسىپ وتىرعانىن اتاپ كورسەتتى. سونىمەن بىرگە رەسەيلىك باق پرەزيدەنت قاسىم-جومارت توقاەۆتىڭ قازاقستان-رەسەي بايلانىستارىن ورىستەتە تۇسۋگە كۇش سالاتىنى جونىندە ايتقان ءسوزىن جارىسا جاريالادى.
