– فارابي فورۋمى ءداستۇرلى تۇردە وتكىزىلەتىن, حالىقارالىق دەڭگەيگە كوتەرىلگەن, اۋقىمى كەڭ عىلىمي-ءىس-شاراعا اينالدى. سونىمەن قاتار بۇل فورۋم بەلگىلى قازاقستاندىق, تانىمال شەتەلدىك ساراپشىلاردىڭ پىكىر الماسۋ الاڭىنا اينالدى.
كەزەكتى فورۋمدا ادامزاتتىڭ كورنەكتى ويشىلى ءابۋ ءناسىر ءال-ءفارابيدىڭ فيلوسوفيالىق جانە عىلىمي مۇراسىنىڭ ماڭىزىنىڭ ارتا تۇسۋىنە ءوز ۇلەستەرىن قوسىپ جۇرگەن, قازىرگى زامانعى عىلىم مەن ءبىلىمنىڭ دامۋىنا قىزىعۋشىلىق تانىتىپ وتىرعان وتاندىق جانە شەتەلدىك عالىمدار باياندامالارىن ۇسىندى.
پلەنارلىق ماجىلىسكە فرانتسيا, تۇركيا, گونكونگ, پولشا, تاجىكستان, پاكىستان, رەسەي عالىمدارى قاتىسىپ وتىر, – دەدى ءال-فارابي اتىنداعى قازاق ۇلتتىق ۋنيۆەرسيتەتىنڭ رەكتورى, اكادەميك عالىم مۇتانوۆ.
10 كۇنگە سوزىلاتىن فورۋمنىڭ اشىلۋ سالتاناتىندا قر ۇلتتىق عىلىم اكادەمياسىنىڭ پرەزيدەنتى, اكادەميك مۇرات جۇرىنوۆ, پولشا رەسپۋبليكاسىنىڭ قازاقستانداعى توتەنشى جانە وكىلەتتى ەلشىسى سەليم حازبيەۆيچ, تاجىكستان رەسپۋبليكاسىنىڭ قازاقستان رەسپۋبليكاسىنداعى باس كونسۋلى نازير باحودۋر, قر پارلامەنتى سەناتىنىڭ دەپۋتاتى ءالىمجان قۇرتاەۆ, فرانتسياداعى ەكس-مارسەل ۋنيۆەرسيتەتىنىڭ پروفەسسورى, جيل گاستون گرانجە ورتالىعىنىڭ ديرەكتورى پاسكال تورونتو, تۇركياداعى ۇلىعداع ۋنيۆەرسيتەتىنىڭ تەولوگيا فاكۋلتەتىنىڭ پروفەسسورى ياشار ايدىنلى, شىعىستانۋشى, ءدىنتانۋشى, فيلولوگيا عىلىمدارىنىڭ دوكتورى دەربىسالى شەيح ءابساتتار ءسوز سويلەپ, العاشقى مازمۇندى باياندامالارىن وقىدى.
VI حالىقارالىق فارابي وقۋلارى اياسىندا مەملەكەت پەن تۇلعانى, قوعامدى دامىتۋداعى ماسەلەلەردى شەشۋ ءۇشىن شەتەلدىك جانە قازاقستاندىق عالىمداردىڭ كۇش-جىگەرىن بىرىكتىرۋگە باعىتتالعان ءىرى حالىقارالىق عىلىمي ءىس-شارالار وتەدى.
فارابي وقۋلارىنا قازاقستان ۋنيۆەرسيتەتتەرى مەن جاقىن جانە الىس شەت ەلدەردىڭ عىلىمي مەكەمەلەرىنىڭ عالىمدارى, وقىتۋشىلارى مەن ستۋدەنتتەرى قاتىسادى.
فارابي وقۋلارىنىڭ اياسىندا 2-3 ساۋىردە «ءال-فارابي جانە قازىرگى زامان» VI حالىقارالىق فارابي فورۋمى, 3-12 ءساۋىر ارالىعىندا فاكۋلتەتتەردىڭ حالىقارالىق عىلىمي كونفەرەنتسياسى, 8-11 ءساۋىر ارالىعىندا «فارابي الەمى» ستۋدەنتتەر مەن جاس عالىمداردىڭ حالىقارالىق عىلىمي كونفەرەنتسياسى وتەدى.
عىلىمي-تەحنيكالىق ءىس-شارالار وگايو ۋنيۆەرسيتەتىنىڭ (اقش), حاماد بين حاليفا ۋنيۆەرسيتەتى يسلامدىق زەرتتەۋلەر كوللەدجىنىڭ (كاتار), ەكسەتەر ۋنيۆەرسيتەتىنىڭ گۋمانيستىك بيوارحەولوگيا ورتالىعىنىڭ ( ۇلىبريتانيا), فرانكوفونيا حالىقارالىق اگەنتتىگىنىڭ (رۋمىنيا), پۋسان ۋنيۆەرسيتەتىنىڭ (وڭتۇستىك كورەيا), كاير ۋنيۆەرسيتەتىنىڭ (ەگيپەت), چەليابى مەملەكەتتىك تاريحي-مادەني "اركايم" قورىعى مەن رعا فيلوسوفياينستيتۋتىنىڭ (رەسەي) جانە ت.ب.عالىمدارىنىڭ قاتىسۋىمەن باستالدى.
ايناش ەسالي,
«Egemen Qazaqstan»
الماتى
