مۇنايلى وڭىردە ەكولوگيالىق احۋال كوڭىل كونشىتەرلىك ەمەس. مەموراندۋم اياسىندا قورشاعان ورتانى قورعاۋعا باعىتتالعان شارالار كەشەنى جۇزەگە اسادى. سونداي-اق, اتموسفەراعا ءارتۇرلى كوزدەردەن تۇسەتىن كومىرقىشقىل گازىن ازايتۋ بويىنشا ەكولوگيالىق, زەرتتەۋ جۇمىستارى جانە مونيتورينگ جۇرگىزۋ ءۇشىن الەۋمەتتىك تاپسىرىستى قالىپتاستىرۋ دا جوسپاردا بار. وبلىس اۋماعىندا تۇرعىنداردىڭ ەكولوگيالىق قاۋىپسىزدىگىن ساقتاۋ ماقساتىندا تابيعات قورعاۋ باعدارلامالارى مەن ينۆەستيتسيالىق جوبالار ىسكە اساتىن بولادى.
بۇل تۋرالى «ەكولوگيالىق ۇيىمدار اسسوتسياتسياسى» زاڭدى تۇلعالار بىرلەستىگىنىڭ توراعاسى ايگۇل سولوۆەۆا ايتتى. «مەموراندۋم ايماقتىڭ ەكولوگيالىق پروبلەمالارىن شەشۋگە سەپتىگىن تيگىزەدى. پروبلەمالىق ماسەلەلەر بار, ولاردى شەشۋ ءۇشىن الەمدىك تاجىريبەمەن بولىسۋگە دايىنبىز. قازىر جاڭا ەكولوگيالىق كودەكس بويىنشا جۇمىس ىستەپ جاتىرمىز»,- دەدى ايگۇل سولوۆەۆا.
اتىراۋ وبلىسىنىڭ اكىمى نۇرلان نوعاەۆ ەكولوگيالىق پروبلەمالاردى بىرلەسىپ شەشۋ ءۇشىن بۇل مەموراندۋمنىڭ ماڭىزدى ەكەنىن اتاپ ءوتتى. «جەر قويناۋىن پايدالانۋشى كاسىپورىنداردىڭ قورشاعان ورتاعا اسەرىن تومەندەتۋ بويىنشا كەشەندى جۇمىستار ءجۇرىپ جاتىر. بالامالى ەنەرگەتيكا ءبىزدىڭ وڭىردە دە ەنگىزىلۋدە. يساتاي اۋدانىندا قۋاتى 52 مەگاۆاتت العاشقى جەل ەلەكترسانساسى سالىنىپ جاتىر. وبلىستاعى سۋ ايدىندارىندا ەكولوگيالىق سيپاتتاعى پروبلەمالار بار. بۇل ماسەلەلەردىڭ ءبارىن قوعامدىق ۇيىمداردى جۇمىلدىرۋ ارقىلى جاريا تۇردە شەشۋىمىز كەرەك», - دەدى نۇرلان نوعاەۆ.
اتىراۋ
