قانداسىمىز ءوزىنىڭ كوماندالىق ارىپتەسى ۆالەري حريششاتىيمەن بىرگە ەرلىككە باعالانعان تالاي ءىس تىندىردى. اتاپ ايتساق, 1974-1990 جىلدار ارالىعىندا بيىكتىگى جەتى مىڭ مەتردەن اساتىن كسرو-نىڭ بارلىق تاۋلارىنا شىقتى. كوممۋنيزم, جەڭىس, لەنين, كورجەنەۆسكوي, حان-ءتاڭىرى جانە باسقا دا شىڭدارعا قازاقتىڭ ۇلىنىڭ تابانى ءتيدى.
حالىقارالىق دەڭگەيدەگى جەتىستىكتەرىنە كەلەر بولساق, 1982 جىلى العاشقى كەڭەستىك ەكسپەديتسيا قۇرامىمەن بىرگە ول ەۆەرەستىڭ وڭتۇستىك-باتىس قابىرعاسىنىڭ ءدال ورتاسىمەن ەۆەرەستكە شىقتى. 1988 جىلى قازبەك ۆاليەۆ, يۋري مويسەەۆ جəنە چەح زولتان دەميان دحاۋلاگيريدىڭ (8167 م, گيمالاي) وڭتۇستىك-باتىس قابىرعاسىنا جەتتى. ولاردىڭ بۇل ارەكەتى سول جىلدىڭ ەڭ كەرەمەت كورسەتكىشى دەپ تانىلدى. 1989 جىلى كسرو-نىڭ بىرنەشە دۇركىن چەمپيوندارى دەگەن اتاقتارى بار قازاقستاندىق الپينيستەر كەڭەس وداعىنىڭ كانچەندجانگۋگە (8586 م, گيمالاي) باعىتتالعان ەكىنشى گيمالاي ەكسپەديتسياسىنا قاتىستى. وسىلاي تىزبەكتەي بەرسەك, قازبەك شاكىم ۇلىنىڭ قول جەتكىزگەن تابستارى جەتەرلىك.
– وتكەن عاسىردىڭ جەتپىسىنشى جىلدارىنىڭ اياعى مەن توقسانىنشى جىلدارىنىڭ باسىن ءالپينيزمىڭ التىن ءدəۋىرى دەپ اتار ەدىم. قۇرامىندا كىل مىقتىلار بار ەكسپەديتسيا قۇرامىندا الىس ساپارلارعا شىعىپ, اۋقىمدى جوبالارعا قاتىسۋ باقىتى ماعان دا بۇيىردى. ول ءبىر كەرەمەت كەزدەر ەدى. ەرەكشە ءبىر شاتتاناتىن جايت, قازاقستاندىقتار الپينيستەر كەزىندە كسرو قۇراماسىنىڭ 35 پايىزىن قۇرادى, – دەيدى قازبەك ۆاليەۆ.
