بۇگىن بۋبليك امەريكالىق ميتچەل كريۋگەرمەن كۇش سىناستى. ءبىرىنشى سەتتە تاي-برەيكتە جەڭىسكە جەتكەن جەرلەسىمىز ودان كەيىن قارسىلاسىنا باس كوتەرتكەن جوق. ەسەپ – 7:6(7:2), 6:3. وسىنىڭ الدىندا عانا الەكساندر بۋبليك سەربيالىق پەدجا كرشتيندى ۇتقان بولاتىن – 1:6, 6:3, 6:4. ەندى ول شيرەك فينالدا يسپانيالىق فەليسيانو لوپەس پەن گەرمانيالىق دومينيك كەپفەر اراسىنداعى كەزدەسۋدىڭ جەڭىمپازىمەن شەبەرلىك بايقاسادى.
ال زارينا دياس ءۇشىنشى كەزەڭگە شىعا المادى. تۇساۋكەسەر كەزدەسۋىندە ول جەرگىلىكتى ويىنشى رەناتو ساراسۋاعا 7:5, 6:4 ەسەبىمەن سان سوقتىرعان ەدى. ەكىنشى كەزەڭدە جەرلەسىمىز ۆيكتوريا ازارەنكومەن كەزدەستى. 29 جاستاعى بەلارۋس ەلىنىڭ وكىلى كەزىندە الەمنىڭ ءبىرىنشى راكەتكاسى اتانعانىن جانكۇيەرلەر جاقسى بىلەدى. ازارەنكو – اۆستراليانىڭ اشىق بىرىنشىلىگىنىڭ ەكى دۇركىن جەڭىمپازى, اقش-تىڭ اشىق بىرىنشىلىگىندە ەكى رەت فينالعا شىقتى, رولان گارروس پەن ۋيمبلدوندا جارتىلاي فينالدا ونەر كورسەتتى, WTA تۋرنيرلەرىندە 20 مارتە توپ جاردى, لوندون وليمپياداسىنىڭ جەكەلەگەن سايىسىندا قولا السا, ارالاس جۇپتار باسەكەدە باس جۇلدەنى ولجالادى. قازىرگى كەزدە الەمدىك رەيتينگتە 67 ورىندا تۇرعان اتاقتى تەننيسشىگە زارينانىڭ ءالى جەتپەدى – 2:6, 3:6. بۇل باسەكە نەبارى 1 ساعات 7 مينۋتقا سوزىلدى.
