رۋحانيات • 04 ءساۋىر، 2019

ورتالىق ازيا تالانتتاردى ىزدەيدى

441 رەت كورسەتىلدى

ەڭ ءساتتى تەلەۆيزيالىق فورمات رەتىندە گيننەستىڭ رەكوردتار كىتابىنا ەنگەن Got Talent شوۋى ەندى ورتالىق ازيا ەلدەرىنىڭ قاتىسۋىمەن وتپەك. «Central Asia’s Got Talent» (ورتالىق ازيا تالانتتاردى ىزدەيدى) تەلەۆيزيالىق جوباسىنا ىرىكتەۋ باستالدى. تالانتتار شوۋىنا قاتىسامىن دەۋشىلەرگە قانداي دا ءبىر شەكتەۋ جوق، ەڭكەيگەن كارىدەن ەستيار بالاعا دەيىن باق سىناي الادى.

ءباسپاسوز ءماسليحاتىنا «حا­بار» اگەنتتىگى» اق باسقارما توراعاسىنىڭ ءبىرىنشى ورىنباسارى – رينات كەرتاەۆ، «Central Asia’s Got Talent» شوۋىنىڭ باس پروديۋسەرى – سەرىك اكيشەۆ (قازاقستان)، Zoʻr TV تەلەارناسىنىڭ پروديۋسەرى – تيمۋر اليەۆ (وزبەكستان)، «تەلەمەديا» كومپانياسىنىڭ باس ديرەكتورى – الەكسەي سيدوروۆ (قىرعىزستان)، «تۆ سافينا» تەلە­ارناسىنىڭ حالىقارالىق بايلانىس ءبولىمىنىڭ باسشىسى – نارگيس كاسىموۆا (تاجىكستان) قاتىستى. اتالعان جوبا اياسىندا قازاقستان، وزبەكستان، قىر­عىزستان جانە تاجىكستان ەلدە­رى اراسىندا ارىپتەستىك بايلانىس ورناتۋ جايلى مەموراندۋمعا قول قويىلدى. ءتورت مەملەكەتتىڭ وكىلدەرى – رينات كەرتاەۆ، سەرىك اكيشەۆ، تيمۋر اليەۆ، قاناتبەك قۇلتاەۆ، نارگيس كاسىموۆا التىن تەتىكتى باسىپ، جوبانىڭ العاشقى كەزەڭى – ىرىكتەۋدىڭ باستالعانىن مالىمدەدى. بۇل جوبانىڭ رەسمي تۇردە ىسكە قوسىلعانىن بىلدىرەدى. 


«قازاقستاندىق تەلەۆيزيا سالاسىندا العاش رەت بارلىق تالانتتى ادامداردى ءبىر الاڭعا جيناماقپىز. وتاندىق ارنالاردا بۇعان دەيىن ءان، بي، سپورت جانە ونەر بايگەلەرى وتكەن بولاتىن. ال بۇل بايقاۋدا كەز كەلگەن دارىندى ادام ءوزىنىڭ مۇمكىندىگىن سىناپ كورەدى. سونداي-اق جوبا­نىڭ تاعى ءبىر ەرەكشەلىگى، ور­تالىق ازيا ەلدەرىنە ورتاق شوۋ بولادى، ياعني باعدارلاماعا قازاق­ستاندىقتارمەن بىرگە وزبەكستان، قىرعىزستان جانە تاجىكستان مەملەكەتتەرىنىڭ ازاماتتارى دا قاتىسا الادى. ءبىزدىڭ باستى ماق­ساتىمىز – ونەرلى ادامداردى ىزدەپ، ولاردىڭ بۇكىل ورتالىق ازيا مەملەكەتتەرىنە تانىلۋىنا مۇمكىندىك بەرۋ» دەيدى «حابار» اگەنتتىگى» اق باسقارما توراعا­سىنىڭ ءبىرىنشى ورىنباسارى رينات كەرتاەۆ. 


Central Asia’s Got Talent – قازاقستان، وزبەكستان، قىرعىزستان جانە تاجىكستان ەلدەرىنىڭ ازاماتتارىنا ارنالعان تالانتتار شوۋى. جوبا ىرىكتەۋ، اشىق تىڭدالىم، شيرەك فينال، جارتىلاي فينال جانە اقتىق فينال سىندى بەس كەزەڭنەن تۇرادى. ءبىرىنشى كەزەڭدە جوباعا قاتىسۋشىلاردىڭ وتىنىشتەرى قابىلدانىپ، ءارى قاراي ءتورت ەلدە ىرىكتەۋ كەزەڭى وتكىزىلەدى. بايقاۋدىڭ جۇلدە قورى 24 ميلليون تەڭگە، وسىعان سايكەس جەڭىمپازدارعا بەرىلەتىن اقشالاي سىيلىق تا قوماقتى بولماق. شوۋ ءتورت ەلدىڭ «حابار»، «Zoʻr TV»، «قوعامدىق ءبىرىنشى ارنا» جانە «تۆ سافينا» تەلەارنالارىنان كورسەتىلەدى. 


جوباعا قاتىسۋعا نيەت ءبىلدىر­گەن ورتالىق ازيا ەلدەرىنىڭ ازاماتتارى +7 700 600 24 24 ورتاق نومىرىنە حابارلاما جولداۋ، سونداي-اق الەۋمەتتىك جەلىلەردەگى جوبانىڭ رەسمي پاراقشالارىنا حات جازىپ، ءوتىنىش ءبىلدىرۋ ارقىلى ۇيىمداستىرۋشىلارمەن حابارلاسا الادى. سونىمەن قاتار ىرىكتەۋ توبى وفف-لاين رەجىمدە دە جۇمىس ىستەيدى. ۇيىمداستىرۋشىلاردىڭ ايتۋىنشا، Central Asia’s Got Talent شوۋىنىڭ تۇساۋكەسەرى بيىل قىركۇيەك ايىندا وتەدى. ال اقتىق فينال 2019 جىلدىڭ جەلتوقسان ايىنا جوسپارلانىپ وتىر. 


ايتا كەتەيىك، Got Talent – Fremantle بريتاندىق كوم­پانيا­سىنىڭ فورماتى. 2006 جىلى بۇل تەلەبايقاۋ «America’s Got Talent» دەگەن اتاۋمەن اقش-تا جارىق كور­دى. حالىقارالىق سيپات العان باعدارلاما 2014 جىلى الەم­دەگى ەڭ ءساتتى تەلەۆيزيالىق فورمات رەتىندە گيننەستىڭ رەكوردتار كىتابىنا ەنگەن.

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار