- بيىلعى قىس باتىس قازاقستان وبلىسى تۇرعىندارى ءۇشىن ۇلكەن سىناق بولدى. سوڭعى 30 جىلدان بەرى بولماعان قار جاۋدى. اۋا رايىن باقىلاۋشى مامانداردىڭ ايتۋىنشا, مۇنداي قالىڭ قار سوڭعى رەت 1987 جىلى تىركەلگەن ەكەن. ول جىلى قار قالىڭدىعى 54 سانتيمەتر بولسا, بيىلعى قار 60 سانتيمەتردەن استى. وسىنداي جاعدايدا سىزدەر اۋا-رايىنىڭ قولايسىزدىعىنا قاراماي, ۋاقىتپەن ساناسپاي ۇلكەن قىزمەت اتقاردىڭىزدار. سونىمەن قاتار وبلىستاعى جول, قۇرىلىس كومپانيالارى مەن جەكە كاسىپكەرلەر دە بىزگە كومەك قولىن سوزدى. وسىنداي ۇيىمشىلدىقتىڭ ارقاسىندا تابيعاتتىڭ توسىن مىنەزىنە توتەپ بەردىك. الداعى ۋاقىتتا دا حالىق ءۇشىن جاسالاتىن يگى ىستەردى بىرلەسىپ اتقارامىز دەپ سەنەمىن, - دەدى التاي كولگىنوۆ.
ايتا كەتەيىك, 2017-2018 جىلعى قىس ماۋسىمىندا ورال قالاسى اۋماعىنان 200 مىڭ شارشىمەتر قار شىعارىلعان ەكەن. ال بيىلعى قىستا شاھار اۋماعىنان تازارتىلىپ الىنعان قاردىڭ كولەمى 1,5 ملن شارشىمەتردەن اسىپ كەتتى. بىلتىر قار توگەتىن 2 پوليگون بولسا, بيىل وسىنداي 7 الاڭ اۋزى-مۇرنىنان شىققان.
«جايىق تازا قالا», «ورال تازا سەرۆيس», «باتىس سۋ ارناسى» جشس-لارى مەن «جايىقجىلۋقۋات» اق بىرلەسە اتسالىسقان جۇمىستىڭ ناتيجەسىندە ورال قالاسىندا ءبىر دە ءبىر ءۇي سۋعا كەتپەدى. «جايىق تازا قالا» جشس ديرەكتورى قۋات ەرسايىننىڭ ايتۋىنشا, كوكتەمگى قار سۋى جينالعان جەرلەردەن 53 مىڭ شارشىمەتر سۋ سورىلىپ, اۋلاققا توگىلگەن. اتالعان مەكەمەدە بۇگىندە 750 ادام ەڭبەك ەتەدى, 300 تەحنيكا جۇمىس ىستەپ ءجۇر. ال جالپى كوكتەمگى سۋ تاسقىنىنىڭ الدىن الۋعا ورال قالاسىندا 1 مىڭنان اسا ادام جۇمىلعان بولاتىن.
ءوڭىر باسشىسىنىڭ العىس حاتىن العان «جايىق تازا قالا» مەكەمەسىنىڭ ءبىر توپ قىزمەتكەرى مەن مەكەمە-كاسىپورىن باسشىلارى دا قاراپايىم قار تازالاۋشىلارىنىڭ ەڭبەگى ەلەنگەنىنە ريزاشىلىق ءبىلدىردى.
سۋرەتتى تۇسىرگەن رافحات حالەلوۆ
باتىس قازاقستان وبلىسى
